యూనివర్సిటీల్లో 450 అసిస్టెంట్ ప్రొఫెసర్ పోస్టుల భర్తీ.. త్వరలో నోటిఫికేషన్

తెలంగాణ వర్సిటీల్లో 450కి పైగా అసిస్టెంట్ ప్రొఫెసర్ పోస్టుల భర్తీకి సంబంధించి వేగంగా ప్రభుత్వం చర్యలు తీసుకుంటుంది. జీఓ 21 సవరణలతో త్వరలో నోటిఫికేషన్ రానుంది.

తెలంగాణలో ఉన్న 13 ప్రభుత్వ విశ్వవిద్యాలయాల్లో సుదీర్ఘకాలంగా పెండింగ్‌లో ఉన్న అసిస్టెంట్ ప్రొఫెసర్ ఖాళీల భర్తీ ప్రక్రియ ఎట్టకేలకు ముందుకు కదిలింది. ఈ నియామకాలను తెలంగాణ పబ్లిక్ సర్వీస్ కమిషన్ ద్వారా కాకుండా జీఓ 21 ప్రాతిపదికన వర్సిటీ స్థాయిలోనే భర్తీ చేయాలని రేవంత్ రెడ్డి సర్కారు కీలక నిర్ణయం తీసుకుంది.

కాకతీయ వర్శిటీ

వర్సిటీ నియామకాలపై ఏర్పడిన ప్రతిష్టంభనకు తెరదించేందుకు సీఎం కార్యాలయ ముఖ్యకార్యదర్శి ఎన్. శ్రీధర్ సమక్షంలో ఉన్నత స్థాయి సమీక్షా సమావేశం జరిగింది. విద్యాశాఖ ఉన్నతాధికారులు, ముగ్గురు వర్సిటీ వైస్ ఛాన్సలర్లు ఈ భేటీలో పాల్గొన్నారు.

గతంలో జారీ చేసిన జీఓ 21 విధానంలో కొన్ని సవరణలు చేయాలని ఈ సమావేశంలో నిర్ణయించారు. యూజీసీ మార్గదర్శకాలకు భిన్నంగా జీఓ 21లో పీహెచ్‌డీ అభ్యర్థులకు ఇచ్చే వెయిటేజీ మార్కులను తగ్గించారనే విమర్శలు రావడంపై అధికారులు సుదీర్ఘంగా చర్చించారు. యూజీసీ నిబంధనలకు అనుగుణంగా మార్పులు చేసి, త్వరితగతిన కొత్త ఉత్తర్వులు జారీ చేయాలని విద్యాశాఖ అధికారులను సీఎమ్‌ఓ ఆదేశించింది.

విశ్వవిద్యాలయాల్లో ప్రొఫెసర్ల నియామకంపై గతంలో న్యాయపరమైన చిక్కులు, పాలనాపరమైన ప్రతిష్టంభనలు ఏర్పడ్డాయి. గవర్నింగ్ బాడీలు లేకపోవడం కూడా చిక్కుగా మారింది. నియామకాలను ఆమోదించేందుకు యూనివర్సిటీల్లో సరైన పాలకమండళ్లు అందుబాటులో లేవు. కొన్ని దశాబ్దాలుగా సేవలు అందిస్తున్న కాంట్రాక్ట్ సహాయ ఆచార్యులు తమకు ఉద్యోగ భద్రత కల్పించాలని, సర్వీస్ వెయిటేజీ ఇవ్వాలని డిమాండ్ చేస్తున్నారు.

నియామకాలను టీజీపీఎస్సీ ద్వారా చేపట్టాలనే ఆలోచన వచ్చినా.. న్యాయపరమైన అడ్డంకులు రాకూడదనే ఉద్దేశంతో వర్సిటీల వారీగానే భర్తీ ప్రక్రియ చేపడుతున్నారు. ప్రభుత్వం తొలుత కాంట్రాక్ట్ అధ్యాపకుల స్థానాలకు ఎలాంటి విఘాతం కలగకుండా సుమారు 450 అసిస్టెంట్ ప్రొఫెసర్ పోస్టులను భర్తీ చేయాలని ప్రాథమికంగా భావించింది. అయితే ప్రస్తుత పరిస్థితుల్లో ఈ ఖాళీల సంఖ్య మరింత పెరిగే అవకాశం ఉంది.

శాతవాహన విశ్వవిద్యాలయం (కరీంనగర్), పాలమూరు విశ్వవిద్యాలయం (మహబూబ్‌నగర్) పరిధిలో నూతనంగా ప్రభుత్వ ఇంజినీరింగ్, లా కళాశాలలు అందుబాటులోకి వచ్చాయి. కొత్త కాలేజీలకు ప్రభుత్వం అదనపు పోస్టులను మంజూరు చేయడంతో, వర్సిటీ ఖాళీల సంఖ్య 450 కంటే గణనీయంగా పెరగనుంది.

యూజీసీ 2018 నిబంధనల ప్రకారం అసిస్టెంట్ ప్రొఫెసర్ల ఎంపిక ప్రక్రియ ఉంటుంది. సంబంధిత సబ్జెక్టులో పీజీ (55 శాతం మార్కులతో) + NET / SLET / SET అర్హత లేదా Ph.D ఉండాలి. గ్రాడ్యుయేషన్, పీజీ, ఎంఫిల్, పీహెచ్‌డీ, రీసెర్చ్ పబ్లికేషన్స్, టీచింగ్ ఎక్స్‌పీరియన్స్ ఆధారంగా మార్కులు కేటాయిస్తారు. సవరించిన జీఓ 21 ప్రకారం అకడమిక్ పాయింట్లు ప్లస్ ఇంటర్వ్యూలో ప్రతిభ ఆధారంగా తుది ఎంపిక ఉంటుందని అభ్యర్థులు గుర్తుంచుకోవాలి.