ఇందిరమ్మ ఇళ్లపై కీలక అప్డేట్.. బిల్లు చెల్లింపుల్లో మార్పులు చేసిన ప్రభుత్వం!

ఇందిరమ్మ ఇళ్ల పథకంపై కీలక అప్డేట్ వచ్చింది. బిల్లు చెల్లింపుల విషయంలో స్వల్ప మార్పులు చేసినట్టుగా మంత్రి పొంగులేటి శ్రీనివాసరెడ్డి చెప్పారు.

ఇందిరమ్మ ఇళ్ల పథకంలో బిల్లుల విషయంలో ప్రభుత్వం కీలక మార్పులు చేసింది. ఈ మేరకు ఆ విషయాన్ని మంత్రి పొంగులేటి శ్రీనివాసరెడ్డి ప్రకటించారు. ఇళ్ల నిర్మాణంలో జాతీయ ఉపాధి హామీ పథకం కింద 90 పని దినాలు, వ్యక్తిగత మరుగుదొడ్ల నిర్మాణం పనులు చేసుకోవాలని కేంద్రం అనుమతి ఇచ్చిందని, అందుకే బిల్లుల విషయంలో మార్పులు తప్పనిసరి అని మంత్రి పొంగులేటి వెల్లడించారు. అయితే బిల్లులకు సంబంధించిన షెడ్యూల్‌లో మాత్రమే మార్పులు ఉంటాయని, రూ.5లక్షలు చెల్లింపుల విషయంలో ఎలాంటి మార్పు ఉండదని స్పష్టం చేశారు.

ఇందిరమ్మ ఇళ్ల పథకంపై కీలక అప్డేట్

ప్రస్తుతం చూసుకుంటే ఇందిరమ్మ ఇంటి నిర్మాణంలో భాగంగా ముదటి, రెండో దశ పనులు అయ్యాక.. రూ.లక్ష చొప్పున లబ్ధిదారుల ఖాతాలో జమ చేస్తోంది ప్రభుత్వం. ఈ రెండు దశ చెల్లింపుల్లో ఎలాంటి మార్పులు చేయలేదు. కానీ మూడో దశలో చెల్లించే రూ.2లక్షల చెల్లింపుల్లో మార్పులు ఉంటాయి. ఇందులో మార్పు ప్రకారం.. రూ.1.60 లక్షలు అందిస్తారు. తర్వాత దశల్లో మిగిలిన డబ్బును జమ చేస్తారు. పరిపాలన సౌలభ్యం కోసం ఈ మార్పును చేసినట్టుగా ప్రకటించారు మంత్రి పొంగులేటి. ఈ విషయాన్ని గమనించి లబ్ధిదారులు సహకరించాలన్నారు. రూ.5లక్షల చెల్లింపులో మార్పు ఉండదని మరోసారి స్పష్టం చేశారు.

మరోవైపు చాలా మంది లబ్ధిదారులకు ఇందిరమ్మ ఇండ్లు మంజూరు అయినా నిర్మాణాలు ముదలుపెట్టలేదు. వారిపై ప్రభుత్వం సీరియస్‌గా దృష్టిపెట్టినట్టుగా తెలుస్తోంది. అర్హులైన పేద కుటుంబానికి రూ.5లక్షల ఆర్థిక సాయం అందిస్తోంది ప్రభుత్వం. కానీ చాలా మంది మంజూరైన ఇళ్ల నిర్మాణాలు చేపట్టడం లేదు. ఇందుకోసం గ్రేస్ పిరియడ్ పెట్టింది ప్రభుత్వం. ప్రభుత్వం ప్రకారం ఇంటి స్థలాన్ని మార్కింగ్ చేసిన 45 రోజుల్లోగా నిర్మాణ పనులు చేపట్టాలి.

కానీ చాలా మంది లబ్ధిదారులు ఈ గడువు దాటిపోయినా.. నిర్మాణాలు ముదలుపెట్టలేదు. అలాంటి వారికి మరో 15 రోజులు సమయం ఇచ్చింది. అయినా లబ్ధిదారులు పెద్దగా పట్టించుకోవడం లేదు. ఇక ఈ నెలాఖరులోగా నిర్మాణాలు ముదలుపెట్టని... వారి నుంచి అంగీకార పత్రం తీసుకుంటుంది ప్రభుత్వ. వారి గృహ నిర్మాణ మంజూరును రద్దు చేసేందుకు యోచిస్తోంది. దీంతో రద్దైన ఇళ్లను అవసరం ఉన్నవారికి కేటాయిస్తారు. అయితే నిర్మాణాలు ముదలుపెట్టకపోవడానికి లబ్ధిదారులు అనేక కారణాలు చెబుతున్నారు. డబ్బుల లేకపోవడం, అప్పులు తీసుకురావాల్సి వస్తుండటంలాంటి కారణాలను వివరిస్తున్నారు.