Telangana Inter Admissions : ఇంటర్ అడ్మిషన్లపై కొత్త అప్డేట్ - ఇదే చివరి అవకాశం!

తెలంగాణలో ఇంటర్ ప్రవేశాల కోసం చూస్తున్న విద్యార్థులకు ఇంటర్మీడియట్ బోర్డు మరో అప్డేట్ ఇచ్చింది. రాష్ట్రంలోని అన్ని రకాల జూనియర్ కళాశాలల్లో ఇంటర్ ప్రథమ సంవత్సరంలో చేరేందుకు మరో అవకాశం కల్పించింది.

తెలంగాణలో ఇంటర్మీడియట్ విద్యా సంవత్సరం ప్రారంభమై దాదాపు ఐదు నెలలు కావొస్తున్న తరుణంలో ఇప్పటివరకు ప్రవేశాలు పొందలేకపోయిన విద్యార్థులకు ఇంటర్మీడియట్ విద్యా మండలి మరో అవకాశం కల్పించింది. ఇంటర్ ఫస్ట్ ఇయర్ లో చేరేందుకు అక్టోబర్ 26వ తేదీ నుంచి 29వ తేదీ వరకు అవకాశం ఉంటుందని ప్రకటన జారీచేసింది.

తెలంగాణలో ఇంటర్‌లో చేరేందుకు మరో అవకాశం

ప్రభుత్వ, ఎయిడెడ్ కళాశాలల్లో విద్యార్థులు నేరుగా చేరవచ్చని…. ఒకవేళ ప్రైవేట్ జూనియర్ కళాశాలల్లో ప్రవేశం పొందాలనుకుంటే ప్రతి అడ్మిషన్‌కు రూ.500 ఆలస్య రుసుము (లేట్ ఫీజు) చెల్లించాల్సి ఉంటుందని స్పష్టం చేశారు.

ఇంటర్మీడియట్ అడ్మిషన్ల ప్రక్రియలో ప్రైవేట్ కళాశాలలు ఎలాంటి ప్రత్యేక ప్రవేశ పరీక్షలు నిర్వహించకూడదని బోర్డు ఇప్పటికే హెచ్చరించింది. పదో తరగతిలో సాధించిన మార్కులు లేదా జీపీఏ మెరిట్ ప్రాతిపదికన మాత్రమే సీట్లను భర్తీ చేయాలని ఆదేశించింది. ప్రవేశాల సమయంలో ప్రభుత్వ నిబంధనలకు అనుగుణంగా సామాజిక వర్గాల వారీగా కేటాయించిన రిజర్వేషన్ల పద్ధతిని విధిగా పాటించాలని విద్యాసంస్థల యాజమాన్యాలకు స్పష్టం చేసింది.

ఈసారి ప్రవేశాలు పొందే ప్రతి విద్యార్థికి కొన్ని కొత్త నిబంధనలను విధిగా అమల్లోకి తెచ్చారు. అడ్మిషన్ పొందే విద్యార్థి తన ఆధార్ కార్డు కాపీని సమర్పించాల్సి ఉంటుంది. దీంతో పాటు యువతను మాదకద్రవ్యాల మహమ్మారికి దూరంగా ఉంచే ఆలోచనతో, తాము ఎలాంటి డ్రగ్స్ లేదా మత్తు పదార్థాలకు దూరంగా ఉంటామని హామీ ఇస్తూ 'యాంటీ డ్రగ్ డిక్లరేషన్' పత్రంపై విద్యార్థి, తల్లిదండ్రులు విధిగా సంతకం చేసి సమర్పించాలని బోర్డు నిబంధన విధించింది.

అనుమతి లేని కళాశాలలతో జాగ్రత్త: ఇంటర్ బోర్డు హెచ్చరిక

ఇంటర్ ప్రవేశాలు తీసుకునే ముందు విద్యార్థులు, వారి తల్లిదండ్రులు అత్యంత జాగ్రత్తగా వ్యవహరించాలని అధికారులు సూచించారు. ఇంటర్మీడియట్ బోర్డు నుంచి అధికారిక గుర్తింపు పొందిన కళాశాలల జాబితాను ముందుగా సరిచూసుకున్న తర్వాతే ఫీజులు చెల్లించి చేరాలని స్పష్టం చేశారు.

గుర్తింపు లేని కొన్ని ప్రైవేట్ జూనియర్ విద్యాసంస్థలు చేసే నిరాధారమైన ప్రచారాలు, ఆకర్షణీయమైన ప్రకటనలు, నకిలీ గారడీలను నమ్మి మోసపోవద్దని హెచ్చరించారు. అడ్మిషన్లకు సంబంధించి లేదా కళాశాలల గుర్తింపుపై ఎలాంటి సందేహాలు ఉన్నా వెంటనే TGBIE అధికారిక వెబ్‌సైట్‌ను సంప్రదించి సమాచారం తెలుసుకోవాలని అధికారులు స్పష్టం చేశారు.