TG EAPCET Seat Allotment : టీజీ ఈఏపీసెట్ మొదటి రౌండ్ సీట్ల కేటాయింపు - అలాట్‌మెంట్ లింక్, రిపోర్టింగ్ తేదీలివే

TG EAPCET Seat Allotment : టీజీ ఈఏపీసెట్ 2026 ఇంజనీరింగ్ మొదటి విడత సీట్ల కేటాయింపు ప్రక్రియ పూర్తయింది. మొత్తం 88,053 సీట్లకు గాను 79,891 మందికి సీట్లు దక్కాయి. జూలై 14 లోగా సెల్ఫ్ రిపోర్టింగ్ పూర్తి చేయాల్సి ఉంటుంది.

TG EAPCET Seat Allotment : టీజీ ఈఏపీసెట్ - 2026 విద్యా సంవత్సరానికి సంబంధించి ఇంజినీరింగ్ కోర్సుల్లో ప్రవేశాల కోసం నిర్వహించిన మొదటి విడత సీట్ల కేటాయింపు ప్రక్రియ ముగిసింది.విద్యార్థులు తమకు ఏ కాలేజీలో సీటు వచ్చిందో తెలుసుకోవడానికి అధికారిక వెబ్‌సైట్ tgeapcet.nic.in లో లాగిన్ అయి చెక్ చేసుకోవచ్చు.

టీజీ ఈఏపీసెట్ 2026

ఈ ఏడాది కౌన్సెలింగ్ ప్రక్రియలో భాగంగా జూన్ 22 నుంచి 29 వరకు అభ్యర్థుల సర్టిఫికేట్ వెరిఫికేషన్ నిర్వహించారు. ఈ ప్రక్రియకు మొత్తం 89,450 మంది అభ్యర్థులు హాజరై… వెరిఫికేషన్ ప్రాసెస్ పూర్తి చేసుకున్నారు.

జూలై 5 నుంచి 7 వ తేదీ వరకు వెబ్ ఆప్షన్లను ఎంచుకున్నారు. మొత్తం 88,510 మంది అభ్యర్థులు ఈ ప్రక్రియలో పాల్గొనగా…. మొత్తంగా 55,63,270 ఆప్షన్లు నమోదు చేసుకున్నారు. అభ్యర్థులు సాధించిన ర్యాంకులు, ఎంచుకున్న వెబ్ ఆప్షన్లు ఆధారంగా…. అధికారులు సీట్లు కేటాయించారు.

రాష్ట్రవ్యాప్తంగా వివిధ ఇంజినీరింగ్ కళాశాలల్లో అందుబాటులో ఉన్న మొత్తం 88,053 సీట్లకు గాను, తొలి విడతలో 79,891 మంది అభ్యర్థులకు సీట్లను కేటాయించారు. దీంతో మొదటి విడత ముగిసేసరికి ఇంకా 8,162 సీట్లు ఖాళీగా మిగిలాయి. ఈ మిగిలిపోయిన సీట్లను రాబోయే తదుపరి విడత (రెండో విడత) కౌన్సిలింగ్ ప్రక్రియ ద్వారా భర్తీ చేయనున్నారు.

జూలై 14 లోగా రిపోర్టింగ్ తప్పనిసరి

మొదటి విడతలో సీట్లు పొందిన అభ్యర్థులు కౌన్సెలింగ్ నిబంధనల ప్రకారం నిర్ణీత గడువులోగా ఆన్‌లైన్ ద్వారా ట్యూషన్ ఫీజు చెల్లించాల్సి ఉంటుంది. ఫీజు చెల్లించిన అనంతరం వెబ్‌సైట్ లోనే సెల్ఫ్ రిపోర్టింగ్ ప్రక్రియను పూర్తి చేయాలి. అభ్యర్థులు జూలై 14వ తేదీ వరకు ఆయా కాలేజీల్లో రిపోర్టింగ్ చేయడానికి గడువు విధించారు.

టీజీ ఈఏపీసెట్ - 2026 రెండో విడత కౌన్సెలింగ్ జులై 17వ తేదీ నుంచి ప్రారంభమవుతుంది. జులై 18న సర్టిఫికెట్ల వెరిఫికేషన్ ప్రక్రియ నిర్వహించనుండగా, జులై 18, 19 తేదీల్లో విద్యార్థులు రెండో విడత వెబ్ ఆప్షన్లను ఎంచుకోవాల్సి ఉంటుంది. ఈ ప్రక్రియ మొత్తాన్ని కూడా విద్యార్థులు పైన పేర్కొన్న అధికారిక వెబ్‌సైట్ ద్వారానే పూర్తి చేసుకోవాల్సి ఉంటుంది.