TG LAWCET Phase 2 Allotment : తెలంగాణలోని న్యాయ కళాశాలల్లో మూడేళ్లు, ఐదేళ్ల లా కోర్సుల్లో ప్రవేశాల కోసం నిర్వహించిన టీజీ లాసెట్ రెండవ విడత (ఫేజ్-2) సీట్ల కేటాయింపు ఫలితాలను అధికారులు అధికారికంగా విడుదల చేశారు. కౌన్సెలింగ్లో పాల్గొని వెబ్ ఆప్షన్లు నమోదు చేసుకున్న అభ్యర్థులు తమకు కేటాయించిన కాలేజీ మరియు కోర్సు వివరాలను కౌన్సెలింగ్ అధికారిక వెబ్సైట్ ద్వారా నేరుగా పరిశీలించుకోవచ్చు.
అలాట్ మెంట్ ఇలా చెక్ చేసుకోవచ్చు…
- మొదటగా కౌన్సెలింగ్ అధికారిక వెబ్సైట్ https://lawcetadm.tgche.ac.in/ ను సందర్శించాలి.
- హోమ్ పేజీలో కనిపించే 'Candidate Allotment Login Phase II' లింక్పై క్లిక్ చేయాలి.
- అనంతరం అభ్యర్థి తన లాసెట్ హాల్ టికెట్ నంబరు, సాధించిన ర్యాంకు, రిజిస్టర్డ్ మొబైల్ నంబరు మరియు పుట్టిన తేదీ వివరాలను నమోదు చేయాలి.
- ఆ తర్వాత మీ లాగిన్ పాస్వర్డ్ను కూడా సరిగ్గా ఎంటర్ చేసి లాగిన్ అవ్వాలి.
- వివరాలు సమర్పించగానే అభ్యర్థికి సంబంధించిన సీట్ అలాట్మెంట్ లెటర్ స్క్రీన్పై ప్రత్యక్షమవుతుంది.
అలాట్ మెంట్ లో కాలేజీ వివరాలు చూసుకున్న తర్వాత, అభ్యర్థులు తమ ప్రవేశాన్ని ఖరారు చేసుకోవడానికి నిబంధనల ప్రకారం ట్యూషన్ ఫీజును ఆన్లైన్ విధానంలోనే చెల్లించాల్సి ఉంటుంది. అలాట్మెంట్ పేజీలోనే కనిపించే 'Pay Fee' అనే ఆప్షన్పై క్లిక్ చేయడం ద్వారా పేమెంట్ గేట్వేకి వెళ్లవచ్చు. నెట్ బ్యాంకింగ్, క్రెడిట్/డెబిట్ కార్డ్ లేదా UPI ద్వారా నిర్ణీత ఫీజును విజయవంతంగా చెల్లించాలి.
ఫీజు చెల్లింపు పూర్తయిన తర్వాత కంప్యూటర్ జనరేట్ చేసిన అక్నాలెడ్జ్మెంట్ రసీదు మరియు 'జాయినింగ్ రిపోర్ట్' (Joining Report) లను తప్పనిసరిగా ప్రింటౌట్ తీసుకుని భద్రపరుచుకోవాలి.
కాలేజీల్లో రిపోర్టింగ్ - సెప్టెంబర్ 5 ఆఖరు తేదీ…
టీజీ లాసెట్ రెండో విడత కౌన్సెలింగ్లో సీటు సాధించిన అభ్యర్థులకు కాలేజీల్లో రిపోర్టింగ్ చేయడానికి అధికారులు స్పష్టమైన సమయాన్ని కేటాయించారు. అభ్యర్థులు ఈనెల 31వ తేదీ నుంచి సెప్టెంబర్ 5వ తేదీ వరకు తమకు కేటాయించిన కళాశాలలకు నేరుగా వెళ్లి విద్యార్హత ధృవీకరణ పత్రాలు, ఫీజు రసీదు, జాయినింగ్ రిపోర్ట్ సమర్పించాల్సి ఉంటుంది.
నిర్దేశిత గడువు తేదీ అయిన సెప్టెంబర్ 5వ తేదీ లోపు సంబంధిత కాలేజీలో రిపోర్ట్ చేయని అభ్యర్థుల సీటు కేటాయింపును రద్దు చేస్తారు. కాబట్టి అర్హులైన విద్యార్థులు వెంటనే ఫీజు చెల్లించి రిపోర్టింగ్ ప్రక్రియను పూర్తి చేయాలని అధికారులు సూచించారు.