టీజీఎస్ఆర్టీసీలో అడ్వర్టైజ్‌మెంట్ కాంట్రాక్టులకు నోటిఫికేషన్.. పూర్తి వివరాలు ఇవే!

టీజీఎస్ఆర్టీసీ సంస్థ పరిధిలో అడ్వర్టైజ్‌మెంట్ కాంట్రాక్టులకు నోటిఫికేషన్ విడుదల చేసింది. టెండర్లలో పాల్గొనాలి అనుకునేవారి కోసం పూర్తి వివరాలు ఇక్కడ ఉన్నాయి.

తెలంగాణ రాష్ట్ర రోడ్డు రవాణా సంస్థ (TGSRTC) ఆదాయ వనరులను పెంచుకునే దిశగా మరో కీలక నిర్ణయం తీసుకుంది. సంస్థ పరిధిలోని వివిధ ప్రాంతాలలో, బస్సులలో ప్రకటనలు ప్రదర్శించడానికి అర్హులైన కాంట్రాక్టర్ల నుండి బిడ్లను ఆహ్వానిస్తోంది. ఈ మేరకు టీజీఎస్‌ఆర్‌టీసీ వైస్ చైర్మన్ అండ్ మేనేజింగ్ డైరెక్టర్ వై.నాగిరెడ్డి అధికారిక ప్రకటన విడుదల చేశారు. నాలుగు వేర్వేరు విభాగాలలో ఈ అడ్వర్టైజ్‌మెంట్ కాంట్రాక్టుల కోసం టెండర్లను జారీ చేశారు.

టెండర్ల వివరాలు

టీజీఎస్ఆర్టీసీ ప్రకటనలు

బస్సులపై ప్రకటనలు (Tender ID: 712141): సిటీ ఆర్డినరీ, సబర్బన్, మోఫుసిల్, సిటీ ఎక్స్‌ప్రెస్, డిస్ట్రిక్ట్ ఎక్స్‌ప్రెస్, పల్లెవెలుగు బస్సుల (సొంత బస్సులు మాత్రమే) పై ప్రకటనల ప్రదర్శన. కరీంనగర్, నల్గొండ, నిజామాబాద్, ఆదిలాబాద్, ఖమ్మం, మహబూబ్‌నగర్, మెదక్, వరంగల్ ప్రాంతాల్లో ఉన్నాయి.

టికెట్ రోల్స్ వెనుక ప్రకటనలు (Tender ID: 712095): టికెట్ ఇష్యూయింగ్ మెషీన్ రోల్స్ వెనుక భాగంలో ప్రకటనల ముద్రణ, సరఫరా చేయాలి. టీజీఎస్ఆర్టీసీ సంస్థ పరిధిలోని అన్ని ప్రాంతాల్లో చేయాలి.

బస్టాండ్లలో డిజిటల్ టీవీ ప్రకటనలు (Tender ID: 712106): బస్టాండ్‌లలో పెద్ద ఎల్‌ఈడీ స్క్రీన్‌లు, చిన్న డిజిటల్ టీవీల ద్వారా ప్రకటనల ప్రదర్శన చేయాలి. ఆదిలాబాద్, కరీంనగర్, నల్గొండ పరిధిలో చేయాల్సి ఉంటుంది.

గ్రాబ్ హ్యాండిల్స్ ప్రకటనలు (Tender ID: 712135): బస్సుల లోపల ప్రయాణికులు పట్టుకునే గ్రాబ్ హ్యాండిల్స్‌పై(సొంత, అద్దె బస్సులలో) ప్రకటనల హక్కులు, నిర్వహణ చూసుకోవాలి. ఆదిలాబాద్, కరీంనగర్, నల్గొండ, మహబూబ్‌నగర్, మెదక్, వరంగల్‌లో ఉన్నాయి.

ముఖ్యమైన తేదీలు

ఈ టెండర్లలో పాల్గొనే కాంట్రాక్టర్లు ఆన్‌లైన్ ద్వారా, హార్డ్ కాపీల ద్వారా తమ బిడ్లను సమర్పించాల్సి ఉంటుంది. ఆన్‌లైన్ బిడ్ సమర్పణకు చివరి తేదీ 15/07/2026 సాయంత్రం 05:00 గంటల వరకు నిర్ణయించారు. హార్డ్ కాపీల సమర్పణ తేదీ 16/07/2026 ఉదయం 11:00 గంటల నుండి మధ్యాహ్నం 02:00 గంటల వరకు ఉంది.