తెలంగాణ పర్యాటక శాఖ వీక్లీ బర్డ్‌వాచింగ్ వాక్.. మీరు కూడా వెళ్లొచ్చు

తెలంగాణ పర్యాటక శాఖ హైదరాబాద్ వ్యాప్తంగా వారానికోసారి పక్షుల వీక్షణ యాత్రలను ప్రారంభించింది. ప్రతీ ఆదివారం నిర్వహించాలని యోచిస్తోంది.

తెలంగాణ పర్యాటక అభివృద్ధి సంస్థ(టీజీటీడీసీ) రాష్ట్రంలో పక్షి వీక్షణం, జీవవైవిధ్య పరిరక్షణ, ప్రకృతి ఆధారిత పర్యాటకాన్ని ప్రోత్సహించడానికి 'వింగ్స్ అండ్ వైల్డర్‌నెస్' అనే వీక్లీ నేచర్ వాక్ కార్యక్రమాన్ని ప్రారంభించింది. నానక్‌రామ్‌గూడలోని ఘర్-ఎ-ముబారక్‌లో జరిగిన ప్రారంభ నడకలో 30 మంది పక్షి పరిశీలకులు, ప్రకృతి ప్రేమికులు పాల్గొన్నారు. ప్రకృతితో ప్రజల మమేకాన్ని ప్రోత్సహించడానికి, పర్యావరణ పరిరక్షణపై అవగాహన కల్పించడానికి, ఈ సంస్థ ప్రతి ఆదివారం ఈ వాకింగ్ నిర్వహించాలని యోచిస్తోంది.

ప్రతీకాత్మక చిత్రం

మెుదటిసారి నేచర్ వాకింగ్ సందర్భంగా నిపుణులు పాకెట్ ఫీల్డ్ గైడ్‌లను ఉపయోగించి వివిధ పక్షి జాతులను గుర్తించడంలో పాల్గొన్నవారికి మార్గనిర్దేశం చేశారు. వారు పక్షుల విలక్షణ లక్షణాలు, వాటి పిలుపుల ఆధారంగా గుర్తించే పద్ధతులు, పక్షులకు ఆవాసాలను అందించడంలో దేశీయ, దేశీయేతర మొక్కల జాతుల పర్యావరణ ప్రాముఖ్యతను వివరించారు.

శిఖర, భారతీయ నెమలి, బ్లాక్ డ్రోంగో, గ్రీన్ బీ-ఈటర్, కింగ్‌ఫిషర్, గోల్డెన్ ఓరియోల్, ఆసియా కోయల్, రెడ్-వెంటెడ్ బుల్బుల్, రెడ్-వాటిల్డ్ లాప్‌వింగ్, ఇండియన్ సిల్వర్‌బిల్, గ్రే ఫ్రాంకోలిన్‌తో సహా అనేక జాతులను నేచర్ వాకింగ్ సందర్భంగా గుర్తించారు.

ఈ సందర్భంగా టీజీటీడీసీ మేనేజింగ్ డైరెక్టర్ క్రాంతి వల్లూరు మాట్లాడుతూ.. విత్తనాలను వెదజల్లడం, సహజ జీవావరణ వ్యవస్థలను నిలబెట్టడం వంటి కార్యకలాపాల ద్వారా పర్యావరణ సమతుల్యతను కాపాడటంలోనూ, జీవవైవిధ్యాన్ని పరిరక్షించడంలోనూ పక్షులు కీలక పాత్ర పోషిస్తాయని అన్నారు.

ప్రపంచ వారసత్వ వారోత్సవాల్లో భాగంగా టీజీటీడీసీ చారిత్రాత్మక కుతుబ్ షాహీ సమాధుల వద్ద ‘వింగ్స్ ఓవర్ హెరిటేజ్’ పేరుతో ఒక ప్రత్యేక పక్షి వీక్షణ, హెరిటేజ్ వాక్ నిర్వహించనుంది. ఈ వాక్‌లో పక్షులను వీక్షించడంతో పాటు హైదరాబాద్ చారిత్రక, సాంస్కృతిక వారసత్వాన్ని ఆస్వాదించే అవకాశం ఉంటుంది. ఆసక్తి ఉన్నవారు రిజిస్ట్రేషన్, మరిన్ని వివరాల కోసం 8019249292 నంబరును సంప్రదించవచ్చు. బర్డ్ వాచింగ్ కోసం రూ.200 రిజిస్ట్రేషన్ ఉంటుంది. మెుదటగా రిజిస్ట్రేషన్ చేసుకున్నవారికే అవకాశం ఉంటుంది.