Video : కరీంనగర్‌లో దొంగల బీభత్సం.. జ్యువెలరీ షాపులో తుపాకులతో కాల్పులు జరిపి చోరీ

Karimnagar jewellery shop Theft case : కరీంనగర్‌లో దొంగల బీభత్సం సృష్టించారు. జ్యువెలరీ షాపులో తుపాకులతో కాల్పులు జరిపి చోరీ చేశారు.

కరీంనగర్‌లో పట్టపగలే దొంగల బీభత్సం సృష్టించారు. జ్యోతినగర్‌లోని PMJ జ్యువెలరీ షాపులో తుపాకీలతో లోపలికి చొరబడ్డారు. సిబ్బందిపై కాల్పులు జరిపి, భారీగా బంగారు ఆభరణాలను దోచుకున్నారు. మెుత్తం ఐదుగురు దుండగులు ఉన్నట్టుగా గుర్తించారు. కాల్పులు జరపడంతో పలువురికి గాయాలు అయ్యాయి. క్షతగాత్రులను ఆసుపత్రికి తరలించారు. పలువురి పరిస్థితి విషమంగా ఉన్నట్లు తెలుస్తోంది. ఘటనా స్థలానికి చేరుకుని సీసీటీవీ దృశ్యాల ఆధారంగా నిందితుల కోసం గాలింపు చేపట్టారు పోలీసులు.

కరీంనగర్‌లో దొంగల బీభత్సం

దుండగుల బృందం ఒకటి వినియోగదారుల వేషంలో పీఎంజే నగల దుకాణంలోకి ప్రవేశించింది. క్షణాల్లోనే వారు భయాందోళనలు సృష్టించారు. ఎవరూ ఎదురుతిరగకుండా ఉండేందుకు, ప్రతిఘటనను నివారించేందుకు తుపాకులు బయటకు తీసి కాల్పులు జరపడం ప్రారంభించారు. ఈ గందరగోళంలో నలుగురు సిబ్బందికి తుపాకీ గాయాలయ్యాయి. వారిని అత్యవసర చికిత్స కోసం సమీపంలోని ప్రైవేట్ ఆసుపత్రికి తరలించారు.

కాల్పుల అనంతరం దుండగులు కౌంటర్లను దోచుకుని, నగలను సంచుల్లో నింపుకొని పారిపోయారు. కాల్పుల శబ్దానికి అప్రమత్తమైన స్థానిక నివాసితులు, పొరుగు దుకాణదారులు వెంటనే పోలీసులకు సమాచారం అందించారు. జ్యోతినగర్‌లో తమ ఆధీనంలోకి తీసుకున్నారు పోలీసులు. ప్రాథమిక దర్యాప్తును ప్రారంభించేందుకు ఉన్నతాధికారులు, టాస్క్‌ఫోర్స్ బృందాలు నిమిషాల వ్యవధిలోనే సంఘటనా స్థలానికి చేరుకున్నాయి.

పోలీసులు షోరూమ్‌ నుంచి ఎవరినీ బయటకు పోనివ్వలేదు. దొంగలు పారిపోయిన మార్గాన్ని కనుక్కోవడానికి సీసీటీవీ ఫుటేజీని సమీక్షిస్తున్నారు పోలీసులు. సాక్ష్యాలను సేకరించడానికి ఫోరెన్సిక్ బృందాలను కూడా రంగంలోకి దించారు.

ముఠాను అడ్డగించేందుకు, జిల్లా వ్యాప్తంగా భారీ గాలింపు చర్యలు చేపట్టారు. ఇందులో భాగంగా కీలకమైన ఎగ్జిట్ పాయింట్ల వద్ద చెక్‌పోస్టులను ఏర్పాటు చేశారు. దుకాణ యాజమాన్యం ఎత్తుకెళ్లిన సొమ్ము విలువను లెక్కించాల్సి ఉంది. సొమ్ము జాబితా పూర్తి చేసిన తర్వాత దొంగిలించిన సొమ్ము విలువకు సంబంధించిన వివరాలు వెల్లడయ్యే అవకాశం ఉంది.