TG DOST Spot Admission 2026 :రాష్ట్రంలోని డిగ్రీ కళాశాలల్లో ప్రవేశాల కోసం ఎదురుచూస్తున్న విద్యార్థులకు ఉన్నత విద్యామండలి మరో అవకాశం కల్పించింది. 2026-27 విద్యా సంవత్సరానికి సంబంధించి ప్రత్యేకంగా దోస్త్ స్పాట్ అడ్మిషన్లను చేపట్టనుంది. ఈ మేరకు షెడ్యూల్ ఖరారైంది.
సెప్టెంబర్ 23న అన్ని కళాశాలల నోటీసు బోర్డులలో ఖాళీగా ఉన్న సీట్ల వివరాలను ప్రదర్శిస్తారు. విద్యార్థులు నేరుగా సంబంధిత కళాశాలల్లో గానీ లేదా దోస్త్ అధికారిక వెబ్సైట్ https://dost.cgg.gov.in/ లో గానీ ఖాళీల వివరాలను చూసుకోవచ్చని అధికారులు తెలిపారు.
స్పాట్ అడ్మిషన్ల ప్రక్రియ….
రాష్ట్రంలోని అన్ని ప్రభుత్వ డిగ్రీ కళాశాలలు, విశ్వవిద్యాలయ పరిధిలోని కళాశాలలు, ప్రైవేట్ ఎయిడెడ్ కళాశాలలు (రెగ్యులర్ కోర్సులు), ప్రైవేట్ ఎయిడెడ్ అటానమస్ కళాశాలల్లో (రెగ్యులర్ కోర్సులు) సెప్టెంబర్ 24, 25 తేదీల్లో స్పాట్ అడ్మిషన్లు నిర్వహిస్తారు. స్పాట్ రౌండ్లో ప్రవేశం పొందిన విద్యార్థుల వివరాలను ఆయా విద్యాసంస్థలు సెప్టెంబర్ 26న దోస్త్ పోర్టల్లో అప్లోడ్ చేయాల్సి ఉంటుంది.
ఇక అన్ని రకాల విద్యాసంస్థల్లో మిగిలిపోయిన సీట్ల భర్తీకి సెప్టెంబర్ 28, 29 తేదీల్లో ఆఖరి విడతగా ప్రత్యేక స్పాట్ అడ్మిషన్లు చేపడతారు. ఈ ప్రవేశాల్లో స్థానిక విద్యార్థులకు మొదటి ప్రాధాన్యం ఇస్తారు. ఆ తర్వాతే మిగిలిన సీట్లను నాన్-లోకల్ అభ్యర్థులకు కేటాయిస్తారు. ప్రవేశాలు పొందని విద్యార్థులు ఈ అవకాశాన్ని వినియోగించుకోవాలని ఉన్నతాధికారులు సూచించారు.