త్వరలో మహిళల కోసం ఏసీ బస్సులు కొనుగోలు.. సీఎం చంద్రబాబు హామీ

డబుల్‌ ఇంజిన్‌ సర్కార్‌ జెట్‌ స్పీడ్‌తో దూసుకెళ్తోందని సీఎం చంద్రబాబు అన్నారు. విజయవాడలో 26,401 మందికి ఇళ్ల పట్టాలు అందించామన్నారు.

ఎన్నికల్లో ప్రజలకు ఇచ్చిన ప్రతి వాగ్దానాన్ని నెరవేర్చుకుంటూ కూటమి ప్రభుత్వం జెట్ స్పీడ్‌తో పనిచేస్తోందని ముఖ్యమంత్రి నారా చంద్రబాబు నాయుడు స్పష్టం చేశారు. విజయవాడలో నిర్వహించిన ‘పేదలకు పట్టాభిషేకం’ మహోత్సవంలో పాల్గొన్న ఆయన, లబ్ధిదారులకు ఇళ్ల పట్టాలను పంపిణీ చేశారు. ఒక్క విజయవాడలోనే 26,401 మందికి ఉచితంగా ఇళ్ల పట్టాల రిజిస్ట్రేషన్ పత్రాలను అందజేశారు.

పేదలకు పట్టాభిషేకం కార్యక్రమం

విశాఖపట్నం, మంగళగిరి, విజయవాడ ప్రాంతాల్లో పేదలకు ఇళ్ల పట్టాలు అందించడం తన జీవితంలో మర్చిపోలేని అనుభూతి అని, ఈ రోజు పేదల ఆత్మగౌరవానికి నిజమైన పట్టాభిషేకం జరిగిందని సీఎం సంతోషం వ్యక్తం చేశారు. రాష్ట్రవ్యాప్తంగా దాదాపు 60,000 మంది పేద కుటుంబాలకు ఇళ్ల స్థలాల పట్టాలు అందించినట్లు ముఖ్యమంత్రి వెల్లడించారు.

రిజిస్ట్రేషన్ విలువ ప్రకారం ఇవి రూ.19,000 కోట్లు కాగా, మార్కెట్ విలువ ప్రకారం సుమారు రూ.52,000 కోట్ల విలువైన భూమిని పేదలకు అప్పగించామని చంద్రబాబు తెలిపారు. ప్రతి ఒక్కరికీ సగటున 130 చదరపు గజాల చొప్పున కోటి నుంచి రెండు కోట్ల రూపాయల విలువైన ఆస్తి హక్కులు లభించాయని పేర్కొన్నారు.

ఇది తరతరాలకు ఉపయోగపడే వారసత్వ ఆస్తి అని, ఈ ఇళ్ల స్థలాలను ఎట్టి పరిస్థితుల్లోనూ అమ్ముకోవద్దని, పిల్లల భవిష్యత్తు కోసం శాశ్వత నివాసాలు నిర్మించుకోవాలని లబ్ధిదారులకు చంద్రబాబు సూచించారు. గత వైసీపీ ప్రభుత్వ హయాంలో భూ సర్వే పేరుతో ఊరూరా వివాదాలు సృష్టించి, ప్రజల పాస్‌బుక్కులపై, ఆస్తులపై నాయకుల బొమ్మలు ముద్రించుకున్నారని చంద్రబాబు విమర్శించారు.

తమ ప్రభుత్వంలో ముఖ్యమంత్రిగా తన ఫోటో కానీ, డిప్యూటీ సీఎం పవన్ కళ్యాణ్ ఫోటో కానీ పట్టాలపై ముద్రించలేదని, కేవలం రాష్ట్ర ప్రభుత్వ అధికారిక రాజముద్రతో ఉచితంగా రిజిస్ట్రేషన్లు చేసి అప్పగిస్తున్నామని సీఎం స్పష్టం చేశారు. ప్రజల ఆస్తులకు భద్రత కల్పించేందుకే వివాదాస్పద ల్యాండ్ టైటిలింగ్ చట్టాన్ని రద్దు చేశామని తెలిపారు.

గతంలో అడ్డంకులు ఎదురైనా పట్టిసీమ ప్రాజెక్టు ద్వారా కృష్ణా డెల్టాకు నీటిని అందించి రైతులను ఆదుకున్నామని, ప్రకాశం బ్యారేజీ వద్దకు 490 టీఎంసీల గోదావరి జలాలను మళ్లించామని సీఎం చంద్రబాబు తెలిపారు. పోలవరం లెఫ్ట్ కెనాల్ ద్వారా ఉత్తరాంధ్రకు నీరు అందిస్తున్నామని, రాయలసీమను హార్టికల్చర్ హబ్‌గా మారుస్తున్నామని స్పష్టం చేశారు.

ఈ కార్యక్రమంలో రాష్ట్ర మంత్రులు సత్యకుమార్, నాదేండ్ల మనోహర్, పలువురు శాసనసభ్యులు, ప్రజాప్రతినిధులు, ఉన్నతాధికారులు పాల్గొన్నారు.