AP EDCET Counselling 2026 : రాష్ట్రంలోని వివిధ కళాశాలల్లో బీఈడీ కోర్సుల్లో ప్రవేశాలకు నిర్వహించిన ఏపీ ఎడ్‌సెట్ (AP EDCET - 2026) కౌన్సెలింగ్ రిజిస్ట్రేషన్ల ప్రక్రియ తుది దశకు చేరుకుంది. రిజిస్ట్రేషన్లకు సంబంధించిన ఆన్‌లైన్ ప్రక్రియ ఇవాళ్టితో (అక్టోబర్ 12) ముగియనుంది. బీఈడీ చదవాలనుకునే అభ్యర్థులు చివరి నిమిషం వరకు వేచి చూడకుండా…. సాంకేతిక సమస్యలు ఎదురవక ముందే వెంటనే తమ రిజిస్ట్రేషన్ ప్రక్రియను పూర్తి చేయాలని ఆంధ్రప్రదేశ్ రాష్ట్ర ఉన్నత విద్యామండలి అధికారులు స్పష్టం చేశారు.
ఈనెల 14 నుంచి వెబ్ ఆప్షన్లు - ముఖ్య తేదీలు :
- వెబ్ ఆప్షన్ల నమోదు : ఈ నెల 14వ తేదీ నుంచి 18వ తేదీ వరకు అభ్యర్థులు తమకు కావాల్సిన కళాశాలలను వెబ్ ఆప్షన్ల ద్వారా ఎంచుకోవచ్చు.
- ఆప్షన్ల మార్పు (ఎడిట్ ): నమోదు చేసుకున్న వెబ్ ఆప్షన్లలో ఏవైనా మార్పులు చేయాలనుకుంటే ఈ నెల 19న అవకాశం కల్పిస్తారు.
- సీట్ల కేటాయింపు : అభ్యర్థులు సాధించిన ర్యాంకు, రిజర్వేషన్లు, ఎంచుకున్న వెబ్ ఆప్షన్ల ప్రాతిపదికన ఈ నెల 23వ తేదీన సీట్లు కేటాయిస్తారు.
- రిపోర్టింగ్ - తరగతుల ప్రారంభం : సీట్లు పొందిన అభ్యర్థులు ఈ నెల 24 నుంచి 28 మధ్య సంబంధిత కళాశాలల్లో నేరుగా హాజరై రిపోర్ట్ చేయాల్సి ఉంటుంది. మరోవైపు…. ఈ నెల 24వ తేదీ నుంచే కళాశాలల్లో రెగ్యులర్ తరగతులు ప్రారంభమవుతాయి.
కౌన్సెలింగ్‌కు కావాల్సిన ముఖ్యమైన సర్టిఫికెట్లు…
అభ్యర్థులు సర్టిఫికెట్ పరిశీలన మరియు అడ్మిషన్ ప్రక్రియ కోసం కింద సూచించిన పత్రాలను సమర్పించాల్సి ఉంటుంది.
- డిగ్రీ / పీజీ ప్రొవిజనల్ సర్టిఫికేట్ మరియు మార్కుల జాబితా
- 10వ తరగతి (SSC) మరియు ఇంటర్మీడియట్ మార్కుల మెమోలు
- 9వ తరగతి నుంచి డిగ్రీ వరకు స్టడీ / బోనాఫైడ్ సర్టిఫికెట్లు
- నివాస ధ్రువీకరణ పత్రం
- కుల ధ్రువీకరణ పత్రం
- ఆదాయ ధ్రువీకరణ పత్రం
- ఈడబ్ల్యూఎస్ సర్టిఫికేట్ (EWS Certificate - వర్తించే వారికి మాత్రమే)
- ట్రాన్స్‌ఫర్ సర్టిఫికేట్
- ఇటీవల దిగిన పాస్‌పోర్ట్ సైజ్ ఫోటోలు మరియు ఆధార్ కార్డ్
విద్యార్థులు కౌన్సెలింగ్ షెడ్యూల్, కళాశాలల వివరాలు, ఇతర సమాచారం కోసం ఎప్పటికప్పుడు అధికారిక వెబ్‌సైట్‌ ( https://edcet.tgche.ac.in/ ) ను సందర్శించాలని అధికారులు సూచించారు.