ఏపీ పట్టణ స్థానిక సంస్థల ఎన్నికలు.. కూటమి సీట్ల పంపకాలు పూర్తి.. ఏ పార్టీకి ఎన్ని?

ఆంధ్రప్రదేశ్‌ స్థానిక సంస్థల ఎన్నికలకు సిద్ధమైంది. కూటమిలోని బీజేపీ, టీడీపీ, జనసేన కూడా సీట్ల పంపకాలు పూర్తి చేసుకున్నాయి. క్షేత్రస్థాయిలో ఒకరికొకరు సహకరించుకోవాలని పార్టీల నుంచి స్పష్టమైన ఆదేశాలు వెళ్లాయి.

ఏపీ స్థానిక సంస్థల ఎన్నికల సమరంలో అధికార కూటమి(టీడీపీ-జనసేన-బీజేపీ) సీట్ల సర్దుబాటు ప్రక్రియ విజయవంతంగా ముగిసింది. కొన్నిరోజులుగా సాగిన సుదీర్ఘ చర్చల అనంతరం మూడు పార్టీలు ఒక కొలిక్కి వచ్చాయి. క్షేత్రస్థాయి నాయకులు, శ్రేణుల ఆకాంక్షలతో పాటు రాజకీయ సమీకరణాలను ప్రాతిపదికగా తీసుకుని పొత్తును ఖరారు చేశారు.

కూటమి సీట్ల పంపకాలు

రాష్ట్రవ్యాప్తంగా ఉన్న 123 పట్టణ స్థానిక సంస్థల్లో కూటమిలోని పార్టీలు సీట్లను పంచుకున్నాయి. తెలుగుదేశం పార్టీ 89 స్థానాలు, జనసేన పార్టీ 25 స్థానాలు (మొత్తం వాటాలో 20.33 శాతం), భారతీయ జనతా పార్టీ 9 స్థానాలు (మొత్తం వాటాలో 7.32 శాతం) చొప్పును సీట్ల పంపకాలు జరిగాయి.

ఇక ఏ కార్పొరేషన్ ఏ పార్టీకి అని చూసుకుంటే.. 17 మేయర్ పీఠాలను స్థానికంగా ఓటుబ్యాంక్, ఇతర లెక్కల ఆధారంగా పంపకాలు చేసుకున్నారు.

తెలుగుదేశం పార్టీ 11 కార్పొరేషన్‌లో పోటీ చేయనుంది. విజయనగరం, విశాఖపట్నం, మచిలీపట్నం, మంగళగిరి-తాడేపల్లి, గుంటూరు, ఒంగోలు, నెల్లూరు, కర్నూలు, కడప, తిరుపతి, చిత్తూరులో పోటీ చేస్తుంది.

జనసేన పార్టీ 4 స్థానాల్లో శ్రీకాకుళం, కాకినాడ, ఏలూరు, విజయవాడలో మేయర్ పీఠాలు దక్కించుకోనుంది. ఇక భారతీయ జనతా పార్టీ 2 రాజమహేంద్రవరం, అనంతపురంలో బరిలో దిగనుంది.

మున్సిపాలిటీలు, నగర పంచాయతీలు చూసుకుంటే.. తెలుగుదేశం పార్టీ 78 స్థానాలు, జనసేన పార్టీ 21 స్థానాలు, బీజేపీ 7 చోట్ల పోటీ చేయనున్నాయి. మేయర్ లేదా ఛైర్మన్ పదవిని ఒక పార్టీ దక్కించుకుంటే, వైస్ ఛైర్మన్ / డిప్యూటీ మేయర్ పోస్టును కూటమిలోని మరొక పార్టీకి కేటాయించేందుకు పరస్పర అంగీకారం కుదిరింది.

చంద్రబాబు, పవన్ కళ్యాణ్ స్థానిక నాయకత్వాల అభిప్రాయాలను పరిగణనలోకి తీసుకుంటూ సామరస్య పూర్వకంగా ఇచ్చిపుచ్చుకునే ధోరణిలో సమస్యలను పరిష్కరించారు. మున్సిపల్ కార్పొరేషన్లు, మున్సిపాలిటీల ప్రధాన అభ్యర్థుల ప్రకటన శుక్రవారం నుంచి ప్రారంభమవుతుంది.

కార్పొరేటర్, కౌన్సిలర్ అభ్యర్థుల ఎంపిక ప్రక్రియను జిల్లాల్లోనే పూర్తిచేస్తారు. జిల్లా అధ్యక్షులు, ఎమ్మెల్యేలు, ఇన్‌ఛార్జులు సమావేశమై శుక్ర, శనివారాల్లో వార్డుల కేటాయింపును ఆమోదిస్తారు. కూటమిలోని పార్టీకి సంపూర్ణంగా సహకారం అందించాలని పైనుంచి స్పష్టమైన ఆదేశాలు జారీ అయ్యాయి.