కలియుగ వైకుంఠమైన తిరుమల శ్రీవారి ఆలయంలో దీపావళి పర్వదినాన్ని పురస్కరించుకుని నవంబర్ 8వ తేదీన దీపావళి ఆస్థానాన్ని అత్యంత వైభవంగా, శాస్త్రోక్తంగా నిర్వహించేందుకు తిరుమల తిరుపతి దేవస్థానం (టీటీడీ) అన్ని ఏర్పాట్లు పూర్తి చేస్తోంది.
ఘంటా మండపంలో స్వామివారి ఆస్థానం
పండుగ రోజున ఉదయం 7 గంటల నుంచి 9 గంటల వరకు ఆలయంలోని బంగారు వాకిలి ముందు ఉన్న ఘంటా మండపంలో ఈ దీపావళి ఆస్థాన వేడుక జరుగుతుంది. ఈ విశేష ఆస్థానంలో భాగంగా శ్రీదేవి, భూదేవి సమేత శ్రీమలయప్పస్వామి వారు ఘంటా మండపంలో ప్రత్యేకంగా ఏర్పాటు చేసిన సర్వభూపాల వాహనంపై గరుడాళ్వార్‌కు అభిముఖంగా వేంచేపు చేస్తారు.
అలాగే స్వామివారి సేనాధిపతి అయిన శ్రీ విష్వక్సేనులవారిని కూడా స్వామివారికి ఎడమ పక్కన మరొక పీఠంపై దక్షణ దిశకు అభిముఖంగా వేంచేపు చేస్తారు. అనంతరం స్వామివార్లకు అర్చకులు వైఖానస ఆగమ నిబంధనల ప్రకారం ప్రత్యేక పూజలు, దివ్య హారతి, విశేష ప్రసాద నివేదనలను అత్యంత భక్తిశ్రద్ధలతో నిర్వహిస్తారు. వీటితో ఉదయం పూట జరిగే దీపావళి ఆస్థాన ఘట్టం పూర్తవుతుంది.
నాలుగు మాడ వీధుల్లో శ్రీవారి విహారం…
సాయంత్రం 5 గంటలకు శ్రీదేవి, భూదేవి సమేత శ్రీ మలయప్పస్వామివారు సహస్ర దీపాలంకరణ సేవలో పాల్గొంటారు. సహస్ర దీపాల కాంతిలో మెరిసిపోయే స్వామివారు, ఆ తర్వాత తిరుమల ఆలయ నాలుగు మాడ వీధుల్లో విహరిస్తూ భక్తులకు దివ్య దర్శనమిచ్చి కటాక్షించనున్నారు.
ఆర్జిత సేవలు రద్దు…
దీపావళి ఆస్థానం వేడుకల నేపథ్యంలో నవంబర్ 8న ఆలయంలో జరిగే పలు నిత్య ఆర్జిత సేవలను టీటీడీ రద్దు చేసింది. ఇందులో భాగంగా కల్యాణోత్సవం, ఊంజల్ సేవ, ఆర్జిత బ్రహ్మోత్సవం సేవలను పూర్తిస్థాయిలో రద్దు చేస్తున్నట్లు అధికారులు వెల్లడించారు. అలాగే తోమాల సేవ, అర్చన సేవలను భక్తుల సమక్షంలో కాకుండా ఏకాంతంగా నిర్వహించనున్నారు. శ్రీవారి దర్శనానికి వచ్చే భక్తులు ఈ మార్పులను గమనించి తమ తిరుమల ప్రయాణాన్ని ప్రణాళిక చేసుకోవాలని టీటీడీ కోరింది.