బంగాళాఖాతంలో వాయుగుండం.. రాబోయే 4 రోజులు ఏపీకి భారీ వర్ష సూచన!

బంగాళాఖాతంలో వాయుగుండం కారణంగా రాబోయే 4 రోజులు ఏపీకి భారీ వర్ష సూచన ఉందని వాతావరణ శాఖ వెల్లడించింది. ప్రజలు అప్రమత్తంగా ఉండాలని తెలిపింది.

బంగాళాఖాతంలో ఏర్పడిన అల్పపీడనం మంగళవారం వాయుగుండంగా మారనుంది. దీంతో ఆంధ్రప్రదేశ్‌లో భారీ వర్షాలు కురిసే అవకాశం ఉంది. వాయుగుండం ప్రభావంతో రాబోయే 4 రోజులు కోస్తాంధ్రతో పాటు పరిసర జిల్లాల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ హెచ్చరించింది. ప్రజలు, మత్స్యకారులు అత్యంత జాగ్రత్తగా ఉండాలని విపత్తుల నిర్వహణ సంస్థ (APSDMA) ముందస్తు సూచనలు జారీ చేసింది.

వెదర్ అప్డేట్

22వ తేదీ ఉత్తర కోస్తా జిల్లాలైన శ్రీకాకుళం, విజయనగరం, పార్వతీపురం మన్యం, విశాఖపట్నం, అల్లూరి సీతారామరాజు, అనకాపల్లి, కాకినాడ జిల్లాల్లో ఆరెంజ్ అలర్ట్ జారీ చేశారు. ఈ ప్రాంతాల్లో మోస్తరు నుంచి భారీ వర్షాలు కురిసే సూచనలు ఉన్నాయి.

23వ తేదీ వర్షాల తీవ్రత పెరిగే అవకాశం ఉంది. డాక్టర్ బీఆర్ అంబేడ్కర్ కోనసీమ, తూర్పు గోదావరి, పశ్చిమ గోదావరి, కృష్ణా జిల్లాలు, యానాం ప్రాంతాలకు రెడ్ అలర్ట్ ప్రకటించారు. శ్రీకాకుళం, విజయనగరం, పార్వతీపురం మన్యం, విశాఖ, అల్లూరి, అనకాపల్లి, కాకినాడ జిల్లాలకు కూడా హెచ్చరిక కొనసాగుతుంది.

24వ తేదీ కోనసీమ, తూర్పు గోదావరి, పశ్చిమ గోదావరి, ఏలూరు, యానాంలో కూడా వర్షాలు పడనున్నాయి. అందుకే రెడ్ అలర్ట్ ఇచ్చారు. ఇక అల్లూరి సీతారామరాజు, అనకాపల్లి, కృష్ణా జిల్లాలకు ఆరెంజ్ అలర్ట్ అమల్లో ఉంటుంది.

ఇక రాబోయే 4 రోజులు సముద్రం అల్లకల్లోలంగా మారనున్నందున, వేటకు వెళ్లకూడదని, ఇప్పటికే సముద్రంలో ఉన్నవారు తక్షణమే తీరానికి తిరిగిరావాలని అధికారులు స్పష్టం చేశారు. అలర్ట్ ఉన్న ప్రాంతాల్లో అనవసర ప్రయాణాలను వాయిదా వేసుకోవడం సురక్షితమని చెప్పారు.

తిరుపతిలో సోమవారం మధ్యాహ్నం (సెప్టెంబర్ 21, 2026) రెండు గంటల కంటే తక్కువ సేపు కురిసిన ఎడతెరిపి లేని వర్షం ఎండ నుండి ఎంతో ఉపశమనాన్ని కలిగించినప్పటికీ, నగరంలోని కొన్ని ప్రాంతాలను ముంచెత్తింది. లోతట్టు ప్రాంతాలు రాత్రి పొద్దుపోయే వరకు జలమయమయ్యాయి.

ఈ ఆకస్మిక వర్షం రైల్వే స్టేషన్, ఏపీఎస్ఆర్టీసీ సెంట్రల్ బస్ స్టేషన్, పాత మున్సిపల్ కార్పొరేషన్ కార్యాలయం, తాతాయగుంట గంగమ్మ గుడి, గ్రూప్ థియేటర్లు వంటి వర్షపు నీటితో ఇబ్బందులు ఎదురయ్యాయి. వాహనాల రాకపోకలు పూర్తిగా నిలిచిపోవడంతో వాహనదారులు, పాదచారులు మోకాలి లోతు నీటిలో నడవవలసి వచ్చింది. భారీ వర్షం కంటే, మురుగునీటి కాలువల్లో పేరుకుపోయిన పూడిక, చెత్తే సమస్యకు కారణమని, దానివల్ల బురద నీరు రోడ్లపైకి పొంగిపొర్లుతోందని స్థానికులు ఆరోపించారు.