‘మురసు’ తీవ్ర తుపాను తుఫాన్ ఇవాళ ఉదయం 5:30 గంటలకు తీరం దాటింది. ఈ తుపానుకు సంబంధించిన వెనుక భాగం (Rear end) తీరం దాటే ప్రక్రియ ఇంకా కొనసాగుతోందని అమరావతి వాతావరణ కేంద్రం వెల్లడించింది.
గడిచిన ఆరు గంటల్లో దక్షిణ కోస్తాంధ్రపై కేంద్రీకృతమై ఉన్న ఈ తీవ్ర తుఫాన్…. గంటకు 8 కిలోమీటర్ల వేగంతో ఉత్తర-ఉత్తర పశ్చిమ దిశగా పయనించింది. మంగళవారం ఉదయం 8:30 గంటల సమయానికి ఇది అదే ప్రాంతంలో స్థిరపడి ఉంది.
ఈ తీవ్ర తుఫాన్ మరింతగా ఉత్తర - ఉత్తర పశ్చిమ దిశగా కదులుతూ మంగళవారం మధ్యాహ్నానికి క్రమంగా బలహీనపడి సాధారణ తుపానుగా మారే అవకాశం ఉందని వాతావరణశాఖ తెలిపింది. ఆ సమయంలో తీరం వెంట గంటకు 90 కిలోమీటర్ల నుంచి గరిష్టంగా 100 కిలోమీటర్ల వేగంతో బలమైన ఈదురుగాలులు వీచే ప్రమాదం ఉందని హెచ్చరించింది. ఆ తర్వాత మంగళవారం అర్ధరాత్రి నాటికి ఇది మరింత బలహీనపడి ‘తీవ్ర వాయుగుండం’గా మారనుందని…. ఆ సమయంలో గంటకు 75 కిలోమీటర్ల వేగంతో గాలులు వీస్తాయని అధికారులు అంచనా వేశారు.
వణికిపోతున్న దక్షిణ కోస్తాంధ్ర
తుఫాన్ ప్రభావంతో దక్షిణ కోస్తాంధ్ర…. జిల్లాల్లో రాబోయే 12 గంటల పాటు అత్యంత భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. ఇప్పటికే పలు జిల్లాల్లో రికార్డు స్థాయిలో వర్షపాతం నమోదైంది.
సోమవారం ఉదయం 8:30 గంటల నుండి మంగళవారం ఉదయం 8:30 గంటల వరకు నమోదైన వర్షపాతం వివరాలు:
- బాపట్ల: 222.4 మిమీ
- నరసాపురం: 198.6 మిమీ
- ఒంగోలు: 120.2 మిమీ
- మచిలీపట్నం: 83.9 మిమీ
- బండ్రవెల: 75 మిమీ
- పుదుచ్చేరి: 65.4 మిమీ
- చిలకపాడులో 104.50 మిమీ,
- సంతనూతలపాడు 98.7మిమీ,
- పశ్చిమగోదావరి (జి) మొగల్తూరులో 96మిమీ,
- కోనసీమ(జి) మలికిపురం 93.7మిమీ వర్షపాతం నమోదు