E-Paper
గోదావరి వద్ద స్వల్పంగా తగ్గిన వరద ఉధృతి - ఈ జిల్లాలకు వర్ష సూచన
గోదావరి నదిలో వరద నీటి మట్టం స్వల్పంగా తగ్గింది. ధవళేశ్వరం బ్యారేజి వద్ద ఇన్ ఫ్లో, ఔట్ ఫ్లో 9.71లక్షల క్యూసెక్కులుగా నిలకడగా కొనసాగుతోంది.
Prefer HTon Google
గోదావరి నదిలో వరద ప్రవాహం సోమవారం సాయంత్రానికి స్వల్పంగా తగ్గుముఖం పట్టింది. ఎగువ ప్రాంతాల నుంచి వస్తున్న వరద ఉధృతి క్రమంగా తగ్గుతుండటంతో వివిధ ప్రాంతాల్లో నీటి మట్టాలు నమోదు అవుతున్నాయి. అధికారులు తెలిపిన వివరాల ప్రకారం….. సోమవారం సాయంత్రానికి భద్రాచలం వద్ద గోదావరి నీటి మట్టం 36.4 అడుగులకు చేరగా, కూనవరం వద్ద 17.8 మీటర్లు, పోలవరం వద్ద 11.7 మీటర్ల నీటిమట్టం నమోదైంది.
ధవళేశ్వరం కాటన్ బ్యారేజీ వద్ద వరద నీటి ప్రవాహం ప్రస్తుతం నిలకడగా ఉంది. బ్యారేజీ వద్ద ఇన్ ఫ్లో, ఔట్ ఫ్లో సమానంగా 9.71 లక్షల క్యూసెక్కులుగా నమోదైనట్లు అధికారులు తెలిపారు. సోమవారం రాత్రి నుంచి నదిలో వరద ఉధృతి మరింతగా తగ్గే అవకాశం ఉందని ఏపీ విపత్తుల నిర్వహణ సంస్థ అంచనా వేసింది. అయితే… నదిలో వరద పూర్తిగా తగ్గుముఖం పట్టే వరకు లోతట్టు ప్రాంతాల్లో నివసించే ప్రజలు, తీర ప్రాంత వాసులు తీవ్ర అప్రమత్తతతో ఉండాలని అధికారులు సూచిస్తున్నారు.
వరద నీరు ఉప్పొంగి ప్రవహిస్తున్న వాగులు, వంకలు, కలవర్టులు మరియు కాజ్వేలను దాటేందుకు ఎవరూ ప్రయత్నించవద్దని, ప్రమాదకరమైన రీతిలో ప్రయాణాలు చేయవద్దని అధికారులు హెచ్చరించారు. లోతట్టు ప్రాంతాల ప్రజలు సురక్షిత ప్రాంతాల్లోనే ఉండాలని, స్థానిక యంత్రాంగం ఇచ్చే సూచనలను తప్పనిసరిగా పాటించాలని కోరారు.
పలు జిల్లాలకు వర్ష సూచన
ఇవాళ (సెప్టెంబర్ 29, 2026) రాష్ట్రంలోని పలు జిల్లాల్లో వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. పార్వతీపురం మన్యం, అనకాపల్లి, డాక్టర్ బి.ఆర్. అంబేడ్కర్ కోనసీమ, అనంతపురం, శ్రీసత్యసాయి, మరియు వైఎస్సార్ కడప జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశముందని పేర్కొంది. మిగిలిన ఉత్తరాంధ్ర, రాయలసీమ జిల్లాల్లో చెదురుమదురుగా తేలికపాటి వర్షాలు పడొచ్చని, ప్రజలు తగిన జాగ్రత్తలు తీసుకోవాలని విజ్ఞప్తి చేసింది.
ఇక తెలంగాణలో ఇవాళ పలు జిల్లాల్లో వర్షాలు పడే అవకాశం ఉంది. ఈ మేరకు ఎల్లో హెచ్చరికలు జారీ అయ్యాయి. భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, నాగర్ కర్నూల్, వనపర్తి, జోగులాంబ గద్వాల్ జిల్లాల్లో అక్కడక్కడా వర్షాలు కురిసే సూచనలున్నాయి.
సెప్టెంబర్ 30 ఉదయం నుంచి అక్టోబర్ 2 ఉదయం వరకు రాష్ట్రంలో పొడి వాతావరణం ఏర్పడే అవకాశం ఉన్పప్పటికీ, అక్టోబర్ 2 నుంచి మళ్లీ తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ అంచనా వేసింది.
