ఆంధ్రప్రదేశ్‌లోని 13 జిల్లాలకు ఫ్లాష్ ఫ్లడ్స్.. వచ్చే వారం రోజుల వర్ష సూచన ఇదే!

అర్నబ్ తుపాను కారణంగా ఆంధ్రప్రదేశ్‌లోని 13 జిల్లాలకు మోస్తరు నుంచి అధిక స్థాయి ఆకస్మిక వరదల ప్రమాదం ఉందని ఐఎండీ హెచ్చరించింది. మరోవైపు వారం రోజుల వాతావరణ అప్డేట్ ఇచ్చింది.

అర్నబ్ తుపాన్(Cyclone Arnab) ప్రభావంతో ఆంధ్రప్రదేశ్ ముప్పును ఎదుర్కొంటోంది. రాష్ట్రంలోని 13 జిల్లాలు, యానాం ప్రాంతాలకు వ్యాపించేలా గురువారం ఉదయం 5.30 గంటల వరకు స్వల్పం నుండి తీవ్ర స్థాయి ఫ్లాష్ ఫ్లడ్ (ఆకస్మిక వరదలు) వచ్చే ప్రమాదం ఉందని భారత వాతావరణ శాఖ(IMD) పరిధిలోని తుపాన్ హెచ్చరికల కేంద్రం అత్యవసర హెచ్చరికలు జారీ చేసింది.

ఏపీ ఫ్లాష్ ఫ్లడ్స్

వాతావరణ శాఖ ప్రకారం పలు ప్రాంతాల్లో ఆకస్మిక వరదలు, జలాశయాలకు నీరు వచ్చే అవకాశం ఉంది. బాపట్ల, గుంటూరు, ఎన్టీఆర్, కృష్ణా, ఏలూరు, తూర్పు గోదావరి, కాకినాడ, అల్లూరి సీతారామరాజు, విశాఖపట్నం, అనకాపల్లి, విజయనగరం, పార్వతీపురం మన్యం, పశ్చిమ గోదావరితోపాటుగా యానాం ప్రాంతాల్లో ఫ్లాష్ ఫ్లడ్స్ వచ్చే అవకాశం ఉంది. లోతట్టు ప్రాంతాలు జలమయమవ్వడంతో నివాసిత ప్రాంతాల్లోకి నీరు చేరే ప్రమాదం ఉందని నిపుణులు అప్రమత్తం చేశారు.

బుధవారం ఉదయం 8.00 గంటల సమయానికి అర్నబ్ తుపాన్ తీరం దాటింది. వచ్చే 48 గంటల్లో ఇది ఉత్తర-వాయవ్య దిశగా పయనిస్తూ క్రమంగా బలహీనపడనుంది. తదుపరి 6 గంటల్లో సాధారణ తుపాన్‌గా ఆ తర్వాత మరో 6 గంటల్లో వాయుగుండంగా మారుతుందని అమరావతి వాతావరణ కేంద్రం డైరెక్టర్ వెల్లడించారు.

బుధవారం ఉదయం 8:30 గంటల వరకు నమోదైన గాలి వేగం, వర్షపాతం వివరాలు చూస్తే..గాలి వేగం మచిలీపట్నం – 96 కి.మీ/గంట, విశాఖపట్నం, కాకినాడ – 80 కి.మీ/గంట, కళింగపట్నం – 70 కి.మీ/గంట, బాపట్ల – 45 కి.మీ/గంట, కావలి – 32 కి.మీలుగా గంటకు వేగం ఉంది.

రికార్డు స్థాయిలో వర్షపాతం నమోదైంది. విజయనగరం జిల్లా గరివిడి 26 సెంటీమీటర్లు, అనకాపల్లి, శృంగవరపు కోట, వేపాడ, చీపురుపల్లిలో 25 సెంటీమీటర్లు, భీమునిపట్నం, మెంటాడ, ఎలమంచిలిలో 24 సెంటీమీటర్లు, గంట్యాడ, రణస్థలంలో 23 సెంటీమీటర్లు, గజపతినగరం, నెల్లిమర్ల, విశాఖపట్నం సిటీ, మెరకముడిదాంలో 22 సెంటీమీటర్లు, చోడవరం, బొండపల్లిలో 21 సెంటీమీటర్లుగా వర్షాపాతం నమోదైంది.

ఏడు రోజుల వర్ష సూచన

అక్టోబర్ 29 (గురువారం) కోస్తాంధ్ర, యానాం ప్రాంతాల్లో కొన్నిచోట్ల భారీ వర్షాలు, రాయలసీమతో పాటు కోస్తాలో ఉరుములు, మెరుపులతో కూడిన వర్షం పడే అవకాశం ఉంది.

అక్టోబర్ 30 నుంచి నవంబర్ 3 వరకు ఈ రోజుల్లో ఉరుములు, మెరుపులతో కూడిన వానలు పడతాయి. నవంబర్ 1, 2, 3 తేదీల్లో పలు ప్రాంతాల్లో వర్షాలు ఎక్కువగా కురిసే అవకాశముంది. నవంబర్ 1 వరకు గంటకు 50 కి.మీ వేగంతో బలమైన ఈదురుగాలులు వీస్తాయి. అక్టోబర్ 29 ఉదయం నుంచి అక్టోబర్ 30 ఉదయం వరకు ఏపీ, ఒడిశా, పశ్చిమ బెంగాల్, ఉత్తర తమిళనాడు తీరాల్లో 50 నుండి 60 కి.మీ వేగంతో గాలులు వీస్తాయని అధికారులు హెచ్చరించారు.

అర్నబ్‌ తుపాన్ సృష్టించిన నష్టంపై కేంద్ర హోంమంత్రి అమిత్ షాకు లేఖ రాసిన అనంతరం ముఖ్యమంత్రి నారా చంద్రబాబు నాయుడు ఆయన్ను ఫోన్‌లో సంప్రదించారు. రాష్ట్రంలో విపత్తు పరిస్థితి, నష్ట తీవ్రతను వివరించిన సీఎం, ముంపు ప్రాంతాల్లో తక్షణ రక్షణ, పునరావాసం, పునర్నిర్మాణ చర్యలు చేపట్టడానికి కేంద్ర ప్రభుత్వం నుంచి తగిన ఆర్థిక, సహాయక బృందాల మద్దతును అందించాలని విజ్ఞప్తి చేశారు.