రాబోయే 3 గంటల్లో వర్షాలు... నెల్లూరుకు ఆరెంజ్ అలెర్ట్, ఈ జిల్లాలకు ఎల్లో అలెర్ట్

ఆంధ్రప్రదేశ్‌లోని పలు జిల్లాల్లో రాబోయే మూడు గంటల్లో పిడుగులతో కూడిన వర్షాలు కురిసే అవకాశం ఉంది. నెల్లూరు జిల్లాకు ఆరెంజ్ అలెర్ట్, గుంటూరు, పల్నాడు జిల్లాలకు ఎల్లో అలెర్ట్ జారీ చేశారు.

ఆంధ్రప్రదేశ్‌లో వాతావరణం ఒక్కసారిగా మారిపోయింది. రాష్ట్రంలోని పలు జిల్లాల్లో రాబోయే మూడు గంటల వ్యవధిలో పిడుగులతో కూడిన వర్షాలు కురిసే అవకాశం ఉందని వాతావరణ శాఖ హెచ్చరించింది. ఈ మేరకు ప్రభావిత జిల్లాల ప్రజలను అధికారులు అప్రమత్తం చేశారు.

నెల్లూరుకు ఆరెంజ్ అలెర్ట్

నెల్లూరు జిల్లాకు ఆరెంజ్ అలెర్ట్…..

నెల్లూరు జిల్లాలోని పలు ప్రాంతాల్లో ఉరుములు, మెరుపులు మరియు పిడుగులతో కూడిన మోస్తరు వర్షాలు కురుస్తాయని అధికారులు అంచనా వేశారు. దీంతో ఈ జిల్లాకు ఆరెంజ్ అలెర్ట్ ప్రకటిస్తూ తీవ్ర హెచ్చరికలు జారీ చేశారు.

ముఖ్యంగా జిల్లాలోని ఆత్మకూరు, సంగం, చేజర్ల, పల్లకొండ, పొదలకూరు, నెల్లూరు నగరం, రాపూరు, కొవ్వూరు పరిసర ప్రాంతాలలో పిడుగులతో కూడిన మోస్తరు నుంచి భారీ వర్షాలు కురిసే అవకాశం ఉంది. ఈ సమయంలో గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ శాఖ పేర్కొంది.వాతావరణం ఒక్కసారిగా మారనున్న నేపథ్యంలో ప్రజలు బయటకు వచ్చేటప్పుడు తగిన జాగ్రత్తలు తీసుకోవాలని సూచించింది.

ఈ జిల్లాలకు ఎల్లో అలర్ట్….

మరోవైపు గుంటూరు, పల్నాడు జిల్లాలకు వాతావరణ శాఖ ఎల్లో అలెర్ట్ జారీ చేసింది. ఈ జిల్లాల పరిధిలోని పలు ప్రాంతాల్లో చెదురుమదురుగా పిడుగులతో కూడిన తేలికపాటి నుంచి మోస్తరు వర్షాలు కురిసే సూచనలు కనిపిస్తున్నాయి.

వర్షం పడే సమయంలో ఈదురుగాలుల ధాటికి చెట్లు, విద్యుత్ స్తంభాలు కూలిపోయే ప్రమాదం ఉందని ఏపీ విపత్తుల నిర్వహణ సంస్థ పేర్కొంది. పిడుగులు పడే అవకాశం ఉన్నందున వర్షం వచ్చే సమయంలో పొలాల్లో పనిచేసే రైతులు, కూలీలు, పశువుల కాపరులు చెట్ల కింద గానీ, బహిరంగ ప్రదేశాల్లో గానీ నిలబడకూడదని విజ్ఞప్తి చేసింది. సురక్షితమైన భవనాల్లో లేదా ఆశ్రయ ప్రాంతాల్లో ఉండాలని…. అత్యవసరమైతే తప్ప బయటకు రాకపోవడమే మంచిదని స్థానిక యంత్రాంగం సూచించింది.