E-Paper
తొలి విడత పంచాయతీ ఎన్నికల నోటిఫికేషన్ విడుదల.. నవంబర్ 17 వరకు నామినేషన్లు
Grama Panchayat Elections : ఆంధ్రప్రదేశ్‌లో తొలి విడత పంచాయతీ ఎన్నికలకు నోటిఫికేషన్ వెలువడింది. నవంబర్ 17వ తేదీ సాయంత్రం 5 గంటల వరకు నామినేషన్లు స్వీకరిస్తారు.
Prefer HTon Google
ఆంధ్రప్రదేశ్‌లోని గ్రామాల్లో రాజకీయం హీటెక్కింది. రాష్ట్రంలో తొలి విడత గ్రామ పంచాయతీ ఎన్నికలకు (AP Panchayat Elections 2026) రాష్ట్ర ఎన్నికల సంఘం అధికారికంగా నోటిఫికేషన్ విడుదల చేసింది. రాష్ట్ర ఎన్నికల కమిషనర్ అనిల్ చంద్ర పునేఠా ప్రకటించిన షెడ్యూల్ ప్రకారం, రాష్ట్రవ్యాప్తంగా మొత్తం మూడు దశల్లో పంచాయతీ ఎన్నికలను నిర్వహించేందుకు యంత్రాంగం సర్వం సిద్ధం చేసింది.
తొలి విడత ఎన్నికలకు నోటిఫికేషన్ జారీ కావడంతో మొదటి దశ ఎన్నికలు జరిగే గ్రామాల్లో నామినేషన్ల ప్రక్రియ ప్రారంభమైంది. నామినేషన్ల దాఖలుకు తుది గడువు నవంబర్ 17 సాయంత్రం 5:00 గంటల వరకు ఉంది. నామినేషన్ల ఉపసంహరణకు ఆఖరి తేదీ నవంబర్ 21గా నిర్ణయించారు. నవంబర్ 26వ తేదీన పోలింగ్ నిర్వహిస్తారు. నవంబర్ 26న పోలింగ్ ముగిసిన వెంటనే కౌంటింగ్ ప్రారంభమవుతుంది. రీపోలింగ్ అవసరమైతే నవంబర్ 27న నిర్వహిస్తారు.
రాష్ట్రంలోని 13,313 గ్రామ పంచాయతీలలో సర్పంచ్, వార్డు సభ్యుల స్థానాలకు మూడు విడతల్లో ఎన్నికలు జరగనున్నాయి. మొదటి విడత నవంబర్ 26న పోలింగ్, ఫలితాలు ఉంటాయి. రెండో విడత నవంబర్ 16న నోటిఫికేషన్ విడుదల కానుండగా నవంబర్ 20 వరకు నామినేషన్లు స్వీకరిస్తారు. నవంబర్ 24న ఉపసంహరణ గడువు ముగియనుండగా, నవంబర్ 29న పోలింగ్ మరియు ఓట్ల లెక్కింపు నిర్వహిస్తారు.
మూడో విడత నవంబర్ 19న నోటిఫికేషన్ వెలువడనుండగా, నవంబర్ 23 నామినేషన్లకు చివరి తేదీ, నవంబర్ 27న ఉపసంహరణ అనంతరం, డిసెంబర్ 2న తుది విడత పోలింగ్, ఫలితాల వెల్లడి ఉంటుంది.
మున్సిపల్ ఎన్నికలు
మరోవైపు సాంకేతిక, న్యాయపరమైన కారణాలతో గతంలో నిలిచిపోయిన 23 మున్సిపాలిటీలు, నగర పంచాయతీల్లో రాజకీయం వేడెక్కింది. నవంబర్ 26న పోలింగ్ ఉంటుంది. 30వ తేదీన ఓట్లను లెక్కిస్తారు. అనంతరం డిసెంబర్ 3న ఆయా సంస్థలకు మేయర్, ఛైర్‌పర్సన్లు, వైస్ ఛైర్‌పర్సన్ల ఎంపిక కోసం పరోక్ష ఎన్నికలు నిర్వహిస్తారు.
శ్రీకాకుళం, కాకినాడ, రాజమహేంద్రవరం (రాజమండ్రి), మంగళగిరి - తాడేపల్లి మున్సిపల్ కార్పొరేషన్లలో ఎన్నికలు జరగనున్నాయి. ఆముదాలవలస, రాజాం, పాలకొల్లు, భీమవరం, తాడేపల్లిగూడెం, తణుకు, చింతలపూడి, గుడివాడ, తాడిగడప, పొన్నూరు, నర్సరావుపేట, బాపట్ల, కందుకూరు, పొదిలి, కావలి, గూడూరు, అల్లూరు, శ్రీకాళహస్తి, బి.కొత్తకోటలో ఎన్నికలు నిర్వహిస్తారు.
