కలియుగ వైకుంఠమైన తిరుమలలో విఐపి దర్శనాలు, వసతి సౌకర్యాలకు సంబంధించి తిరుమల తిరుపతి దేవస్థానం (టీటీడీ) కీలక ప్రకటన చేసింది. రాష్ట్రంలో స్థానిక సంస్థల ఎన్నికల ప్రక్రియ ప్రారంభమై, ఎన్నికల ప్రవర్తనా నియమావళి (మోడల్ కోడ్ ఆఫ్ కండక్ట్) అమల్లోకి రావడంతో తిరుమలలో ఎలాంటి సిఫార్సు లేఖలను స్వీకరించడం లేదని స్పష్టం చేసింది. ఈ మేరకు మంగళవారం ప్రకటన విడుదల చేసింది.
ఎన్నికల కోడ్ ముగిసే వరకు ఆంక్షలు
ఎన్నికల నియమావళి అమల్లో ఉన్నన్ని రోజులు శ్రీవారి దర్శనం, తిరుమలలో గదుల కేటాయింపు కోసం వివిధ స్థాయిల ప్రజాప్రతినిధులు, అధికారుల నుంచి వచ్చే ప్రతిపాదనలు, వీఐపి సిఫార్సు లేఖలను పూర్తిగా రద్దు చేస్తున్నట్లు టీటీడీ వెల్లడించింది. సాధారణ భక్తులకు ప్రాధాన్యత పెంచడం, ఎన్నికల కోడ్ నిబంధనలను పక్కాగా అమలు చేయడంలో భాగంగా ఈ నిర్ణయం తీసుకున్నారు.
సిఫార్సు లేఖలను అనుమతించకపోయినప్పటికీ, స్వయంగా తిరుమలకు విచ్చేసే ప్రోటోకాల్ ప్రముఖులకు మాత్రమే నిబంధనల ప్రకారం శ్రీవారి దర్శనం మరియు వసతి సౌకర్యాలు కల్పిస్తారు. వీరితో పాటు వచ్చే ఇతర వ్యక్తులకు లేదా వీరి లేఖలపై వచ్చే అనుచరులకు ఈ వెసులుబాటు వర్తించదని అధికారులు స్పష్టత ఇచ్చారు.
ఎన్నికల ప్రవర్తనా నియమావళి అమల్లో ఉన్నంతవరకు ఈ ఆంక్షలు కొనసాగుతాయని తిరుమల తిరుపతి దేవస్థానం స్పష్టం చేసింది. దేశవిదేశాల నుంచి వచ్చే భక్తులు ఈ మార్పును గమనించి…. టీటీడీకి పూర్తిస్థాయిలో సహకరించాలని విజ్ఞప్తి చేసింది.
మరోవైపు తిరుమలలో నవరాత్రి బ్రహ్మోత్సవాలు అత్యంత వైభంగా ముగిశాయి. అక్టోబరు 12 నుంచి 20వ తేదీ వరకు జరిగిన బ్రహ్మోత్సవాల్లో దేశవిదేశాల నుంచి విచ్చేసిన భక్తులకు వాహనసేవలతో పాటు శ్రీవారి మూలమూర్తి దర్శనం కల్పించామని టీటీడీ ఓ ప్రకటనలో పేర్కొందజి. గరుడసేవ రోజున ఉదయం నుంచి భారీ వర్షం కురిసినా భక్తులు భక్తిశ్రద్ధలతో స్వామివారి సేవను వీక్షించారని, వారికి అల్పాహారం, అన్నప్రసాదాలు, బాదం పాలు, సుండలు, జ్యూస్, బిస్కెట్లు అందించామని తెలిపింది.