Bigg Boss: బిగ్ బాస్‌లో దారుణం- ఒళ్లంతా దద్దుర్లు, అందరికీ ఒకే టవల్, రేజర్- ఎలుకలు, పురుగులు- నటి సోనాలి లీగల్ నోటీసులు!

Sonali Raut Complaints Bigg Boss 6 Marathi: బిగ్ బాస్ మరాఠీ సీజన్ 6 కంటెస్టెంట్, నటి సోనాలి రౌత్ తాజాగా సంచలన ఆరోపణలు చేశారు. బిగ్ బాస్ హౌస్‌లోని అపరిశుభ్ర వాతావరణం వల్ల తనకు తీవ్రమైన చర్మ వ్యాధి సోకిందని ఆవేదన వ్యక్తం చేస్తూ వీడియో విడుదల చేశారు. ఇప్పుడు ఈ వీడియో సోషల్ మీడియాలో చక్కర్లు కొడుతోంది.

Sonali Raut About Bigg Boss Marathi 6: టెలివిజన్ రియాలిటీ షో 'బిగ్ బాస్' అంటేనే వివాదాలకు కేరాఫ్ అడ్రస్. అయితే ఈసారి బిగ్ బాస్ మరాఠీ 6వ సీజన్ తీవ్ర విమర్శల పాలవుతోంది. నటి సోనాలి రౌత్ తన సోషల్ మీడియా ఖాతాలో పోస్ట్ చేసిన ఒక వీడియో ఇప్పుడు ఇండస్ట్రీలో కలకలం రేపుతోంది.

బిగ్ బాస్‌లో దారుణం- ఒళ్లంతా దద్దుర్లు, అందరికీ ఒకే టవల్, రేజర్- ఎలుకలు, పురుగులు- నటి సోనాలి లీగల్ నోటీసులు!

ఆ వీడియోలో సోనాలి రౌత్ శరీరంపై ఉన్న ఎర్రటి దద్దుర్లు, స్కిన్ ఇన్‌ఫెక్షన్ స్పష్టంగా కనిపిస్తున్నాయి. ఏప్రిల్ 17న షేర్ చేసిన ఈ వీడియో చూసి అభిమానులు షాక్‌కు గురవుతున్నారు. హౌస్‌లో ఉన్నప్పుడు సరైన జాగ్రత్తలు తీసుకోకపోవడం వల్లే తన పరిస్థితి ఇలా తయారైందని సోనాలి ఆరోపించారు.

వంటింట్లో ఎలుకలు.. అపరిశుభ్రతకు పరాకాష్ట

బిగ్ బాస్ హౌస్ బయటకి కనిపించేంత కలర్‌ఫుల్‌గా లోపల లేదని సోనాలి రౌత్ కుండబద్దలు కొట్టారు. ప్రేక్షకులు టీవీలో చూసేదానికి, వాస్తవానికి చాలా తేడా ఉంటుందని ఆమె పేర్కొన్నారు. వంటింట్లో ఎలుకలు, పురుగులు తిరుగుతున్నా పట్టించుకునే నాథుడే లేడని సోనాలి విమర్శించారు. కనీసం కడుపు నిండా తిండి కూడా పెట్టలేదని, నిద్ర లేకుండా వేధించారని సోనాలి ఆవేదన వ్యక్తం చేశారు.

"బిగ్ బాస్ హౌస్‌లో ఉండటం నాకు ఒక పీడకలలా అనిపించింది. కేవలం వినోదం పేరుతో మనుషుల ప్రాణాలతో, ఆరోగ్యంతో ఆడుకోవడం సరైంది కాదు" అని సోనాలి రౌత్ మండిపడ్డారు.

ఒకే టవల్.. ఒకే రేజర్.. వ్యక్తిగత పరిశుభ్రత సున్నా!

హౌస్‌లో కంటెస్టెంట్ల మధ్య వ్యక్తిగత వస్తువుల వినియోగం విషయంలో తీవ్ర అశ్రద్ధ వహించారని సోనాలి తెలిపారు. టవల్స్, రేజర్లు వంటి వ్యక్తిగత వస్తువులను కూడా అందరూ పంచుకోవాల్సిన దుస్థితి కల్పించారని, దీనివల్లే ఒకరి నుంచి ఒకరికి అంటువ్యాధులు సోకుతున్నాయని సోనాలి వివరించారు.

సరైన పారిశుద్ధ్యం లేని వాష్‌రూమ్‌లను వాడటం వల్ల తన ఆరోగ్య పరిస్థితి క్షీణించిందని సోనాలి వెల్లడించారు. తన అనారోగ్యం గురించి షో నిర్వాహకులకు మొరపెట్టుకున్నా, తనను బయటకు పంపమని కోరినా పట్టించుకోలేదని, ఆ సన్నివేశాలను అసలు ప్రసారం చేయలేదని సోనాలి ఆరోపించారు.

లీగల్ నోటీసులతో రంగంలోకి..

షో నిర్వాహకుల తీరుపై సోనాలి రౌత్ ఇప్పటికే చట్టపరమైన పోరాటం మొదలుపెట్టారు. తనకు కలిగిన శారీరక, మానసిక వేదనకు బాధ్యత వహించాలని కోరుతూ షో మేకర్స్‌కు లీగల్ నోటీసులు పంపారు. బిగ్ బాస్ హౌస్ నుంచి బయటకు వచ్చినా ఇప్పటికీ ఆ ఇన్ఫెక్షన్ తగ్గలేదని, తన ఆరోగ్యం పూర్తిగా దెబ్బతిన్నదని ఆమె వాపోయారు. అయితే ఈ ఆరోపణలపై జెనీలియా భర్త రితేష్ దేశ్‌ముఖ్ హోస్ట్‌గా చేస్తున్న బిగ్ బాస్ మరాఠీ 6 టీమ్ ఇంతవరకు అధికారికంగా స్పందించలేదు.