E-Paper
Dear Heart: గుండెను పిండేసే డైలాగ్స్, రొమాంటిక్ బీజీఎమ్- డియర్ హార్ట్ మోషన్ పోస్టర్ రిలీజ్ చేసిన డైరెక్టర్ సాయి రాజేష్
Dear Heart Motion Poster Released By Sai Rajesh: లక్ష్మణ్ టేకుమూడి, రాధికా జోషి నటించిన ఫీల్ గుడ్ లవ్ స్టోరీ డియర్ హార్ట్ మోషన్ పోస్టర్ను స్టార్ డైరెక్టర్ సాయి రాజేష్ విడుదల చేశారు. ఈ చిత్రంలోని సంభాషణలు యూత్ను విశేషంగా ఆకట్టుకుంటున్నాయి. బీజీఎమ్ రొమాంటిక్గా మరింత హైలెట్ అవుతోంది.
Prefer HTon Google
Dear Heart Motion Poster Released By Sai Rajesh: తెలుగు చిత్రసీమలో యూత్ఫుల్ ఫీల్ గుడ్ ప్రేమకథలకు ఎప్పుడూ ప్రత్యేక ఆదరణ ఉంటుంది. మనసును తాకే కథనంతో ప్రేక్షకుల ముందుకు రాబోతున్న అలాంటి మరో రొమాంటిక్ ఎంటర్టైనర్ 'డియర్ హార్ట్'.
డియర్ హార్ట్ మోషన్ పోస్టర్ రిలీజ్
ఈ డియర్ హార్ట్ సినిమాలో లక్ష్మణ్ టేకుమూడి, రాధికా జోషి, సుప్రియా చవాన్ ప్రధాన పాత్రల్లో నటిస్తున్నారు. ఇక ఈ సినిమాకు జీడీ నరసింహ దర్శకత్వం వహిస్తూ తెరకెక్కిస్తున్నారు. తాజాగా ఈ చిత్రానికి సంబంధించిన డియర్ హార్ట్ మోషన్ పోస్టర్ను 'బేబి' చిత్ర దర్శకుడు సాయి రాజేష్ ఆవిష్కరించారు. అనంతరం చిత్ర బృందానికి శుభాకాంక్షలు తెలిపారు డైరెక్టర్ సాయి రాజేష్.
గుండెను పిండేసేలా మోషన్ పోస్టర్ సంభాషణలు!
దర్శకుడు సాయి రాజేష్ విడుదల చేసిన ఈ మోషన్ పోస్టర్ ప్రేక్షకుల్లో సినిమాపై ఆసక్తిని పెంచింది. ప్రేమలోని గాఢతను, విరహ వేదనను ప్రతిబింబించేలా ఉన్న డైలాగ్స్ ఈ మోషన్ పోస్టర్కు ప్రధాన ఆకర్షణగా నిలిచాయి.
"కొన్ని ప్రేమ కథలు కొన్ని రోజులు మాత్రమే గుర్తుంటాయి.. కానీ కొన్ని కథలు కాలం ఉన్నంత వరకు గుర్తుంటాయి.. నువ్వు నాకు ఎదురైన ప్రతీసారి కాలం కూడా ఒక్క క్షణం ఆగిపోయి చూసేది.. నా చివరి శ్వాస వరకు నా గుండె కొట్టుకున్న ప్రతీసారి ఆ చప్పుడు చెప్పే ఒకే ఒక్క పేరు నీదే.." వంటి డైలాగ్స్ ఆకట్టుకున్నాయి.
అలాగే, "బతికుంటే నీ ప్రేమతో, ఊపిరి ఆగితే నీ జ్ఞాపకాలతో.. ప్రతీ ప్రేమ కథ ముగింపు వరకు వెళ్లలేకపోవచ్చు, కానీ నిజమైన ఏ ప్రేమ అయినా చరిత్రలో అలా గుర్తుండిపోవాల్సిందే, మన ప్రేమలా" అని వాయిస్ ఓవర్లో వచ్చే మాటలు యువత హృదయాలను కదిలిస్తున్నాయి. బ్యాక్గ్రౌండ్లో వచ్చే రొమాంటిక్ బీజీఎమ్ మరింత హైలెట్ అయింది.
చిన్న సినిమాలకు పెద్ద దిక్కుగా సాయి రాజేష్ ప్రోత్సాహం
ఇదిలా ఉంటే, ఇటీవలి కాలంలో కంటెంట్ ఉన్న చిన్న చిత్రాలకు సరైన ప్రచారం లభిస్తే బాక్సాఫీస్ వద్ద అద్భుత విజయాన్ని అందుకుంటున్నాయి. 'హృదయ కాలేయం', 'బేబి' వంటి బ్లాక్బస్టర్ చిత్రాలతో వైవిధ్యమైన ప్రేమకథలను అందించిన దర్శకుడు సాయి రాజేష్ ఈ సినిమా మోషన్ పోస్టర్ ఆవిష్కరించడం ప్రాధాన్యత సంతరించుకుంది.
కొత్త ప్రతిభను, చిన్న సినిమాలను ప్రోత్సహించడంలో ఆయన ఎప్పుడూ ముందుంటారు. ఈ 'డియర్ హార్ట్' చిత్రం కూడా బాక్సాఫీస్ వద్ద ప్రేక్షకులను అలరిస్తుందని డైరెక్టర్ సాయి రాజేష్ ఆశాభావం వ్యక్తం చేశారు.
విభిన్నమైన తారాగణం.. బలమైన సాంకేతిక వర్గం
కాగా, వారాహి ఆర్ట్స్ బ్యానర్పై బొబ్బాస్ సమర్పణలో రావి సౌజన్య ఈ డియర్ హార్ట్ చిత్రాన్ని నిర్మించారు. సురేష్ గురు, పృథ్వీరాజ్, సత్య ప్రకాష్, జబర్దస్త్ నూకరాజు, జగదీశ్వరి తదితరులు ఈ సినిమాలో ఇతర కీలక పాత్రలు పోషించారు.
ఈ చిత్రానికి అరవింద్ బి ఛాయాగ్రహణం వహించగా, ఎస్. సుహాస్ స్వరాలు సమకూరుస్తున్నారు. లక్ష్మణ్ టేకుమూడి, అజయ్ యార్లగడ్డ సంయుక్తంగా ఈ కథకు మాటలు అందించారు. ప్రస్తుతం నిర్మాణానంతర పనులు శరవేగంగా జరుపుకుంటున్న ఈ సినిమా విడుదల తేదీతో పాటు మరిన్ని వివరాలను త్వరలోనే వెల్లడిస్తామని మేకర్స్ తెలిపారు.
