Chiranjeevi Birthday: చిరంజీవికి నాగబాబు పర్యావరణ కానుక- బర్త్ డే స్పెషల్‌గా కదంబ వృక్షం- ఈ మొక్క ప్రత్యేకత ఏంటంటే?

Naga Babu Plantation Gift To Chiranjeevi Birthday: మెగాస్టార్ చిరంజీవి జన్మదినాన్ని పురస్కరించుకుని ఏపీ గ్రీన్ ఛైర్మన్, ఎమ్మెల్సీ కొణిదెల నాగేంద్రబాబు కోకాపేటలో ప్రత్యేకంగా కదంబ వృక్షాన్ని నాటారు. ఆడంబరాల కంటే పర్యావరణానికి మేలు చేసే మొక్కలు నాటడమే అసలైన బహుమతి అని నాగబాబు చెప్పారు.

Naga Babu Plantation Gift To Chiranjeevi Birthday: టాలీవుడ్ మెగాస్టార్ చిరంజీవి జన్మదిన వేడుకలు ఇవాళ (ఆగస్ట్ 22) రెండు తెలుగు రాష్ట్రాల్లో అభిమానుల కోలాహలం మధ్య ఘనంగా జరుగుతున్నాయి. ఈ ప్రత్యేక దినోత్సవాన్ని పురస్కరించుకుని చిరంజీవి సోదరుడు, ఆంధ్రప్రదేశ్ శాసనమండలి సభ్యులు (MLC), ఏపీ గ్రీన్ ఎగ్జిక్యూటివ్ కమిటీ ఛైర్మన్ కొణిదెల నాగేంద్రబాబు హైదరాబాద్‌లోని కోకాపేటలో మొక్కలు నాటి వినూత్నంగా శుభాకాంక్షలు తెలిపారు.

చిరంజీవికి నాగబాబు పర్యావరణ కానుక- బర్త్ డే స్పెషల్‌గా కదంబ వృక్షం- ఈ మొక్క ప్రత్యేకత ఏంటంటే?

కడియం నుంచి ప్రత్యేక 'కదంబ వృక్షం'

చిరంజీవి బర్త్ డే స్పెషల్‌గా తూర్పు గోదావరి జిల్లాలోని ప్రసిద్ధ కడియం నర్సరీల నుంచి ప్రత్యేకంగా తెప్పించిన 'కదంబ వృక్షం' (కదంబవాసిని) మొక్కను నాగబాబు నాటారు. ఈ జాతి మొక్కల విశిష్టతను వివరిస్తూ, 1.5 నుంచి 2 సంవత్సరాల వయసున్న ఈ మొక్క త్వరగానే ఏపుగా పెరుగుతుందని చెప్పారు.

10 నుంచి 15 డిగ్రీల వేడి వరకు తగ్గించి

ఇది దట్టమైన పచ్చదనాన్ని అందించడమే కాకుండా, పరిసరాల్లో దాదాపు 10 నుంచి 15 డిగ్రీల వరకు వేడిని తగ్గించి చల్లని నీడను ఇస్తుందని వెల్లడించారు. అంతేకాకుండా టెన్నిస్ బాల్ ఆకారంలో సువాసనలు వెదజల్లే ప్రత్యేకమైన పూలను పూస్తుందని మెగా బ్రదర్ నాగబాబు పేర్కొన్నారు.

భవిష్యత్ తరాలకు ప్రాణవాయువే గొప్ప బహుమతి

ఈ పర్యావరణ వేడుకపై నాగబాబు స్పందిస్తూ తన సంతోషాన్ని పంచుకున్నారు. "అన్నయ్య పుట్టినరోజు సందర్భంగా ఇలా మొక్కలు నాటడం ఎంతో సంతృప్తిని ఇచ్చింది. తాత్కాలికమైన ఆడంబరాలతో వేడుకలు చేసుకోవడం కంటే, భవిష్యత్ తరాలకు ప్రాణవాయువునిస్తూ అందరికీ మేలు చేసే ఒక చెట్టును నాటడం ఎంతో అర్థవంతమైన మార్గం" అని నాగబాబు తెలిపారు.

ఈ చెట్లలాగే మీ కీర్తి ఎదుగుతూనే ఉండాలి

ప్రతి ఒక్కరూ తమ ప్రియమైన వారి పుట్టినరోజుల సందర్భంగా కనీసం ఒక మొక్కనైనా నాటాలని నాగబాబు కోరారు. ఈ రోజు మనం చేసే ఈ చిన్న ప్రయత్నం, రేపటి సమాజానికి మనం ఇచ్చే గొప్ప బహుమతి అవుతుందని చెప్పుకొచ్చారు. "హ్యాపీ బర్త్‌డే అన్నయ్యా! ఈ చెట్లలాగే మీ కీర్తి, ప్రేరణ నిరంతరం ఎదుగుతూనే ఉండాలి" అని అన్నయ్య చిరంజీవికి జన్మదిన శుభాకాంక్షలు తెలిపారు నాగబాబు.

మెగా కుటుంబంలో 120కి పైగా మొక్కలు

మెగా కుటుంబ సాంప్రదాయంలో భాగంగా పర్యావరణ పరిరక్షణకు ప్రత్యేక ప్రాధాన్యమిస్తున్నట్లు నాగబాబు వెల్లడించారు. ఇప్పటివరకు పవన్ కల్యాణ్, రామ్ చరణ్, వరుణ్ తేజ్, సాయి ధరమ్ తేజ్, వైష్ణవ్ తేజ్, నిహారిక కొణిదెల తదితర కుటుంబ సభ్యుల పేర్లతో దాదాపు 120కి పైగా మొక్కలు నాటినట్లు ఆయన స్పష్టం చేశారు.

మొక్కలు నాటే అలవాటును పెంచుకోవాలి

సమాజంలో ప్రతి ఒక్కరూ బాధ్యతగా ముందుకు వచ్చి, శుభకార్యాలు, ప్రత్యేక దినోత్సవాల సందర్భంగా మొక్కలు నాటే అలవాటును పెంచుకోవాలని ఈ సందర్భంగా నాగబాబు కోరారు.