Hair Care : మండే ఎండ మీ జుట్టు మీద ప్రభావం చూపిస్తుందా? ఈ ఆహారాలు తినండి

Summer Hair Care : వేసవిలో చర్మమే కాదు.. సూర్యుడి ప్రతాపానికి జుట్టు కూడా పాడవుతుంది. అందుకే సరైనా ఆహారాలు తీసుకోవాలి. అప్పుడే జుట్టు ఆరోగ్యంగా ఉంటుంది.

తెలుగు రాష్ట్రాల్లో సూర్యుడు తన కోపాన్ని చూపిస్తున్నాడు. ఇప్పిటేకే ఉష్ణోగ్రతలు పెరిగిపోయాయి. మన జుట్టు సూర్యుని కారణంగా వివిధ రకాల ఇబ్బందులకు గురవుతుంది. ఇతర కాలాలతో పోలిస్తే వేసవిలో జుట్టు ఆరోగ్యం తీవ్రంగా దెబ్బతింటుంది. మండే వేసవి ఎండ నుండి మీ జుట్టును కాపాడుకోవడానికి సీక్రెట్ ఏంటంటే.. మీ ఆహారంలోనే ఉంది.

వేసవి జుట్టు సంరక్షణ చిట్కాలు

బ్లూబెర్రీస్

• అమెరికా వ్యవసాయ శాఖకు చెందిన హ్యూమన్ న్యూట్రిషన్ సెంటర్ (HNRCA) నివేదిక ప్రకారం, 40 రకాల పండ్లు, కూరగాయలను కలిపి చూసినా వాటికంటే బ్లూబెర్రీస్‌లో ఎక్కువ యాంటీఆక్సిడెంట్లు ఉంటాయి. బ్లూబెర్రీస్ మీ జుట్టును రక్షించడమే కాకుండా.. వృద్ధాప్యం, గుండె జబ్బులు, క్యాన్సర్‌కు దారితీసే ఆక్సీకరణ ఒత్తిడిని కూడా ఎదుర్కొంటాయి. వాటిని పెరుగుతో కలిపి తినడం వల్ల వాటి ప్రయోజనాలు మరింత పెరుగుతాయి. ఎందుకంటే వాటిలోని అదనపు ప్రోటీన్ మీ జుట్టును బలంగా, ఒత్తుగా ఉంచుతుంది.

చేపలు

• ఇతర మాంసాహారాలతో పోలిస్తే, జుట్టు ఆరోగ్యానికి మేలు చేసే పోషకాలు చేపలలో పుష్కలంగా ఉంటాయి. చేపలు, ముఖ్యంగా సాల్మన్, సార్డిన్‌లలో ఒమేగా-3 ఫ్యాటీ యాసిడ్లు అధికంగా ఉంటాయి. ఈ ఆరోగ్యకరమైన కొవ్వులు లేకపోతే, జుట్టు పెళుసుగా, పొడిగా మారుతుంది. ఈ వేసవిలో మీ ఆహారంలో చేపలను తరచుగా చేర్చుకోండి.

పుచ్చకాయ

• పుచ్చకాయలో నీటి శాతం ఎక్కువగా ఉన్నప్పటికీ, అందులో అనేక పోషకాలు కూడా ఉంటాయి. ఒక కప్పు పుచ్చకాయలో రోజువారీ సిఫార్సు చేసిన విటమిన్ ఏ లో 17 శాతం, విటమిన్ సీ లో 21 శాతం ఉంటాయి. ఇది బరువు తగ్గడానికి కూడా సహాయపడుతుంది. విటమిన్ ఏ తలపై చుండ్రును నివారిస్తుంది. ఆరోగ్యకరమైన కొల్లాజెన్ కణాలను ప్రోత్సహిస్తుంది, తద్వారా మీ జుట్టు మెరిసేలా, బలంగా ఉండటానికి సహాయపడుతుంది. ఇది కాకుండా పుచ్చకాయలో థయామిన్, విటమిన్ బి-6, మెగ్నీషియం, పాంతోతేనిక్ యాసిడ్, పొటాషియం, జింక్, సెలీనియం, కోలిన్, నియాసిన్, రిబోఫ్లేవిన్ వంటి పోషకాలు కూడా ఉంటాయి. పుచ్చకాయలో 92 శాతం నీరు ఉంటుంది, ఇది వేసవిలో శరీరాన్ని హైడ్రేటెడ్‌గా ఉంచడానికి సహాయపడుతుంది.

పాలకూర

• వేసవి కాలంలో మీ ఆహారంలో ఐరన్ అధికంగా ఉండే పాలకూర ఆకులను క్రమం తప్పకుండా చేర్చుకోవడం వల్ల అనేక ప్రయోజనాలు కలుగుతాయి. పాలకూర వంటి ఆకుకూరలు ఎర్ర రక్త కణాలకు, కేశ కుదుళ్లకు ఆక్సిజన్‌ను చేరవేయడంలో సహాయపడి, ఆరోగ్యకరమైన జుట్టు పెరుగుదలను ప్రోత్సహిస్తాయి. పాలకూర రకాలలో జుట్టు ఆరోగ్యానికి అవసరమైన విటమిన్ అయిన బయోటిన్ పుష్కలంగా ఉంటుంది.

టొమాటో

• లైకోపీన్, బీటా-కెరోటిన్, విటమిన్ సి పుష్కలంగా ఉండే టమోటాలు, చర్మాన్ని, జుట్టును నష్టం నుండి కాపాడతాయి. టమోటాలలో లైకోపీన్ అధికంగా ఉంటుంది. వేసవి నెలల్లో వీలైనంత తరచుగా మీ ఆహారంలో టమోటాలను చేర్చుకోవడం జుట్టు పెరుగుదలను ప్రోత్సహిస్తుంది.