కేంద్ర ఎన్నికల సంఘం (ఈసీఐ) తీరుకు నిరసనగా ప్రతిపక్ష ఇండియా (INDIA) కూటమి చేపట్టిన ఆందోళన దేశ రాజధాని ఢిల్లీలో తీవ్ర రాజకీయ దుమారం రేపింది. ఎన్నికల సంఘం ప్రధాన కమిషనర్ జ్ఞానేష్ కుమార్ రాజీనామా చేయాలని, ఓటర్ల జాబితా ప్రత్యేక సమగ్ర సవరణ (SIR) ప్రక్రియలో చోటుచేసుకున్న అక్రమాలపై చర్యలు తీసుకోవాలని డిమాండ్ చేస్తూ ప్రతిపక్ష నేతలు నిరసనకు దిగారు. ఈ క్రమంలో ఢిల్లీలోని ఆకాశవాణి భవన్ వద్ద చోటుచేసుకున్న పరిణామాల ఆధారంగా కాంగ్రెస్ ఎంపీ రాహుల్ గాంధీ, ప్రియాంక గాంధీ వాద్రా సహా పలువురు ఇండియా కూటమి ఎంపీలపై ఢిల్లీ పోలీసులు బుధవారం ఎఫ్‌ఐఆర్ (FIR) నమోదు చేశారు.
అనుమతి లేకుండా ఆవరణలోకి..
మంగళవారం నాటి నిరసన ప్రదర్శన సమయంలో రాహుల్ గాంధీ, ప్రియాంక గాంధీతో పాటు పలువురు ఎంపీలు ఆకాశవాణి భవన్ కాంప్లెక్స్‌లోకి అనుమతి లేకుండా ప్రవేశించారని పోలీసులు తెలిపారు. లోపలికి వెళ్లిన నేతలు అక్కడ ధర్నాకు దిగడంతో ఉద్రిక్త వాతావరణం నెలకొంది. భవన ఆవరణను ఖాళీ చేసి వెళ్లిపోవాలని పోలీసు అధికారులు పలుమార్లు విజ్ఞప్తి చేసినప్పటికీ కాంగ్రెస్ నేతలు అందుకు నిరాకరించారు.
పోలీసుల హెచ్చరికను లెక్కచేయక..
ఎలక్షన్ కమిషన్ ఉన్నతాధికారులను కలిసేందుకు ఎంపీల బృందానికి సమయం కేటాయించే వరకు తాము ఇక్కడి నుంచి కదిలేది లేదని రాహుల్ గాంధీ, ఇతర నేతలు భీష్మించుకూర్చున్నారు. శాంతిభద్రతల పరిరక్షణ దృష్ట్యా, పరిస్థితులు చేయిదాటిపోకుండా ఉండేందుకు పోలీసులు రంగంలోకి దిగారు. అనుమతి లేకుండా కాంప్లెక్స్‌లోకి వచ్చి ఆందోళన చేస్తున్న ప్రజాప్రతినిధులను అక్కడి నుంచి బలవంతంగా తరలించాల్సి వచ్చిందని ఢిల్లీ పోలీస్ అధికారిక ప్రకటనలో స్పష్టం చేసింది.
260 మంది అరెస్ట్..
రోజంతా కొనసాగిన ఈ ఆందోళనల క్రమంలో పోలీసులు దాదాపు 260 మందికి పైగా నిరసనకారులను అదుపులోకి తీసుకున్నారు. ఇందులో 10 మంది ఎంపీలు కూడా ఉన్నారు. అదుపులోకి తీసుకున్న నేతలను, శ్రేణులను కింగ్స్‌వే క్యాంప్‌లోని న్యూ పోలీస్ లైన్స్‌కు తరలించిన పోలీసులు, అనంతరం సాయంత్రానికి వారందరినీ విడుదల చేశారు. కాగా, ఈ కేసులో చట్టపరంగా నమోదు చేసిన సెక్షన్ల వివరాలను పోలీసులు వెల్లడించాల్సి ఉంది.
ప్రతిపక్షాల ప్రధాన డిమాండ్లు ఇవే
ఓటర్ల జాబితా ప్రత్యేక సమగ్ర సవరణ (SIR) నిర్వహణలో భారీగా అక్రమాలు జరిగాయని, తక్షణమే దీనిపై సమగ్ర విచారణ జరిపించాలని ప్రతిపక్ష కూటమి డిమాండ్ చేస్తోంది. వ్యవస్థను నిష్పాక్షికంగా నిర్వహించడంలో విఫలమయ్యారంటూ సీఈసీ జ్ఞానేష్ కుమార్ తక్షణమే తన పదవికి రాజీనామా చేయాలని వారు పట్టుబడుతున్నారు.
{{/usCountry}}ఓటర్ల జాబితా ప్రత్యేక సమగ్ర సవరణ (SIR) నిర్వహణలో భారీగా అక్రమాలు జరిగాయని, తక్షణమే దీనిపై సమగ్ర విచారణ జరిపించాలని ప్రతిపక్ష కూటమి డిమాండ్ చేస్తోంది. వ్యవస్థను నిష్పాక్షికంగా నిర్వహించడంలో విఫలమయ్యారంటూ సీఈసీ జ్ఞానేష్ కుమార్ తక్షణమే తన పదవికి రాజీనామా చేయాలని వారు పట్టుబడుతున్నారు.
{{/usCountry}}