జీఎస్టీ పన్ను చెల్లింపుదారులకు భారీ ఊరట: అరెస్ట్ అధికారాలు రద్దు.. రూ.5 కోట్ల వరకు ప్రాసిక్యూషన్ నుంచి మినహాయింపు

57వ జీఎస్టీ కౌన్సిల్ సమావేశంలో పన్ను నిబంధనలను సులభతరం చేస్తూ కీలక నిర్ణయాలు తీసుకున్నారు. పన్ను అధికారుల అరెస్ట్ అధికారాల రద్దు, ఈ-కామర్స్ వ్యాపారులకు ఉపశమనం సహా పలు సంస్కరణలను కేంద్రం ప్రకటించింది.

జీఎస్టీ చెల్లింపుదారులు, చిన్న వ్యాపారులకు కేంద్ర ప్రభుత్వం తీపి కబురు అందించింది. ఢిల్లీ వేదికగా నిర్వహించిన 57వ జీఎస్టీ కౌన్సిల్ సమావేశంలో పన్ను పరిపాలనను మరింత సులభతరం చేస్తూ, వ్యాపార ప్రాసెస్‌లను సులభతరం (Ease of Doing Business) చేసే దిశగా అనేక విప్లవాత్మక నిర్ణయాలు తీసుకున్నారు. కేంద్ర ఆర్థిక మంత్రి నిర్మలా సీతారామన్ అధ్యక్షతన జరిగిన ఈ సమావేశంలో పన్ను అధికారులకు ఉన్న కొన్ని అరెస్ట్ అధికారాలను రద్దు చేయడంతో పాటు, ప్రాసిక్యూషన్ పరిమితిని భారీగా పెంచారు.

ప్రాసిక్యూషన్ పరిమితి రూ.5 కోట్లకు పెంపు

జీఎస్టీ కౌన్సిల్ సమావేశంలో పాల్గొన్న ప్రతినిధులు (Naveen Sharma)

ఇప్పటివరకు రూ.1 కోటి దాటితే ప్రాసిక్యూషన్ చర్యలు తీసుకునే అవకాశం ఉండేది. అయితే వ్యాపారులపై వేధింపులు తగ్గించేందుకు ఈ పరిమితిని ఏకంగా రూ.5 కోట్లకు పెంచుతూ జీఎస్టీ కౌన్సిల్ నిర్ణయం తీసుకుంది. కొన్ని రకాల కేసులలో పన్ను అధికారులకు ఉన్న అరెస్ట్ చేసే అధికారాలను పూర్తిగా రద్దు చేశారు. కనిష్ట శిక్షను విధించే నిబంధనను కూడా తొలగించి, కేసు స్వభావాన్ని బట్టి జరిమానా లేదా జైలు శిక్ష విధించే పూర్తి విచక్షణాధికారాన్ని కోర్టులకే వదిలేశారు. నిర్దిష్టమైన జరిమానా లేని కేసుల్లో వేసే సాధారణ పెనాల్టీని రూ.25,000 నుంచి రూ.10,000కు తగ్గించారు.

చిన్న వ్యాపారులకు, క్లెయిమ్‌లకు బిగ్ రిలీఫ్

ఈ-కామర్స్ విక్రేతలకు సడలింపులు: ఈ-కామర్స్ ప్లాట్‌ఫారమ్‌ల ద్వారా వ్యాపారం చేసే చిన్న తరహా విక్రేతలకు నిబంధనలను మరింత సరళతరం చేశారు.

రీఫండ్ క్లెయిమ్‌ల వేగం: వ్యాపారులు దాఖలు చేసే రీఫండ్ దరఖాస్తులను అధికారులు అంగీకరించే (Acknowledgement) సమయాన్ని 15 రోజుల నుంచి 10 రోజులకు తగ్గించారు.

ఉద్యోగుల ఇన్సూరెన్స్ పై ఐటీసీ: యజమానులు తమ ఉద్యోగులకు అందించే హెల్త్, లైఫ్ ఇన్సూరెన్స్ ప్రీమియంలపై చెల్లించిన జీఎస్టీకి ఇన్ పుట్ టాక్స్ క్రెడిట్ (ITC) క్లెయిమ్ చేసుకోవడానికి అర్హత కల్పించారు.

ప్రస్తుత పన్ను రేట్ల విధానం స్థిరంగా ఉందని ఆర్థిక మంత్రిత్వ శాఖ స్పష్టం చేసింది. అందువల్ల ఈ సమావేశంలో పన్ను రేట్లలో ఎలాంటి మార్పులు చేయలేదు. ఇకపై జీఎస్టీ పన్ను రేట్ల సవరణలు ఏడాదికి ఒకసారి మాత్రమే చేపడతామని తెలిపింది.

సక్రమంగా పన్ను చెల్లించేవారి రక్షణకు కమిటీ

చెల్లుబాటు అయ్యే ఇన్వాయిస్‌లు ఉండి, వస్తువులను పొంది, సరుకు సరఫరాదారులకు పూర్తి బిల్లు చెల్లించిన నిజాయితీ గల కొనుగోలుదారులను రక్షించేందుకు అధికారుల కమిటీని ఏర్పాటు చేయాలని కౌన్సిల్ నిర్ణయించింది. ఈ కమిటీ మూడు నెలల్లో అధ్యయనాన్ని పూర్తి చేసి, తదుపరి జీఎస్టీ కౌన్సిల్ సమావేశంలో నివేదిక సమర్పిస్తుంది. నోటీసులు, విచారణల ప్రక్రియలో దేశమంతటా ఒకే రకమైన ప్రామాణిక విధానాన్ని (Uniform Standards) అమలు చేయాలని సిఫార్సు చేశారు.

పశ్చిమ బెంగాల్ ఆర్థిక మంత్రి ప్రశంసలు

ఈ సమావేశం అత్యంత సానుకూలంగా జరిగిందని పశ్చిమ బెంగాల్ ఆర్థిక మంత్రి స్వపన్ దాస్‌గుప్తా తెలిపారు. రాష్ట్రానికి వచ్చే ఆదాయంలో జీఎస్టీ వాటా చాలా కీలకమని, ఈ రోజు తీసుకున్న సంస్కరణలు సులభతర వాణిజ్యానికి ఎంతో దోహదపడతాయని పేర్కొన్నారు. పన్ను నిబంధనల పాటించడంలో (Compliance) సవాళ్లు ఉన్నప్పటికీ, వ్యాపారుల్లో అవగాహన పెరుగుతోందని ఆశాభావం వ్యక్తం చేశారు.