కష్టాలు-కన్నీళ్లు దాటి! అద్భుతం చేసిన అమ్మాయిలు-దేశమంతా సంబరాలు- టీమిండియాదే ప్రపంచకప్- ఫైనల్లో సౌతాఫ్రికా చిత్తు

భారత కల నెరవేరింది. మహిళల క్రికెట్లో కొన్ని దశాబ్దాలుగా ఊరిస్తూ వస్తున్న ప్రపంచకప్ అందింది. మహిళల వన్డే విశ్వ విజేత ఇప్పుడు టీమిండియా. ఫైనల్లో దక్షిణాఫ్రికాను చిత్తుచేసిన మన అమ్మాయిలు దేశానికి సంబరాలు అందించారు.

కపిల్ దేవ్, ఎంఎస్ ధోనీ, రోహిత్ శర్మ.. ఇప్పుడు హ‌ర్మ‌న్‌ప్రీత్ కౌర్‌. భారత మహిళల క్రికెట్ జట్టు చరిత్రలో తన పేరును లిఖించింది. సుదీర్ఘ కలను సాకారం చేసింది. తొలిసారి మహిళల ప్రపంచకప్ ను ముద్దాడింది. ఆదివారం (నవంబర్ 2) అర్ధరాత్రి ముగిసిన ఫైనల్లో దక్షిణాఫ్రికాపై 52 పరుగుల తేడాతో ఇండియా గెలిచింది.

ప్రపంచకప్ తో భారత అమ్మాయిల టీమ్ (PTI)

తొలి ప్రపంచకప్

భారత మహిళల జట్టు అద్భుతం చేసింది. తొలిసారి ఓ ప్రపంచకప్ సొంతం చేసుకుంది. టీ20ల్లో అయినా వన్డేల్లో అయినా ఇండియా వుమెన్స్ టీమ్ కు ఇదే ఫస్ట్ వరల్డ్ కప్. ఈ ఫైనల్ హీరో షఫాలీ వర్మ. బ్యాటింగ్ లో 87 పరుగులు చేయడంతో పాటు, బౌలింగ్ లో రెండు కీలక వికెట్లు పడగొట్టింది. దీంతో ఫైనల్లో ‘ప్లేయర్ ఆఫ్ ది మ్యాచ్’గా నిలిచింది. మొహిందర్ అమర్ నాథ్, ఇర్ఫాన్ పఠాన్, ధోని, విరాట్ కోహ్లి వంటి దిగ్గజాల సరసన చేరింది.

దీప్తి మాయ

నవీ ముంబయిలోని డీవై పాటిల్ స్టేడియంలో ఛేజింగ్ లో స్పిన్ దెబ్బకు సౌతాఫ్రికా కుప్పకూలింది. బ్యాటింగ్ లో హాఫ్ సెంచరీతో మెరిసిన దీప్తి శర్మ, బౌలింగ్ లో అయిదు వికెట్లతో అదరగొట్టింది. షెఫాలి రెండు, శ్రీ చరణి ఒక వికెట్ దక్కించుకుంది. సౌతాఫ్రికా కెప్టెన్ లారా వోల్వార్ట్ (101) సెంచరీతో పోరాడింది. కానీ 299 పరుగుల ఛేజింగ్ లో ఆ టీమ్ 246కే ఆలౌటైంది.

బ్యాటింగ్ అదుర్స్

అంతకుముందు బ్యాటింగ్ లో టీమిండియా అదరగొట్టింది. 50 ఓవర్లలో 7 వికెట్లకు 298 పరుగులు చేసింది. షెఫాలి వర్మ (78 బంతుల్లో 87; 7 ఫోర్లు, 2 సిక్సర్లు), దీప్తి శర్మ (58; 58 బంతుల్లో 3 ఫోర్లు, ఓ సిక్సర్), మంధాన (45), రిచా ఘోష్ (34) రాణించారు. ఈ ప్రపంచకప్ లో 215 పరుగులు చేయడంతో పాటు 22 వికెట్లు తీసిన దీప్తి శర్మ ‘ప్లేయర్ ఆఫ్ ది సిరీస్’గా నిలిచింది.

దేశమంతా సంబరాలు

భారత మహిళల జట్టు తొలిసారి ప్రపంచకప్ సొంతం చేసుకోవడంతో ఆదివారం అర్ధరాత్రి దేశమంతా సంబరాలు మొదలయ్యాయి. 2005, 2017, 2020 లో వరల్డ్ కప్ కు అడుగు దూరంలో ఆగిపోయిన టీమిండియా.. ఈ సారి మాత్రం పట్టు వదల్లేదు. కప్ నూ వదల్లేదు. సొంతగడ్డపై విశ్వవిజేతలుగా నిలిచారు మన అమ్మాయిలు. అసాధారణ పోరాట పటిమతో, అద్భుతమైన ప్రదర్శనతో దేశానికి మహిళల క్రికెట్లో మొట్టమొదటి వరల్డ్ కప్ అందించారు.