E-Paper
‘లవ్ ట్రాప్’తో 180 మందిపై అఘాయిత్యం.. అశ్లీల వీడియోలతో బ్లాక్మెయిల్ చేసిన యువకుడి అరెస్ట్
మహారాష్ట్రలోని అమరావతి జిల్లాలో వెలుగుచూసిన ఈ ఉదంతం దేశవ్యాప్తంగా సంచలనం సృష్టిస్తోంది. వందల మంది బాలికలను వలలో వేసుకుని, వారి జీవితాలతో ఆడుకున్న అయాన్ అహ్మద్ ఆగడాలకు పోలీసులు చెక్ పెట్టారు.
మహారాష్ట్రలోని అమరావతి జిల్లా పరత్వాడలో మానవత్వాన్ని మంటగలిపే దారుణ ఘటన వెలుగులోకి వచ్చింది. ప్రేమ పేరుతో వంచించి, వందలాది మంది మహిళలు, మైనర్ బాలికల జీవితాలను చిన్నాభిన్నం చేసిన అయాన్ అహ్మద్ అలియాస్ తన్వీర్ అహ్మద్ను పోలీసులు ఎట్టకేలకు కటకటాల్లోకి నెట్టారు. నిందితుడి వికృత చేష్టలకు సంబంధించిన వీడియోలు సోషల్ మీడియాలో వైరల్ కావడంతో ఈ దారుణాలన్నీ బయటపడ్డాయి. ఈ కేసు తీవ్రతను పరిగణనలోకి తీసుకున్న పోలీసులు రంగంలోకి దిగి, ఏప్రిల్ 11న నిందితుడిని అదుపులోకి తీసుకున్నారు.
లవ్ ట్రాప్
అయాన్ అహ్మద్ అమాయక బాలికలను లక్ష్యంగా చేసుకుని 'లవ్ ట్రాప్' వేసేవాడని పోలీసులు ప్రాథమిక విచారణలో గుర్తించారు. అందమైన మాటలతో వారిని ఆకర్షించి, ప్రేమ పేరుతో ముంబై, పుణె వంటి నగరాలకు తీసుకెళ్లేవాడు. అక్కడ వారితో చనువుగా ఉంటూ, వారికి తెలియకుండా లేదా బలవంతంగా అశ్లీల వీడియోలు, ఫోటోలు చిత్రీకరించేవాడు. ఈ వీడియోలను అడ్డం పెట్టుకుని ఆపై తన అసలు రూపాన్ని బయటపెట్టేవాడు.
180 మంది బాధితులు.. ఎక్కువగా మైనర్లు
ఈ కేసులో అత్యంత భయంకరమైన విషయం ఏమిటంటే, బాధితుల సంఖ్య ఏకంగా 180 వరకు ఉండవచ్చని సమాచారం. అందులోనూ ఎక్కువ మంది మైనర్ బాలికలేనని తెలుస్తోంది. "నిందితుడు పక్కా ప్రణాళికతో బాలికలను ట్రాప్ చేసి, వారిని లైంగికంగా వేధించడమే కాకుండా ఆ దృశ్యాలను రికార్డ్ చేశాడు" అని దర్యాప్తు అధికారులు వెల్లడించారు. బాధితులు పరువు పోతుందన్న భయంతో ఇప్పటివరకు ఫిర్యాదు చేయడానికి ముందుకు రాకపోవడం గమనార్హం. అయితే, సోషల్ మీడియాలో వీడియోలు వైరల్ కావడంతో పోలీసులు సుమోటోగా కేసు నమోదు చేసి దర్యాప్తు వేగవంతం చేశారు.
బ్లాక్మెయిల్ నుంచి వ్యభిచారం వరకు..
కేవలం వీడియోలు తీయడంతోనే అయాన్ ఆగలేదు. ఆ దృశ్యాలను సోషల్ మీడియాలో పెడతానని బాధితులను బెదిరిస్తూ బ్లాక్మెయిల్కు పాల్పడేవాడు. అంతటితో ఆగకుండా, ఆ వీడియోలతో వారిని లొంగదీసుకుని బలవంతంగా వ్యభిచార కూపంలోకి నెట్టేందుకు ప్రయత్నించాడని తీవ్ర ఆరోపణలు వస్తున్నాయి. సమాజంలో వారి ప్రతిష్ఠను భంగం చేస్తానంటూ నరకయాతన చూపించినట్లు విచారణలో తేలింది.
రంగంలోకి ప్రత్యేక దర్యాప్తు బృందం (SIT)
ఈ ఘోరంపై రాజకీయంగానూ దుమారం రేగింది. రాజ్యసభ ఎంపీ అనిల్ బోండే ఈ ఘటనను తీవ్రంగా ఖండించి, సమగ్ర విచారణ కోరారు. "ఈ కేసులో కేవలం అయాన్ మాత్రమే కాకుండా, దీని వెనుక పెద్ద ముఠా ఉండే అవకాశం ఉంది" అని ఆయన అనుమానం వ్యక్తం చేశారు. దీంతో అమరావతి రూరల్ ఎస్పీ విశాల్ ఆనంద్ 11 మంది అధికారులు, 36 మంది కానిస్టేబుళ్లతో కూడిన ఒక 'సిట్' (Special Investigation Team)ను ఏర్పాటు చేశారు. అసిస్టెంట్ సూపరింటెండెంట్ ఆఫ్ పోలీస్ స్థాయి అధికారి ఈ బృందానికి నేతృత్వం వహిస్తున్నారు.
నిందితుడి ఇంటిపై బుల్డోజర్ల గర్జన
నేరస్తులకు కఠిన సంకేతాలు పంపేలా అమరావతి జిల్లా యంత్రాంగం కీలక చర్యలు తీసుకుంది. పోలీసుల సమక్షంలో పరత్వడలోని నిందితుడి నివాసం వెలుపల ఉన్న అక్రమ కట్టడాలను బుల్డోజర్లతో కూల్చివేశారు. ఇంటి బయట నిర్మించిన ఇనుప మెట్లను, ఇతర అనధికార నిర్మాణాలను అధికారులు నేలమట్టం చేశారు. నిందితుడిపై భారతీయ న్యాయ సంహిత (BNS) సెక్షన్ 294తో పాటు, పోక్సో (POCSO) చట్టంలోని సెక్షన్ 8, 12 మరియు ఐటీ యాక్ట్ కింద కేసులు నమోదు చేశారు.
