Petrol diesel price hike : మళ్లీ పెరిగిన ఇంధన​ రేట్లు- ఏపీలో రూ. 120కి చేరువలో లీటరు పెట్రోల్​ ధర!

Petrol price today : దేశంలో పెట్రోల్​, డీజిల్​ ధరలు మరోసారి పెరిగాయి. ఫలితంగా దేశ రాజధాని దిల్లీలో పెట్రోల్​ ధర తొలిసారి రూ. 100 దాటింది. ఇక ఏపీలో లీటరు పెట్రోల్​ రేటు రూ. 120కి చేరువ అవుతోంది.

దేశవ్యాప్తంగా పెట్రోల్​, డీజిల్​ ధరలు మరోసారి పెరిగాయి. లీటరు పెట్రోల్​పై రూ. 2.61, లీటరు డీజిల్​పై ఈసారి రూ. 2.71 పెంచాలని చమురు మార్కెటింగ్ సంస్థలు నిర్ణయించాయి. అమెరికా- ఇరాన్ యుద్ధం, స్ట్రెయిట్ ఆఫ్​ హర్ముజ్​ వద్ద అనిశ్చితి కారణంగా మన దేశంలో ఇంధన ధరలు పెరగడం 10 రోజుల్లో ఇది 4వసారి.

మళ్లీ పెరిగిన పెట్రోల్, డీజిల్ ధరలు.. (Pitamber Newar)

తాజా పెంపుతో దేశ రాజధాని దిల్లీలో పెట్రోల్​ ధర తొలిసారి రూ. 100 దాటింది. ఇక ఇంధన ధరలు అత్యధికంగా ఉన్న రాష్ట్రాలుగా తెలంగాణ, ఆంధ్రప్రదేశ్​లు నిలుస్తున్నాయి.

దిల్లీలో ప్రస్తుతం లీటరు పెట్రోల్​ ధర రూ. 99.51 నుంచి రూ. 102.12కి చేరింది. ఇక లీటరు డీజిల్​ ధర రూ. 92.49 నుంచి రూ. 95.20కి పెరిగింది.

కోల్​కతాలో పెట్రోల్​, డీజిల్​ ధరలు వరుసగా రూ. 113.51, రూ.99.82గాను, చెన్నైలో రూ. 111.21, రూ. 99.82గాను ఉన్నాయి.

ఇక చెన్నైలో లీటరు పెట్రోల్​ ధర రూ. 107.77గా, లీటరు డీజిల్​ ధర రూ. 99.55గా కొనసాగుతున్నాయి.

దేశ ఐటీ హబ్​ బెంగళూరులో లీటరు డీజిల్​ ధర రూ. 98.54గా, లీటరు పెట్రోల్​ ధర రూ. 110.61గా ఉన్నాయి.

మరోవైపు హైదరాబాద్​లో లీటరు పెట్రోల్ ధర రూ. 115.73గాను, లీటరు డీజిల్​ ధర రూ .103.82గాను ఉన్నాయి. ఇక విజయవాడలో లీటరు పెట్రోల్​ ధర రూ. 117.75గాను, లీటరు డీజిల్​ ధర రూ. 105.43గాను ఉన్నాయి.

దేశంలోనే అత్యధికంగా హైదరాబాద్‌లో పెట్రోల్ ధరలు: ఢిల్లీలో తక్కువ.. ఎందుకీ భారీ తేడా?

సామాన్యుడి జేబుకు చిల్లు..

ఉదయం పూట వస్తున్న ఈ వార్తలతో సామాన్యుడు నిద్ర లేస్తూనే షాక్​కి గురవుతున్నాడు. యుద్ధం మొదలైనప్పటి నుంచి ఏదో ఒక విధంగా సామాన్యుడి జేబుకు చిల్లుపడుతూనే ఉంది. ఇక ఇప్పుడు పెట్రోల్​, డీజిల్​ ధరల భారం కూడా పెరుగుతూ మధ్యతరగతి ప్రజలను ఉక్కిరిబిక్కిరి చేస్తోంది. 10 రోజులను చూసుకుంటే.. ఇప్పటివరకు ఇంధన ధరలు దాదాపు రూ. 8 వరకు పెరిగాయి. అయితే, చమురు మార్కెటింగ్​ సంస్థలు తమ నష్టాలను పూడ్చుకోవాలంటే ఇంధన ధరలను కనీసం రూ. 20 అయినా పెంచాలని వస్తున్న నిపుణుల విశ్లేషణలతో ప్రజలు బెంబేలెత్తిపోతున్నారు.