మహారాష్ట్రలో మరిన్ని ప్రకంపనలు… శివసేన ఎంపీ శ్రీకాంత్ షిండే హెచ్చరిక

మహారాష్ట్ర రాజకీయాల్లో మరోసారి తీవ్ర కలకలం రేగింది. ఉద్ధవ్ ఠాక్రే నేతృత్వంలోని శివసేన (యూబీటీ)కి చెందిన ఆరుగురు లోక్‌సభ ఎంపీలు సోమవారం అధికారికంగా ఏకనాథ్ షిండే నేతృత్వంలోని శివసేనలో చేరారు. రాబోయే రోజుల్లో మరిన్ని రాజకీయ ప్రకంపనలు ఉంటాయని ఎంపీ శ్రీకాంత్ షిండే హెచ్చరించారు.

మహారాష్ట్ర రాజకీయాల్లో మరో సంచలన పరిణామం చోటుచేసుకుంది. ఉద్ధవ్ ఠాక్రే నేతృత్వంలోని శివసేన (యూబీటీ) వర్గానికి కోలుకోలేని దెబ్బ తగిలింది. ఆ పార్టీకి చెందిన ఆరుగురు ఎంపీలు సోమవారం అధికారికంగా ఏకనాథ్ షిండే నేతృత్వంలోని శివసేనలో చేరారు. ఈ భారీ వలసలతో లోక్‌సభలో షిండే నేతృత్వంలోని శివసేన ఎంపీల బలం 7 నుండి ఒక్కసారిగా 13కి పెరిగింది. ఇది ఉద్ధవ్ వర్గానికి పెద్ద ఎదురుదెబ్బగా మారగా, షిండే వర్గానికి పార్లమెంటులో మరింత బలాన్ని చేకూర్చింది.

శివసేన బ్యానర్

‘ఇది కేవలం ట్రైలర్ మాత్రమే.. అసలు సినిమా ముందుంది’

ఈ తాజా రాజకీయ మార్పులపై శివసేన యువనేత, ఎంపీ శ్రీకాంత్ షిండే సంచలన వ్యాఖ్యలు చేశారు. రాబోయే రోజుల్లో మరిన్ని పరిణామాలు ఉంటాయని ఆయన సంకేతాలిచ్చారు.

"రాజకీయాల్లో ఒకదాని తర్వాత ఒకటిగా బాంబు పేలుళ్లు కొనసాగుతూనే ఉంటాయి. గత నాలుగేళ్లుగా మేము కేవలం రాజకీయ షాక్‌లు ఇస్తూనే ఉన్నాం. ఇది కేవలం ట్రైలర్ మాత్రమే, అసలు సినిమా ఇంకా బాకీ ఉంది" అని శ్రీకాంత్ షిండే పేర్కొన్నారు.

నిరంతర మీడియా కవరేజీని ఉద్దేశించి ఆయన చమత్కరిస్తూ.. ఒకే రోజులో జాతీయ స్థాయిలో ప్రాధాన్యత ఉన్న రెండు పెద్ద వార్తలు వచ్చాయని, జర్నలిస్టులు కూడా ఉదయం నుంచి బ్రేకింగ్ న్యూస్‌లు ఇస్తూ అలసిపోయి ఉంటారని అన్నారు. ఈ రోజు ప్రశాంతంగా విశ్రాంతి తీసుకోవాలని, రేపటి నుంచి మళ్లీ సరికొత్తగా ప్రకంపనలు మొదలుపెడతామని వ్యాఖ్యానించారు.

ఆరుగురు రెబల్ ఎంపీలు వీరే..

శివసేన (యూబీటీ) నుంచి బయటకు వచ్చి షిండే వర్గంలో చేరిన వారిలో ప్రముఖ నేతలు ఉన్నారు. సంజయ్ దినా పాటిల్, సంజయ్ దేశ్‌ముఖ్, సంజయ్ జాదవ్, భావ్‌సాహెబ్ వాక్‌చౌరే, నాగేష్ పాటిల్ అస్తికార్, ఓంప్రకాష్ రాజే నింబాల్కర్ అధికారికంగా కండువా కప్పుకున్నారు. వీరంతా ఎటువంటి ఒత్తిడి లేకుండా, స్వచ్ఛందంగానే తమ పార్టీలోకి వచ్చారని మహారాష్ట్ర ఉప ముఖ్యమంత్రి ఏకనాథ్ షిండే స్పష్టం చేశారు.

ఈ ఆరుగురు ఎంపీలు జూన్ 17న ఢిల్లీలో జరిగిన శివసేన (యూబీటీ) పార్లమెంటరీ సమావేశానికి గైర్హాజరు కావడంతోనే వారు పార్టీ మారబోతున్నారనే ఊహాగానాలు మొదలయ్యాయి. వీరిలో నాగేష్ పాటిల్ అస్తికార్, ఓంప్రకాష్ రాజే నింబాల్కర్ తాము షిండే వర్గంలో చేరుతున్నట్లు ముందే స్పష్టం చేశారు.

ఇది రాజకీయ పునర్వ్యవస్థీకరణలో ‘రెందో విడత’

రెబల్ ఎంపీలను పార్టీలోకి సాదరంగా ఆహ్వానించిన మహారాష్ట్ర ఉప ముఖ్యమంత్రి ఏకనాథ్ షిండే, ఈ పరిణామాన్ని రాజకీయ పునర్వ్యవస్థీకరణలో "రెండో విడత"గా అభివర్ణించారు. 2022లో ఉద్ధవ్ ఠాక్రేపై తాను చేసిన తిరుగుబాటుతో మొదటి విడత ప్రారంభమైందని ఆయన గుర్తుచేశారు. ఈ తాజా పరిణామం తమ క్యాంప్‌కు లభించిన ఒక ‘సిక్సర్’ లాంటిదని ఆయన కొనియాడారు.

బాలాసాహెబ్ ఠాక్రే ఆశయాలు, సిద్ధాంతాలకు తమ శివసేన మాత్రమే నిజమైన వారసురాలని, ఆ విలువలను కాపాడేందుకే తాము పోరాడుతున్నామని షిండే పునరుద్ఘాటించారు. రవాణా శాఖ మంత్రి, శివసేన నేత ప్రతాప్ సర్నాయక్ మాట్లాడుతూ.. ఏకనాథ్ షిండే, శ్రీకాంత్ షిండేల అద్భుతమైన పనితీరుకు ఆకర్షితులై ఈ ఆరుగురు ఎంపీలు పార్టీలో చేరారని తెలిపారు. వీరంతా లోక్‌సభ స్పీకర్ ఓం బిర్లాకు లేఖ సమర్పించారని, బాలాసాహెబ్ సిద్ధాంతాల మేరకే నడుచుకుంటారని ఆయన స్పష్టం చేశారు.