దగ్గు మందు రాస్తే కమీషన్.. 26 మంది చిన్నారుల మృతి కేసులో వైద్యుడికి బెయిల్ నిరాకరించిన సుప్రీం కోర్టు

మధ్యప్రదేశ్ ఛింద్వారాలో విషపూరిత 'కోల్డ్‌రిఫ్' సిరప్ తాగి 26 మంది పిల్లలు ప్రాణాలు కోల్పోయిన కేసులో నిందితుడైన డాక్టర్ ప్రవీణ్ సోనికి బెయిల్ ఇచ్చేందుకు సుప్రీంకోర్టు నిరాకరించింది. చార్జిషీట్ నమోదైనందున ఏడాది తర్వాతే బెయిల్ కోసం దరఖాస్తు చేసుకోవాలని స్పష్టం చేసింది.

విషపూరిత 'కోల్డ్‌రిఫ్' (Coldrif) దగ్గు మందు ప్రిస్క్రిప్షన్ రాసి ఇచ్చి 26 మంది చిన్నారుల దారుణ మరణానికి కారణమయ్యాడనే తీవ్ర ఆరోపణలు ఎదుర్కొంటున్న మధ్యప్రదేశ్ వైద్యుడు ప్రవీణ్ సోనికి అత్యున్నత న్యాయస్థానంలో చుక్కెదురైంది. ఈ తీవ్రమైన కేసులో అతనికి బెయిల్ మంజూరు చేసేందుకు సుప్రీంకోర్టు నిరాకరించింది.

చాలా సీరియస్ కేసు.. బెయిల్ ఇచ్చేది లేదు

దగ్గు మందు రాస్తే కమీషన్.. 26 మంది చిన్నారుల మృతి కేసులో వైద్యుడికి బెయిల్ నిరాకరించిన సుప్రీం కోర్టు

భారత ప్రధాన న్యాయమూర్తి (సీజేఐ) జస్టిస్ సూర్యకాంత్, జస్టిస్ జోయ్‌మాల్య బాగ్చీ, జస్టిస్ వి.మోహనలతో కూడిన త్రిసభ్య ధర్మాసనం ఈ పిటిషన్‌ను విచారించింది. నిందితుడిపై ఇటీవల మాత్రమే ఛార్జీలు మోపారని, ఈ దశలో విచారణ నుంచి ఊరట ఇవ్వడం సాధ్యం కాదని ధర్మాసనం స్పష్టం చేసింది.

"ఇది బెయిల్ ఇచ్చే కేసు ఎంతమాత్రం కాదు. నిందితుడు కొంతకాలం వేచి చూడాల్సిందే. 26 మంది చిన్నారులు ప్రాణాలు కోల్పోయారు. అర్హత కలిగిన ఒక వైద్యుడై ఉండి ఇలా వ్యవహరించడం మరింత తీవ్రమైన నేరం" అని సుప్రీంకోర్టు ధర్మాసనం వ్యాఖ్యానించింది. నిందితుడు తనపై ఉన్న ఆరోపణలను తప్పుగా నిరూపించుకోలేకపోతే యావజ్జీవ కారాగార శిక్ష పడే అవకాశముందని హెచ్చరించింది. కనీసం ఏడాది గడిచిన తర్వాతే మళ్లీ బెయిల్ కోసం దరఖాస్తు చేసుకోవచ్చని సూచించింది.

సిరప్‌లో పారిశ్రామిక విషరసాయనం

మధ్యప్రదేశ్ ఛింద్వారా జిల్లా పరాసియా సివిల్ ఆసుపత్రిలో పనిచేస్తున్న డాక్టర్ ప్రవీణ్ సోనిని 2025 అక్టోబర్ 5న పోలీసులు అరెస్టు చేశారు. 2025 సెప్టెంబర్ 4న మొదటి చిన్నారి మరణం నమోదైనప్పటికీ, అతను నిర్లక్ష్యంగా ఆ మందును రోగులకు రాయడం కొనసాగించాడని కేసు నమోదైంది. ఇతనిపై భారతీయ న్యాయ సంహిత (BNS) సెక్షన్ 105 తో పాటు డ్రగ్స్ అండ్ కాస్మెటిక్స్ యాక్ట్ 1940 కింద కేసులు నమోదు చేశారు.

ఈ దారుణం వెనుక అక్రమ సంపాదన కోణం కూడా ఉందని ప్రాసిక్యూషన్ కోర్టు దృష్టికి తీసుకెళ్లింది. డాక్టర్ సోని తన క్లినిక్ పక్కనే ఉండే 'అప్నా మెడికల్ స్టోర్' ద్వారా ఈ సిరప్‌ను విక్రయించేవాడు. ఆయన భార్య జ్యోతి సోని ప్రిస్క్రిప్షన్ లేకుండానే ఆ మందులను అమ్మేది. ప్రతి బాటిల్‌పై సోనికి 10 శాతం కమిషన్ దక్కగా, మెడికల్ షాప్‌కు రూ. 23 లాభం వచ్చినట్లు దర్యాప్తులో తేలింది.

నాలుగేళ్ల లోపు పిల్లలకు ఇటువంటి కాంబినేషన్ దగ్గు మందులు రాయకూడదని 2023 డిసెంబర్ 18న సీడీఎస్‌సీవో (CDSCO) జారీ చేసిన ఉత్తర్వులను కూడా సోని ఉల్లంఘించాడు. గతంలో 1998లో ఢిల్లీలో జరిగిన ఇటువంటి విషపూరిత సిరప్ విపత్తు గురించి నాగ్‌పూర్ సీనియర్ పీడియాట్రీషియన్ హెచ్చరించినప్పటికీ అతను పట్టించుకోలేదని నివేదిక పేర్కొంది.

కింది కోర్టుల్లోనూ నిరాశే

తాను కేవలం మందు మాత్రమే రాశానని, తయారీదారు అయిన 'శ్రీసన్ ఫార్మాస్యూటికల్స్' తప్పు మాత్రమే ఇందులో ఉందని డాక్టర్ సోని తరఫు న్యాయవాది సిద్ధార్థ్ దవే వాదించారు. 2005 నాటి 'జాకబ్ మాథ్యూ వర్సెస్ స్టేట్ ఆఫ్ పంజాబ్' తీర్పును ప్రస్తావిస్తూ రక్షణ పొందడానికి ప్రయత్నించినప్పటికీ కోర్టు అంగీకరించలేదు. ఇప్పటికే మధ్యప్రదేశ్ హైకోర్టు జూన్ 30, 2026న ఇతని రెండో బెయిల్ దరఖాస్తును తోసిపుచ్చగా, తాజాగా సుప్రీంకోర్టు కూడా బెయిల్ ఇచ్చేందుకు నిరాకరించింది.