వందే భారత్ స్లీపర్: బుకింగ్స్ మొదలైన గంటల్లోనే అమ్ముడైపోయిన టికెట్లు

దేశంలోనే తొలి వందే భారత్ స్లీపర్ రైలుకు ప్రయాణికులు బ్రహ్మరథం పట్టారు. గౌహతి - హౌరా మధ్య నడిచే ఈ రైలు టికెట్లు బుకింగ్ ప్రారంభమైన కొద్ది గంటల్లోనే హాట్ కేకుల్లా అమ్ముడయ్యాయి. సాధారణ రైళ్ల కంటే 3 గంటల ముందుగానే ఈ రైలు గమ్యాన్ని చేరుస్తుంది.

భారతీయ రైల్వేలో సరికొత్త విప్లవానికి నాంది పలికిన 'వందే భారత్ స్లీపర్' రైలుకు సామాన్య ప్రయాణికుల నుంచి అనూహ్య స్పందన లభించింది. ఎంతో కాలంగా ఎదురుచూస్తున్న ఈ స్లీపర్ వెర్షన్ టికెట్ల అమ్మకాలు ప్రారంభమైన కొద్ది గంటల్లోనే అన్నీ అమ్ముడయ్యాయి. ఈ మేరకు రైల్వే శాఖ మంగళవారం ఒక ప్రకటనలో ఈ విషయాన్ని వెల్లడించింది.

వందే భారత్ స్లీపర్ రైలును ప్రధానమంత్రి నరేంద్ర మోదీ జనవరి 17న మాల్దా టౌన్ నుంచి జెండా ఊపి ప్రారంభించారు (PTI)

రికార్డు స్థాయిలో బుకింగ్స్

దేశంలోనే మొట్టమొదటి వందే భారత్ స్లీపర్ రైలును ప్రధానమంత్రి నరేంద్ర మోదీ జనవరి 17న మాల్దా టౌన్ నుంచి జెండా ఊపి ప్రారంభించారు. అస్సాంలోని కామాఖ్య (గౌహతి) నుంచి కోల్‌కతాలోని హౌరా స్టేషన్ వరకు ఈ రైలు ప్రయాణిస్తుంది. ఈ రైలుకు సంబంధించి తొలి కమర్షియల్ ప్రయాణం గురువారం (జనవరి 22) ప్రారంభం కానుంది. రిజర్వేషన్లు ఓపెన్ చేసిన వెంటనే ప్రయాణికులు పోటీ పడి టికెట్లు బుక్ చేసుకోవడంతో అన్ని సీట్లు నిండిపోయాయి.

సమయం ఆదా.. ప్రయాణం హాయి

సాధారణ రైళ్లతో పోలిస్తే వందే భారత్ స్లీపర్ ప్రయాణ సమయాన్ని గణనీయంగా తగ్గిస్తుంది. సుమారు 14 గంటల్లోనే ఇది గమ్యస్థానానికి చేరుకుంటుంది. అంటే ప్రస్తుతం అందుబాటులో ఉన్న ఇతర రైళ్ల కంటే మూడు గంటల ముందే ప్రయాణికులు తమ గమ్యాన్ని చేరుకోవచ్చు. వారానికి ఆరు రోజులు అందుబాటులో ఉండే ఈ రైలు, అటు గౌహతి ఇటు కోల్‌కతా వాసులకు ఎంతో ఊరటనివ్వనుంది.

రైల్వే నమ్మకానికి నిదర్శనం

"టికెట్లు హాట్ కేకుల్లా అమ్ముడవ్వడం భారతీయ రైల్వే ప్రవేశపెట్టిన ఆధునిక సేవలపై ప్రజలకు ఉన్న నమ్మకాన్ని, ఉత్సాహాన్ని తెలియజేస్తోంది. ఈ ప్రాంతంలో ప్రీమియం రైలు కనెక్టివిటీలో ఇదొక కొత్త అధ్యాయం" అని రైల్వే అధికారులు హర్షం వ్యక్తం చేశారు. అత్యాధునిక వసతులు, వేగం, భద్రత కలగలిసిన వందే భారత్ స్లీపర్ రైలు త్వరలోనే దేశంలోని మరిన్ని ప్రధాన నగరాల మధ్య అందుబాటులోకి వచ్చే అవకాశం ఉంది.