యోగనిద్ర నుంచి మేల్కొననున్న శ్రీమహావిష్ణువు.. ప్రబోధిని ఏకాదశి విశేషాలు, పూజా సమయాలు!

చాతుర్మాస దీక్ష ముగింపును సూచించే దేవుత్తాని ఏకాదశి (ప్రబోధిని ఏకాదశి) రోజున శ్రీ మహావిష్ణువు యోగనిద్ర నుంచి మేల్కొంటారని భక్తులు విశ్వసిస్తారు. ఈ పర్వదినంతో శుభకార్యాలు, వివాహ వేడుకలు తిరిగి ప్రారంభమవుతాయని సంప్రదాయం చెబుతోంది.

చాతుర్మాస దీక్షకు తెరదించుతూ, జగత్పాలకులు శ్రీ మహావిష్ణువు యోగ నిద్ర నుంచి మేల్కొనే పవిత్రమైన దేవుత్తాని ఏకాదశి (ప్రబోధిని ఏకాదశి) వేళ వచ్చేసింది. ఈ పర్వదినంతోనే తెలుగు రాష్ట్రాల్లోనూ, దేశవ్యాప్తంగానూ శుభకార్యాలు, పెళ్లిళ్లు అంకురార్పణ కానున్నాయి. అయితే ఈ ఏడాది నవంబర్ 20న రాబోయే ఈ ఏకాదశిపై 'భద్ర' నీడ కమ్ముకోవడం భక్తులలో కొన్ని సందేహాలకు తావిస్తోంది.

భద్ర ప్రభావం ఉందా? ఆందోళన అవసరమా?

యోగనిద్ర నుంచి మేల్కొననున్న శ్రీమహావిష్ణువు.. ప్రబోధిని ఏకాదశి విశేషాలు, పూజా సమయాలు!

హిందూ ధర్మంలో భద్రను అశుభకరమైన కాలంగా పరిగణిస్తారు. ఈసారి ఈ ఏకాదశి రోజున సాయంత్రం 07:01 గంటలకు భద్ర ప్రారంభమై, మరుసటి రోజు నవంబర్ 21 ఉదయం 06:32 గంటల వరకు భూలోకంలోనే సంచరించనుంది. భూలోక భద్ర సమయంలో ఎలాంటి శుభకార్యాలు, పూజాదికాలు నిర్వహించడం వర్జ్యం అనే నమ్మకం ఉంది. దీంతో పూజా నియమాల్లో మార్పులు వస్తాయా అని భక్తులు ఆందోళన చెందుతున్నారు.

పండితులు ఏం చెబుతున్నారు? ఉత్తమ పూజా సమయాలు

ఏకాదశి నాడు భద్ర రాత్రి 7 గంటల తర్వాతే ప్రారంభమవుతుంది కాబట్టి, ఆ సమయానికి ముందే లేదా సూర్యాస్తమయ వేళ శ్రీహరిని ఆరాధించడం అత్యంత శ్రేయస్కరం. ఒకవేళ ఆ సమయానికి కుదరకపోతే, గోధూళి ముహూర్తం లేదా ఇతర శుభ ఘడియలలో భగవంతుడిని పూజించుకోవచ్చు. ఈ రోజున గోధూళి ముహూర్తం సాయంత్రం 05:22 నుంచి 05:49 వరకు ఉంటుంది.

ఏకాదశి ముఖ్య ముహూర్తాలు

ఈ ఏడాది ఏకాదశి తిథి నవంబర్ 20, 2026 ఉదయం 07:16 గంటలకు ప్రారంభమై, నవంబర్ 21 ఉదయం 06:32 గంటలకు ముగుస్తుంది. పూజల కోసం అభిజిత్ ముహూర్తం (ఉదయం 11:43 నుంచి మధ్యాహ్నం 12:31 వరకు), ప్రదోష కాలం (సాయంత్రం 05:25 నుంచి రాత్రి 08:06 వరకు) అత్యంత అనుకూలమైనవిగా పండితులు తెలిపారు. భద్ర ప్రారంభానికి ముందే పూజా కార్యక్రమాలను పూర్తి చేసుకోవడం వల్ల ఎలాంటి దోషాలు వుండవు.