Lord Hanuman: అష్టసిద్ధి నవనిధి కే దాత.. హనుమంతుడి అష్ట సిద్ధులు, నవ నిధులు.. భక్తులకు లభించే ఆ అపార శక్తుల రహస్యమేంటి?

Lord Hanuman: "అష్ట సిద్ధి నవ నిధి కే దాతా.." అని మనం హనుమాన్ చాలీసాలో చదువుతుంటాం. అసలు ఆ అష్ట సిద్ధులు, నవ నిధులు అంటే ఏమిటి? వీటిని హనుమంతుడు ఎప్పుడు ఉపయోగించాడు? హనుమంతుడికి ఆ శక్తులు ఎలా లభించాయి? వాటి పూర్తి వివరాలు మీకోసం.

హనుమాన్ చాలీసాలో మనం “అష్టసిద్ధి నవనిధి కే దాత” అనే చదువుతాము. అసలు దాని అర్థం ఏంటి? అసలు అష్టసిద్ధులు, నవనిధులు అంటే ఏంటి? హనుమంతుడికి ఈ శక్తులు ఏ విధంగా లభించాయి? వాటి తాలూకా వివరాలను ఇప్పుడు స్పష్టంగా తెలుసుకుందాం.

Lord Hanuman: అష్టసిద్ధి నవనిధి కే దాత.. హనుమంతుడి అష్ట సిద్ధులు, నవ నిధులు.. (pinterest)

అపారమైన భక్తి, తిరుగులేని శక్తి..

హనుమంతుడంటే మొట్టమొదట మనకి గుర్తొచ్చేది ఇవే. హనుమంతుడిని ఆరాధించడం వలన ధైర్యంతో పాటు సకల కార్యసిద్ధి కలుగుతుందని అందరూ నమ్ముతారు. హనుమాన్ చాలీసాలో ''అష్టసిద్ధి నవనిధి కే దాత, అస్ బర్ దీన్ జానకీ మాతా'' అనే పంక్తులు కనిపిస్తాయి. జానకి మాత అంటే సీతాదేవి. సీతాదేవి అనుగ్రహం వలన హనుమంతుడు ఎనిమిది సిద్ధులకు అధిపతి అయ్యాడని ఈ పంక్తుల అర్థం. అయితే ఇప్పుడు సనాతన ధర్మం ప్రకారం ఈ అష్టసిద్ధులు, నవనిధులు ఏవి అనే విషయాన్ని తెలుసుకుందాం.

అష్టసిద్ధులు అంటే ఏంటి? వీటిని హనుమంతుడు ఎప్పుడు ఉపయోగించాడు?

యోగశాస్త్రం ప్రకారం చూసినట్లయితే, సిద్ధులు అంటే అసాధారణమైన శక్తులు. హనుమంతుడు వీటిని ఇష్టానుసారంగా ప్రయోగించగలుగుతాడు. మరి ఇక ఈ అష్టసిద్ధుల గురించి తెలుసుకుందాం.

1.అణిమ:

అణిమ అంటే శరీరాన్ని చిన్న అణువు అంత పరిమాణంలోకి మార్చుకోగలిగే శక్తి. లంకలోకి ప్రవేశించినప్పుడు హనుమంతుడు దీనిని ఉపయోగించాడు.

2.మహిమ:

శరీరాన్ని ఎంత పెద్ద పరిమాణానికైనా విస్తరింపజేసే శక్తిని మహిమ అంటారు. సముద్రాన్ని దాటేటప్పుడు సురస అనే రాక్షసి ముందు ఈ రూపాన్ని హనుమంతుడు ప్రదర్శించాడు.

3.గరిమ:

శరీరాన్ని బాగా బరువుగా మార్చుకోవడమే గరిమ. భూమి కూడా మోయలేనంత బరువుగా హనుమంతుడు ఈ శక్తితో మారగలడు. మహాభారతంలో భీముని గర్వాన్ని అణచివేయడానికి హనుమంతుడు తన తోకను గరిమ సిద్ధితో బరువుగా మార్చేశాడు.

4.లఘిమ:

శరీరాన్ని చాలా తేలికగా, గాలి కంటే తేలికగా మార్చుకోవడమే ఈ శక్తి. ఈ శక్తి కారణంగా స్వామి ఆకాశంలో వేగంగా ఎగరగలిగాడు.

5.ప్రాప్తి:

ఎక్కడికైనా క్షణాల్లో చేరుకోగలగడమే ప్రాప్తి శక్తి. ఈ సిద్ధితో పశు, పక్ష్యాదుల భాషను కూడా అర్థం చేసుకోగలరు.

6.ప్రాకామ్యం:

మనసులో అనుకున్నది సాధించగలగడం, భూమి లోపలికి వెళ్లిపోవడం, ఆకాశంలోకి వెళ్లిపోవడం లాంటివి ఈ శక్తి కిందకి వస్తాయి.

7.ఈశిత్వం:

ఈశిత్వం అంటే దైవత్వ శక్తి. అంటే ప్రకృతిని కూడా అధీనంలోకి తీసుకోగలగడం.

8.వశిత్వం:

ఎవరినైనా వశం చేసుకోగలే శక్తి. ఇంద్రియాలను జయించి పూర్తిగా మనసును అదుపులో ఉంచుకోవడమే ఇది.

నవనిధులు అంటే ఏంటి? భక్తులకు హనుమంతుడు ఏమి ఇవ్వగలడు?

కుబేరుడి దగ్గర ఉండే తొమ్మిది రకాల సంపదలను నవనిధులు అని అంటారు. సీతాదేవి ఇచ్చిన వరంతో హనుమంతుడు వీటిని భక్తులకు ఇవ్వగలడు.

1.మహాపద్మ నిధి:

దీని కారణంగా వంశం గొప్పగా అభివృద్ధి చెందగలదు. సాత్వికమైన సంపద ఇది.

2.పద్మ నిధి:

స్వచ్ఛమైన బంగారు ఆభరణాలు, రత్నాలు లాంటి సంపద కూడా హనుమాన్ తన భక్తులకు ఇవ్వగలడు.

3.శంఖ నిధి:

శంఖం లాంటి ఐశ్వర్యాన్ని హనుమంతుడు ఇవ్వగలడు.

4.మకర నిధి:

ఆయుధ విజ్ఞానం, అపారమైన ధైర్యాన్ని ఇచ్చే సంపద ఇది.

5.కచ్ఛప నిధి:

భూములు, వాహనాలు వంటి సంపదలను హనుమంతుడు ఈ నిధి ద్వారా భక్తులకు ఇవ్వగలడు.

6.ముకుంద నిధి:

కళలు, సంగీతం, విజ్ఞానంపై పట్టు తీసుకువచ్చే సంపద ఇది.

7.కుంద నిధి:

వ్యాపారాల్లో లాభాలను తీసుకువచ్చే ఐశ్వర్యం.

8.నీల నిధి:

అన్ని రకాల సుఖభోగాలను హనుమంతుడు నీల నిధి ద్వారా భక్తులకు ప్రసాదించగలడు.

9.ఖర్వ నిధి:

శత్రువుల నుంచి రక్షణను కల్పించగలదు. ఎదురులేని విజయాన్ని ఈ నిధి ద్వారా భక్తులకు ప్రసాదించగలడు.