తులసి మొక్కకు నీరు పోసేటప్పుడు ఈ మంత్రాలు జపించండి.. లక్ష్మీదేవి అనుగ్రహం కలుగుతుందని నమ్మకం!

హిందూ సంప్రదాయంలో తులసి మొక్కకు పవిత్రమైన స్థానం ఉంది. తులసిని లక్ష్మీదేవి స్వరూపంగా, శ్రీమహావిష్ణువుకు ప్రియమైనదిగా భక్తులు భావిస్తారు. ఉదయం తులసి మొక్కకు నీరు సమర్పించేటప్పుడు ప్రత్యేక మంత్రాలను జపించడం, ప్రదక్షిణలు చేయడం శుభప్రదమని నమ్ముతారు.

హిందూ ధర్మంలో తులసి మొక్కకు దైవిక స్థానం ఉంది. ఏ ఇంట అయితే తులసి మొక్క ఉంటుందో, అక్కడ సాక్షాత్ లక్ష్మీదేవి కొలువై ఉంటుందని భక్తుల నమ్మకం. శ్రీమహావిష్ణువుకి అత్యంత ప్రియమైన మొక్క కావడంతో నిత్యం తులసిని పూజించడం, నీరు సమర్పించడం మన సంప్రదాయంలో వస్తోంది. అయితే, కేవలం నీళ్లు పోయడమే కాకుండా కొన్ని ప్రత్యేక నియమాలను పాటించడం వల్ల అద్భుతమైన ఫలితాలు ఉంటాయి.

తులసి మొక్కకు నీరు పోసేటప్పుడు ఈ మంత్రాలు జపించండి.. లక్ష్మీదేవి అనుగ్రహం కలుగుతుందని నమ్మకం!

పూజ చేసే సమయంలో ఈ మంత్రాలను జపించండి

ఉదయం పూట తులసి మొక్కకు నీరు సమర్పించే సమయంలో ప్రత్యేకమైన మంత్రాలను పఠించడం ఎంతో శుభప్రదం. ఈ మంత్రాలను భక్తిశ్రద్ధలతో ఉచ్చరించడం ద్వారా మనసులోని ఆందోళనలు తొలగిపోయి, కుటుంబంలో సానుకూల శక్తి పెరుగుతుంది.

మహాప్రసాద జనని, సర్వ సౌభాగ్య వర్దిని

ఆధి వ్యాధి హరా నిత్యం తులసి త్వం నమోస్తుతే..

ఈ మంత్రానికి అర్థం ఏమిటంటే.. తులసి దేవి మీరు దేవుని మహా ప్రసాదాన్ని ప్రసాదించేవారు, సకల సౌభాగ్యాలను చేకూర్చేవారు. శారీరక, మానసిక బాధలను హరించే తులసి తల్లికి మీకు నమస్కారాలు.

అలాగే “ఓం తులస్యై నమః”, “ఓం సుభద్రాయై నమః”, “ఓం శ్రీం హ్రీం క్లీం ఐం బృందావన్యై స్వాహా” వంటి మంత్రాలను కూడా పూజా సమయంలో స్మరించుకోవచ్చు.

నీరు పోసేటప్పుడు పాటించాల్సిన నియమాలు

తులసి మొక్కకు నీరు సమర్పించేటప్పుడు దిశ చాలా ముఖ్యం. వాస్తు శాస్త్రం ప్రకారం తూర్పు లేదా ఉత్తర దిశ వైపు ముఖం పెట్టి నీరు పోయడం అత్యంత శుభదాయకం. ఇలా చేయడం వల్ల సానుకూల ఫలితాలు కలుగుతాయి. అలాగే నీరు సమర్పించిన తర్వాత మొక్క చుట్టూ మూడు సార్లు ప్రదక్షిణ చేయడం మంచిది. ప్రదక్షిణ చేసే సమయంలో మనసును ప్రశాంతంగా ఉంచుకుంటూ తులసి నామాలను స్మరించాలి. ఎవరితోనూ గొడవపడకుండా ప్రశాంతంగా పూజను ముగించాలి.

తప్పకుండా గుర్తుంచుకోవాల్సిన విషయాలు

తులసి పూజలో పరిశుభ్రతకు చాలా ప్రాధాన్యత ఉంది. ఎప్పుడూ కూడా మలినమైన లేదా అశుద్ధమైన చేతులతో తులసి మొక్కను తాకకూడదు.

నీరు పోసేందుకు రాగి చెంబుని ఉపయోగించడం చాలా శ్రేయస్కరం.

అదే విధంగా ఆదివారం, ఏకాదశి తిథులతో పాటు సూర్య, చంద్ర గ్రహణాలు ఏర్పడిన రోజుల్లో తులసికి నీరు పోయకూడదని పెద్దలు చెబుతుంటారు.

ఈ నియమాలను తూచా తప్పకుండా పాటిస్తే లక్ష్మీదేవి కటాక్షం ఎల్లప్పుడూ ఇంట్లోనే ఉంటుంది.