E-Paper
Vikarabad : అనంతగిరి ఘాట్‌రోడ్డులో ఘోర ప్రమాదం - ప్రైవేట్ బస్సు బోల్తా, నలుగురు దుర్మరణం!
Vikarabad Ananthagiri Ghat Bus Accident : వికారాబాద్ జిల్లా అనంతగిరి ఘాట్ రోడ్డులో ప్రైవేటు బస్సు బోల్తా పడి నలుగురు మహిళలు ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. ఈ ఘటనపై సీఎం రేవంత్ రెడ్డి, గవర్నర్, కేటీఆర్ తీవ్ర దిగ్భ్రాంతి వ్యక్తం చేశారు.
Prefer HTon Google
వికారాబాద్ జిల్లా అనంతగిరి ఘాట్ రోడ్డులో ఘోర రహదారి ప్రమాదం జరిగింది. ఓ ప్రైవేటు ట్రావెల్స్ బస్సు నియంత్రణ తప్పి తీవ్ర ప్రమాదానికి గురైంది. ఘాట్ రోడ్డు మలుపు వద్ద బస్సు పక్కకు దూసుకెళ్లి బోల్తా పడటంతో అక్కడికక్కడే నలుగురు మహిళలు ప్రాణాలు కోల్పోగా… మరో ఏడుగురు ప్రయాణికులు తీవ్రంగా గాయపడ్డారు.
సంగారెడ్డి జిల్లా పటాన్‌చెరు సమీపంలోని కేసారం గ్రామానికి చెందిన బాధితులు వికారాబాద్ జిల్లా ధరూర్‌ మండలం చింతకుంట గ్రామంలో జరుగుతున్న బంధువుల అంత్యక్రియల కార్యక్రమంలో పాల్గొనేందుకు బయలుదేరారు. మొత్తం 50 మందికిపైగా ప్రయాణికులు బస్సులో ఉన్నారు. ఈ క్రమంలో అనంతగిరి కొండ పైనుంచి కిందికి దిగుతున్న సమయంలో…. అత్యంత ప్రమాదకరమైన ఘాట్ రోడ్డు మలుపు వద్ద బస్సు ఒక్కసారిగా అదుపుతప్పి రోడ్డు పక్కనున్న లోయ వైపు బోల్తా పడింది.
బస్సు బోల్తా పడటంతో లోపల ఉన్న ప్రయాణికులు తీవ్ర భయాందోళనలతో కేకలు వేశారు. సమాచారం అందుకున్న వెంటనే పోలీసులు, స్థానికులు హుటాహుటిన ఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని వెంటనే వికారాబాద్ ఏరియా ఆసుపత్రికి తరలించారు. గాయపడిన ఏడుగురిలో ఇద్దరి ఆరోగ్య పరిస్థితి అత్యంత విషమంగా ఉన్నట్లు వైద్యులు తెలిపారు.
ప్రమాద వార్త తెలిసిన వెంటనే వికారాబాద్ జిల్లా కలెక్టర్ దీపక్ తివారీ ఘటనా స్థలాన్ని స్వయంగా పరిశీలించారు. క్షతగాత్రులను కాపాడేందుకు సహాయక చర్యలను వేగవంతం చేయాలని అధికారులను ఆదేశించారు. బాధితులకు మెరుగైన వైద్య సేవలు అందేలా చూడాలని ఆసుపత్రి వర్గాలకు సూచించారు.
సీఎం కీలక ఆదేశాలు…
ఈ ఘోర ప్రమాదంపై ముఖ్యమంత్రి రేవంత్ రెడ్డి తీవ్ర దిగ్భ్రాంతి వ్యక్తం చేశారు. మృతి చెందిన వారి కుటుంబాలకు తన ప్రగాఢ సానుభూతి తెలిపారు. గాయపడిన వారికి అత్యుత్తమ వైద్య సేవలు అందించాలని అధికారులను ఆదేశించారు.
ఈ దుర్ఘటనపై తెలంగాణ గవర్నర్ శ్రీ జిష్ణు దేవ్ వర్మ తీవ్ర దిగ్భ్రాంతి వ్యక్తం చేశారు. మృతుల కుటుంబ సభ్యులకు సంతాపం తెలిపి, గాయపడిన వారు త్వరగా కోలుకోవాలని ఆకాంక్షించారు. బాధితులకు తక్షణమే అవసరమైన సహాయక చర్యలు అందించాలని సూచించారు.
అలాగే బీఆర్ఎస్ వర్కింగ్ ప్రెసిడెంట్ కేటీఆర్ ఈ ఘటనపై ఆవేదన వ్యక్తం చేశారు. మృతుల కుటుంబాలకు సానుభూతి తెలిపిన ఆయన, స్థానిక బీఆర్ఎస్ నాయకులు, కార్యకర్తలు తక్షణమే సహాయక చర్యల్లో పాల్గొనాలని పిలుపునిచ్చారు. బాధితులకు వైద్య సహాయం అందేలా అధికారులతో సమన్వయం చేసుకోవాలని పార్టీ శ్రేణులను ఆదేశించారు.
