ప్రైవేట్ పాఠశాలు, కాలేజీల్లో ఆధార్ ఆపరేటర్లను అనుమతించాలి : విద్యా శాఖ

ప్రైవేట్ పాఠశాలు, కాలేజీల్లో ఆధార్ ఆపరేటర్లను అనుమతించాలని విద్యా శాఖ కోరింది. అర్హులైన విద్యార్థులు ఈ అవకాశాన్ని సద్వినియోగం చేసుకోవాలని తెలిపింది.

అర్హులైన విద్యార్థులకు తప్పనిసరి అయిన బయోమెట్రిక్ అప్‌డేట్‌లను పూర్తి చేయడానికి కొన్ని విద్యాసంస్థలు అనుమతించడం లేదని అధికారులు గుర్తించారు. ఈ మేరకు ప్రైవేట్ పాఠశాలలు, ఇంటర్మీడియట్ కళాశాలలు తమ క్యాంపస్‌లలోకి ఆధార్ ఆపరేటర్లను అనుమతించాలని తెలంగాణ పాఠశాల విద్యాశాఖ కోరింది.

ఆధార్ క్యాంపులు

పాఠశాల విద్యా డైరెక్టర్, సమగ్ర శిక్ష రాష్ట్ర ప్రాజెక్ట్ డైరెక్టర్, యూనిక్ ఐడెంటిఫికేషన్ అథారిటీ ఆఫ్ ఇండియా అధికారులతో కార్యక్రమ పురోగతిని సమీక్షించిన తర్వాత ఈ ఆదేశం వెలువడింది. ఈ సమీక్షలో పాఠశాలకు వెళ్లే పిల్లల ఆధార్ బయోమెట్రిక్ అప్‌డేట్‌ల స్టేటస్, తరగతులకు అంతరాయం కలగకుండా రాష్ట్రవ్యాప్తంగా ఈ పనిని పూర్తి చేయడానికి అవసరమైన చర్యలను పరిశీలించారు.

విద్యార్థుల చెల్లుబాటు అయ్యే ఆధార్ రికార్డులను నిర్వహించడానికి, వివిధ విద్యార్థి సంబంధిత సేవలను సులభతరం చేయడానికి ఈ కార్యక్రమం అవసరం. అన్ని విద్యా సంస్థలు ఆధార్ బృందాలకు సహకరించాలని విద్యాశాఖ డైరెక్టర్ అన్నారు. ఆధార్ ఆపరేటర్లకు స్థలం, సపోర్ట్, సమన్వయం అందించాలని పాఠశాలలను కోరారు. విద్యాశాఖ జిల్లా విద్యాధికారులు, క్షేత్రస్థాయి అధికారులతో వీడియో కాన్ఫరెన్స్ కూడా నిర్వహించింది. యూఐడీఏఐ, ఆధార్ బృందాలతో కలిసి పనిచేయాలని, అలాగే ఆధార్ ఆపరేటర్ల సందర్శన షెడ్యూళ్లను పాఠశాలలకు చాలా ముందుగానే తెలియజేయాలని డీఈఓలకు సూచించారు.

ఆధార్ అప్డేట్ ప్రాముఖ్యతను వివరించడానికి ప్రైవేట్ పాఠశాలలు, ఇంటర్మీడియట్ సంస్థలతో సమావేశాలు నిర్వహించాలని జిల్లా అధికారులకు కూడా సూచించారు. 'సాధారణ విద్యా కార్యకలాపాలకు అంతరాయం కలిగించకుండా ఈ కార్యక్రమాన్ని నిర్వహించాలి.' అని విద్యాశాఖ డైరెక్టర్ అన్నారు. ఈ కార్యక్రమాన్ని క్రమం తప్పకుండా పర్యవేక్షించి, పురోగతి నివేదికలను సమర్పించాలని డీఈఓలను విద్యాశాఖ ఆదేశించింది. విద్యార్థుల ప్రయోజనాల దృష్ట్యా ప్రైవేట్ పాఠశాలలు, ఇంటర్మీడియట్ కళాశాలలు, ఇతర విద్యా సంస్థలు పూర్తి సహకారం అందించాలని కోరింది.