దంతేరాస్‌కు ఏపీ, తెలంగాణలో బంగారం కొంటున్నారా? గోల్డ్ షాపింగ్ గైడ్

Gold Shopping Guide : దంతేరాస్‌కు ఏపీ, తెలంగాణలోనూ బంగారం కొనేవారు చాలా మందే ఉంటారు. బంగారం కొనుక్కోవడం మంచిదే. కానీ షాపింగ్ చేసే సమయంలో కొన్ని విషయాలు గుర్తుంచుకోవాలి.

దంతేరాస్‌కు బంగారం, వెండి లేదా వజ్రాభరణాలు కొనుగోలు చేయడం శుభప్రదంగా భావిస్తారు. ఈ రోజున చిన్న లక్ష్మీదేవి బంగారు నాణెం కొన్నా.. ఇంట ఐశ్వర్యం తులతూగుతుందని విశ్వసిస్తారు. అయితే పండుగ వేళ కస్టమర్ల రద్దీ, వ్యాపారుల ఆకర్షణీయమైన డిస్కౌంట్ ఆఫర్ల మాయలో పడి మోసపోకుండా ఉండాలంటే కొనుగోలుదారులు పలు కీలక అంశాలపై అవగాహన పెంచుకోవాలని నిపుణులు సూచిస్తున్నారు. బంగారం, డైమండ్, వెండి ఆభరణాలు కొనేటప్పుడు తీసుకోవాల్సిన జాగ్రత్తలు, హిడెన్ ఛార్జీల వెనక ఉన్న నిజాలను లెక్కలు వేసుకోవాలి.

ప్రతీకాత్మక చిత్రం

రోజూ ధరించే బంగారు ఆభరణాలకు 22 క్యారెట్ల 916 బీఐఎస్ హాల్‌మార్క్ పసిడి సరైన ఎంపిక. దీనిలో 91.6 శాతం స్వచ్ఛమైన బంగారం ఉంటుంది. తయారీ ఆధారంగా తరుగు, ఇతర ఛార్జీలు ఉంటాయి.

సాధారణంగా వజ్రాభరణాలు లేదా రత్నాలు పొదిగిన నగలలో 18 క్యారెట్ల (75.0 శాతం స్వచ్ఛత) బంగారాన్ని ఉపయోగిస్తారు. ఇవి తక్కువ బరువుతో, తక్కువ ధరలోనే ఎక్కువ పరిమాణంలో డిజైనర్ లుక్ ఇస్తాయి.

ఆభరణాలు చేయడానికి 24 క్యారెట్ల బంగారం పనికిరాదు. నాణేలు, బిస్కెట్లు కొనుగోలు చేసేవారు మాత్రమే 24 క్యారెట్ల స్వచ్ఛమైన పసిడిని ఎంచుకోవాలి. మీరు కొనే ప్రతి బంగారు వస్తువుపై 6 అక్షరాలు/అంకెలతో కూడిన HUID నంబర్ ఉందో లేదో తప్పనిసరిగా తనిఖీ చేయండి. 'BIS CARE App' ద్వారా HUID నంబర్ నమోదు చేసి ఆభరణం స్వచ్ఛతను నిమిషాల్లో ధృవీకరించుకోవచ్చు.

వజ్రాభరణాలు కొనుగోలు చేసేటప్పుడు కేవలం డిజైన్ మాత్రమే కాకుండా అంతర్జాతీయంగా ఆమోదించిన 4సీ సూత్రాన్ని పరిశీలించాలి. అవి : కట్ అంటే వజ్రం చెక్కడపు నాణ్యత, దాని మెరుపు. కలర్ అనగా.. రంగు చూడడం, క్లారిటీ అంటే లోపాలు లేదా మచ్చలు లేకపోవడం. మరో సీ అంటే క్యారెట్ బరువు వివరాలు చూసుకోవాలి. వీటితో పాటు సదరు వజ్రానికి జీఐఏ, ఐజీఐ వంటి అంతర్జాతీయ సంస్థల సర్టిఫికేషన్ ఉందో లేదో సరిచూసుకోవడం తప్పనిసరి.

మీరు బంగారం, వెండి లేదా డైమండ్ ఏదైనా కొనుగోలు చేసేటప్పుడు ప్రస్తుత ధర ఎంత? భవిష్యత్తులో ఆ నగను తిరిగి అదే షాప్‌లో బైబ్యాక్ చేసినా లేదా వేరే నగా మార్చుకున్నా ఎంత తగ్గింపు ఇస్తారు? అనే వివరాలను స్పష్టంగా అడిగి తెలుసుకోవాలి. రసీదులో ఉంటే ఇంకా మంచిది.

దంతేరాస్ రోజున భారీగా డబ్బు వెచ్చించి నగలు కొనలేని వారికి సేల్స్ సిబ్బంది నెలవారీ బంగారం పొదుపు పథకాలకు తీసుకోవాలని సూచిస్తుంటారు. స్కీమ్‌లో చేర్పించడం వారి బాధ్యత. కానీ ఆ స్కీమ్ గురించి మీరు ఒకటికి పదిసార్లు వంద రకాల ప్రశ్నలు అడగటం మంచిది. స్కీమ్‌లో చేరే ముందే కాలపరిమితి ముగిసిన తర్వాత కొనుగోలు చేసే నగలపై మేకింగ్, వీఏ ఛార్జీల మినహాయింపు ఎంతవరకు వర్తిస్తుందో వివరాలు తెలుసుకోవాలి.