CM Revanth Reddy : అంతా ఉద్యోగుల వల్లే.. కరీంనగర్‌లో సీఎం రేవంత్ రెడ్డి కీలక వ్యాఖ్యలు!

CM Revanth Reddy : సంక్షేమ పథకాలు ప్రజలకు చేరేందుకు ఉద్యోగులే ప్రభుత్వ ప్రతినిధులని సీఎం రేవంత్‌రెడ్డి చెప్పారు. అందరి సహకారంతోనే సమస్యలు పరిష్కరిస్తూ ప్రభుత్వం ముందుకెళ్తోందని స్పష్టం చేశారు.

ప్రభుత్వ సంక్షేమ, అభివృద్ధి ఫలాలు క్షేత్రస్థాయిలోని ప్రతి పేదవానికి చేరువ కావడంలో ప్రభుత్వ ఉద్యోగుల పాత్ర అత్యంత కీలకమని తెలంగాణ ముఖ్యమంత్రి రేవంత్ రెడ్డి స్పష్టం చేశారు. కరీంనగర్ జిల్లాలో పర్యటించిన సీఎం.. అక్కడి నూతన కలెక్టరేట్ భవన సముదాయాన్ని అధికారికంగా ప్రారంభించారు. అనంతరం కలెక్టరేట్ ఆవరణలో నూతనంగా ఏర్పాటు చేసిన తెలంగాణ తల్లి విగ్రహాన్ని ఆవిష్కరించి, పలు అభివృద్ధి పనులకు శంకుస్థాపనలు చేశారు.

సీఎం రేవంత్ రెడ్డి

ఈ సందర్భంగా నిర్వహించిన ఉన్నతాధికారుల సమీక్షా సమావేశంలో సీఎం రేవంత్ రెడ్డి మాట్లాడారు. సమస్యల పరిష్కారం కోసం కలెక్టరేట్‌కు వచ్చే సామాన్య ప్రజలను అధికారులు తమ కుటుంబ సభ్యుల్లా భావించి ఆదరించాలని ముఖ్యమంత్రి సూచించారు.

రాష్ట్రంలోని 4 కోట్ల మంది ప్రజలకు సేవ చేయడానికి కేవలం 10.5 లక్షల మంది ప్రభుత్వ ఉద్యోగులు మాత్రమే ఉన్నారని, ఇది ఎంతో శ్రమతో కూడుకున్న బాధ్యత అని రేవంత్ రెడ్డి పేర్కొన్నారు. పాలనకు మంచి పేరు వచ్చినా, చెడ్డ పేరు వచ్చినా అది అధికారుల పనితీరుపైనే ఆధారపడి ఉంటుందన్నారు. ప్రభుత్వ చట్టాలు, నిధులు ఎంత ఉన్నా వాటిని ప్రజలకు చేరవేసే వారధి ఉద్యోగులేనని తెలిపారు.

ప్రభుత్వ ఉద్యోగుల సమస్యలను ఒక్కొక్కటిగా పరిష్కరిస్తున్నామని, వారి సంక్షేమమే లక్ష్యంగా రూ. 944 కోట్ల అంచనా వ్యయంతో పలు సంక్షేమ పనులను ప్రారంభించినట్లు రేవంత్ రెడ్డి వెల్లడించారు. క్షేత్రస్థాయిలో సమస్యలు ఎదురవుతున్నప్పటికీ, సేవలు అందిస్తూనే వాటిని అధిగమించాలని పిలుపునిచ్చారు.

కేంద్ర, రాష్ట్ర ప్రభుత్వాలు సమన్వయంతో ముందుకెళ్లినప్పుడే వేగవంతమైన అభివృద్ధి సాధ్యమవుతుందని సీఎం తెలిపారు. ఎన్నికల సమయంలో మాత్రమే రాజకీయాలు చేయాలని, ఎన్నికలు లేని సాధారణ సమయంలో కేంద్రం, రాష్ట్రం ఇచ్చిపుచ్చుకునే ధోరణితో అభివృద్ధిపై దృష్టి సారించాలని స్పష్టం చేశారు.