దిమ్మతిరిగేలా తెలంగాణలో దసరా లిక్కర్ సేల్స్.. ఎన్ని కోట్ల అమ్మకాలు తెలుసా?

తెలంగాణలో ఈసారి దసరాకు మద్యం అమ్మకాలు రికార్డు సృష్టించాయి. కేవలం 19 రోజుల్లో లెక్కలు చూసుకుంటే.. రెండు వేల కోట్లు రూపాయలకు పైగానే మద్యం అమ్మకాలు జరిగాయి.

తెలంగాణలో విజయదశమి వేడుకల వేళ మద్యం విక్రయాలు నయా రికార్డులను సృష్టించాయి. దసరా పండుగ సందర్భంగా మందుబాబులు పెద్దఎత్తున కొనుగోళ్లు జరపడంతో ఎక్సైజ్ శాఖకు కాసుల వర్షం కురిసింది. అక్టోబర్ 1వ తేదీ నుంచి 19వ తేదీ వరకు.. కేవలం 19 రోజుల వ్యవధిలోనే రాష్ట్రవ్యాప్తంగా రూ.2,054.51 కోట్ల విలువైన మద్యం విక్రయాలు జరిగినట్లు ఎక్సైజ్ శాఖ అధికారిక వర్గాలు వెల్లడించాయి. గత ఏడాది దసరా సీజన్‌తో పోలిస్తే ఈసారి మద్యం అమ్మకాల్లో ఏకంగా 37.02 శాతం వృద్ధి నమోదు కావడం గమనార్హం.

తెలంగాణలో దసరా లిక్కర్ సేల్స్

దసరా పండుగకు ముందు రోజైన అక్టోబర్ 19న రాష్ట్రంలో మద్యం అమ్మకాలు ఆకాశాన్ని తాకాయి. ఒక్క రోజే ఏకంగా రూ. 303.40 కోట్ల విలువైన మద్యం అమ్ముడై సరికొత్త రికార్డు సృష్టించింది. గత ఏడాదితో పోలిస్తే ఈ ఒక్కరోజు విక్రయాల్లో ఏకంగా 801.90 శాతం అసాధారణ పెరుగుదల కనిపించింది.

తెలంగాణ ప్రజల్లో బీర్ల వినియోగం ఎప్పుడూ ఎక్కువేనని ఈ దసరా విక్రయాలు మరోసారి నిరూపించాయి. పండుగ ముందున్న నాలుగు రోజుల్లోనే హార్డ్ లిక్కర్: 6,83,000 కేసులు, బీర్లు: 10,44,000 కేసులు విక్రయమయ్యాయి. రాష్ట్రంలోని 17 ప్రధాన మద్యం డిపోల నుంచి సరఫరా అయ్యే స్టాక్ ద్వారా.. వ్యాపారులు 2,620 లైసెన్స్డ్ వైన్ షాపులు, దాదాపు 1,200 బార్లు, రెస్టారెంట్లు, పబ్‌ల ద్వారా ఈ అమ్మకాలను సాగించారు.

అక్టోబర్ 19న దుర్గాష్టమి, మరుసటి రోజు విజయదశమి రావడంతో తెలంగాణ ఇళ్లల్లో నాన్-వెజ్ విందులు, దావత్‌లు ఊపందుకున్నాయి. దావత్‌ల కోసం ముందుగానే మద్యాన్ని నిల్వ చేసుకున్నారు. దసరా సెలవుల కారణంగా ప్రధాన నగరాల నుంచి లక్షలాది మంది ప్రజలు సొంత ఊళ్లకు తరలివెళ్లారు. దీంతో గ్రామాల్లో స్నేహితులు, బంధువుల కలయికలతో వైన్‌షాపులు కిటకిటలాడాయి.

పండుగ రోజుల్లో డిమాండ్ పెరిగి మద్యం కొరత ఏర్పడకుండా వైన్‌షాపు నిర్వాహకులు, వ్యాపారులు డిపోల నుంచి బల్క్‌గా స్టాక్ కొనుగోలు చేయడం కూడా ఈ రికార్డు విక్రయాలకు కారణమైంది. అక్టోబర్ తొలి వారంలో అమ్మకాలు కొద్దిగా మందకొడిగా సాగినప్పటికీ, రెండో వారం నుంచి ఊపందుకుని అక్టోబర్ 19 నాటికి రాష్ట్రవ్యాప్తంగా మొత్తం మద్యం అమ్మకాలు ఏకంగా రూ. 2,000 కోట్ల మార్క్‌ను దాటేశాయి. అక్టోబర్ 16 నాటికి రూ. 1,527.85 కోట్ల క్యుమ్యులేటివ్ సేల్స్ నమోదయ్యాయి.

ఈ గణాంకాలు కేవలం అక్టోబర్ 19వ తేదీ వరకు నమోదైన విక్రయాల ఆధారంగా రూపొందించిన నివేదిక మాత్రమేనని ఎక్సైజ్ శాఖ ఉన్నతాధికారులు స్పష్టం చేశారు. పండుగ తర్వాతి రోజుల్లో కూడా అమ్మకాల ట్రెండ్ ఇలాగే కొనసాగే అవకాశముందని భావిస్తున్నారు. సాధారణంగా పండుగ రోజుల్లో హార్డ్ లిక్కర్‌కు డిమాండ్ ఎక్కువగా ఉంటుందనే అంచనాలను తిరగరాస్తూ.. ఈసారి బీర్ల విక్రయాలే భారీగా జరిగాయి.