E-Paper
పోగొట్టుకున్న వస్తువుల కోసం రియల్ టైమ్ లాస్ట్ అండ్ ఫౌండ్ డిజిటల్ ప్లాట్‌ఫామ్‌
హైదరాబాద్ శంషాబాద్ విమానాశ్రయంలో పోగొట్టుకున్న వస్తువులను సులభంగా ట్రాక్ చేసేందుకు RGIA సరికొత్త లాస్ట్ అండ్ ఫౌండ్ డిజిటల్ ప్లాట్‌ఫామ్‌ను అందుబాటులోకి తెచ్చింది. ఎయిర్పోర్ట్ సిబ్బందితో కూడా చాట్ చేస్తూ అప్డేట్స్ తీసుకోవచ్చు.
Prefer HTon Google
శంషాబాద్‌లోని రాజీవ్ గాంధీ అంతర్జాతీయ విమానాశ్రయం(RGIA) ప్రయాణికుల కోసం ఒక సరికొత్త సదుపాయాన్ని అందుబాటులోకి తెచ్చింది. విమానాశ్రయంలో పొరపాటున వస్తువులను పోగొట్టుకున్న ప్రయాణికులు, వాటిని సులభంగా వెతికి పట్టుకోవడానికి రియల్ టైమ్ లాస్ట్ అండ్ ఫౌండ్ డిజిటల్ ప్లాట్‌ఫామ్‌ను ప్రారంభించింది.
ఈ డిజిటల్ వ్యవస్థ ద్వారా ప్రయాణికులు తమ వస్తువుల స్థితిని ఎప్పటికప్పుడు ఆన్‌లైన్‌లో తెలుసుకోవడమే కాకుండా, విమానాశ్రయ సిబ్బందితో నేరుగా చాట్ లేదా కమ్యూనికేట్ చేసే అవకాశం లభిస్తుంది.
ఎలా పని చేస్తుంది?
విమానాశ్రయం అధికారిక వెబ్‌సైట్‌లోని 'Lost and Found' పోర్టల్‌ను సందర్శించి 'Raise a Request' పై క్లిక్ చేయాలి.
మీ పేరు, ఈమెయిల్, మొబైల్ నంబర్ వంటి వివరాలు నమోదు చేయాలి.
మీరు పోగొట్టుకున్న వస్తువు ఏ రకానికి చెందినదో (ఉదాహరణకు ల్యాప్‌టాప్, బ్యాగ్, పాస్‌పోర్ట్) ఎంచుకోవాలి. ఎక్కడ, ఎప్పుడు పోగొట్టుకున్నారో పూర్తి వివరాలు, వస్తువు వివరణను అందించాలి.
ఒకవేళ పోగొట్టుకున్న వస్తువు ఫోటో మీ వద్ద ఉంటే, సులభంగా గుర్తుపట్టడానికి దానిని అప్‌లోడ్ చేయవచ్చు.
ఫారమ్ సబ్‌మిట్ చేసిన వెంటనే మీ ఈమెయిల్‌కు ఒక ప్రత్యేక రిఫరెన్స్ ఐడీ వస్తుంది.
ఈ ఐడీని ఉపయోగించి మీ రిక్వెస్ట్ ఏ స్టేజ్‌లో ఉందో ఆన్‌లైన్‌లో లైవ్‌గా చూడవచ్చు. అవసరమైతే అధికారులతో మాట్లాడవచ్చు. మీ వస్తువు దొరికి, వెరిఫికేషన్ పూర్తయి మీ చేతికి అందే వరకు నోటిఫికేషన్లు వస్తూనే ఉంటాయి.
ఈ నూతన సేవపై జీఎంఆర్‌ హైదరాబాద్ ఇంటర్నేషనల్ ఎయిర్పోర్ట్ లిమిటెడ్ సీఈఓ కధీరవన్ మాట్లాడుతూ.. 'నూతన సాంకేతికత, డిజిటల్ వినూత్న మార్పుల ద్వారా ప్రయాణికులకు మెరుగైన సేవలందించడమే మా ప్రధాన ధ్యేయం. ప్రయాణికులు తాము పోగొట్టుకున్న వస్తువులను సులభంగా, ఎటువంటి ఆందోళన లేకుండా తిరిగి పొందేందుకు ఈ రియల్ టైమ్ ట్రాకింగ్ సిస్టమ్ ఎంతో ఉపయోగపడుతుంది. సాంకేతికతను సద్వినియోగం చేసుకుంటూ కస్టమర్ ఫ్రెండ్లీ సేవలను అందించడంలో హైదరాబాద్ ఎయిర్పోర్ట్ ఎప్పుడూ ముందుంటుంది.' అని పేర్కొన్నారు.
