ఈ కారణాలతో హైదరాబాద్, వరంగల్ వాసులకు దూరమవుతున్న నిద్ర.. ఎన్ని గంటలు?

ట్రాఫిక్ తిప్పలు, పెరిగిన వేడి కారణంగా హైదరాబాద్, వరంగల్ వాసులకు నిద్ర దూరమవుతోందని అధ్యయనం చెబుతోంది. ఎన్ని గంటలు నిద్ర దూరం అవుతుందో ఇక్కడ చూడండి.

హైదరాబాద్ వాసుల నిద్రపై నగరంలోని ట్రాఫిక్ ఇబ్బందులు, రాత్రివేళల్లో పెరుగుతున్న ఉష్ణోగ్రతలు తీవ్ర ప్రతికూల ప్రభావాన్ని చూపుతున్నాయి. రద్దీ వేళల్లో నగర రోడ్లపై ఏర్పడుతున్న ట్రాఫిక్ జామ్‌లు, పర్యావరణంలో వస్తున్న మార్పుల వల్ల ప్రజలు ఏటా సుమారు 198 గంటల నిద్రను కోల్పోతున్నారని టమ్‌టమ్‌ ట్రాఫిక్ ఇండెక్స్, అమెరికాకు చెందిన క్లైమేట్ సెంట్రల్ అధ్యయనాలు వెల్లడించాయి. వ్యక్తిగత ఒత్తిళ్లు, మానసిక సమస్యలే కాకుండా మారుతున్న పట్టణ జీవనశైలి కూడా ప్రజల ఆరోగ్యకరమైన నిద్రకు భంగం కలిగిస్తోందని ఈ నివేదికలు స్పష్టం చేస్తున్నాయి.

ప్రతీకాత్మక చిత్రం

ఉదయం, సాయంత్రం రద్దీ సమయాల్లో రోడ్లపై గంటల తరబడి చిక్కుకుపోవడం వల్ల వాహనదారులు మానసిక ఒత్తిడికి గురవ్వడమే కాకుండా, సమయానికి ఇంటికి చేరలేకపోతున్నారు. దీనివల్ల ఏటా ఒక్కో హైదరాబాద్ నివాసి సగటున 123 గంటల నిద్రను కోల్పోతున్నారు. అంటే దాదాపు 5 పూర్తి రోజుల సమయం కేవలం ట్రాఫిక్‌లోనే వృథా అవుతోంది.

ఉదయంతో పోలిస్తే సాయంత్రం వేళల్లోనే రద్దీ తీవ్రంగా ఉంటోంది. సాధారణ సమయాల్లో 10 కిలోమీటర్ల ప్రయాణానికి 32.37 నిమిషాలుడి పడితే, సాయంత్రం రద్దీ వేళల్లో అది 38.5 నిమిషాలకు పెరుగుతోంది. నగరంలో వాహనాల సంఖ్య 80 లక్షలు దాటడం, ప్రజా రవాణా వినియోగం తగ్గడమే దీనికి ప్రధాన కారణం. సాధారణంగా గంటకు 25-30 కి.మీ ఉండాల్సిన సగటు వేగం, సాయంత్రం వేళల్లో కేవలం 10 కి.మీలకు పడిపోతోంది.

కష్టపడి ఇంటికి చేరినా, రాత్రివేళల్లో పెరిగిన ఉష్ణోగ్రతల వల్ల ప్రశాంతంగా నిద్రపోలేకపోతున్నారు జనాలు. క్లైమేట్ సెంట్రల్ నివేదిక ప్రకారం వేడి రాత్రుల కారణంగా హైదరాబాదీలు ఏటా 75 గంటల నిద్ర కోల్పోతున్నారు. కాంక్రీట్ భవనాలు, తార్ రోడ్లు పగటిపూట వేడిని పీల్చుకుని, రాత్రి వేళల్లో నెమ్మదిగా విడుదల చేయడం వల్ల ఉష్ణోగ్రతలు త్వరగా తగ్గడం లేదు.

విశేషమేమిటంటే, తెలంగాణలోని వరంగల్‌లో ఉష్ణోగ్రతల ప్రభావం హైదరాబాద్ కంటే ఎక్కువగా ఉండి, అక్కడి ప్రజలు ఏటా 82 గంటల నిద్రను కోల్పోతున్నారు. నగరాల్లో తగినంత ఆకుపచ్చదనం లేకపోవడం, రవాణా వ్యవస్థ సరిగా లేకపోవడం ప్రజల ఆరోగ్యానికి పెద్ద సవాలుగా మారుతోంది.