హైదరాబాద్ సీపీగా మహేశ్ భగవత్.. సజ్జనార్ బదిలీ.. 21 మంది ఐపీఎస్‌లు ట్రాన్స్‌ఫర్!

తెలంగాణలో 21 మంది ఐపీఎస్‌లు బదిలీ అయ్యారు. ఈ మేరకు ప్రభుత్వం ఉత్తర్వులు జారీ చేసింది. హైదరాబాద్‌ సీపీగా మహేశ్ భగవత్ బాధ్యతలు అప్పగించారు.

రాష్ట్రవ్యాప్తంగా 21 మంది ఐపీఎస్ అధికారులను బదిలీ చేస్తూ, మరికొందరికి అదనపు బాధ్యతలు అప్పగిస్తూ తెలంగాణ ప్రభుత్వం ఉత్తర్వులు జారీ చేసింది. ఈ మేరకు ప్రభుత్వ ప్రధాన కార్యదర్శి సంజయ్ జాజు జీవోను విడుదల చేశారు. ఈ బదిలీల్లో భాగంగా అత్యంత కీలకమైన హైదరాబాద్ నగర పోలీస్ కమిషనర్ స్థానంలో మార్పు జరిగింది. ఇప్పటివరకు సీపీగా పనిచేసిన వి.సి. సజ్జనార్‌ను బదిలీ చేసి, ఆయన స్థానంలో లా అండ్ ఆర్డర్ డీజీపీగా ఉన్న మహేశ్ భగవత్‌ను హైదరాబాద్ పోలీస్ కమిషనర్‌గా ప్రభుత్వం నియమించింది. అలాగే వి.సి. సజ్జనార్‌కు అగ్నిమాపక, విపత్తు స్పందన, అత్యవసర సేవల విభాగం డైరెక్టర్ జనరల్‌గా బాధ్యతలు అప్పగించింది.

21 మంది ఐపీఎస్ అధికారుల బదిలీ

ఇప్పటివరకు ఆర్టీసీ ఎండీగా ఉన్న వై.నాగిరెడ్డిని పౌరసరఫరాల శాఖ కమిషనర్‌గా బదిలీ చేయగా, గ్రేహౌండ్స్ ఆపరేషన్స్ డీజీగా ఉన్న డా. అనిల్ కుమార్‌కు ఆర్టీసీ ఎండీగా కీలక బాధ్యతలు అప్పగించారు. పౌరసరఫరాల శాఖ కమిషనర్‌గా ఉన్న స్టీఫెన్ రవీంద్రను తెలంగాణ ట్రాఫిక్ మేనేజ్‌మెంట్, రోడ్ అండ్ రైల్ సేఫ్టీ బ్యూరో (TG-TMARS) డైరెక్టర్‌గా నియమించారు.

సీఐడీ డీజీగా ఉన్న చారు సిన్హాను ఏసీబీ డైరెక్టర్ జనరల్‌గా నియమిస్తూనే, సీఐడీ బాధ్యతలను అదనంగా అప్పగించారు. జైళ్ల శాఖ డీజీగా ఉన్న డా. సౌమ్య మిశ్రాను మహిళా భద్రత, షీ టీమ్స్, భరోసా విభాగం డీజీగా బదిలీ చేశారు.

సీనియర్ ఐపీఎస్ అధికారి అకున్ సబర్వాల్‌కు కీలకమైన లా అండ్ ఆర్డర్ అదనపు డీజీగా ప్రభుత్వం పోస్టింగ్ ఇచ్చింది. అలాగే శ్రీ బాల దేవి, వి. అరవింద బాబులకు కూడా కొత్త బాధ్యతలు దక్కాయి.

కీలక పోస్టింగ్‌ల వివరాలు

జైళ్ల శాఖ డీజీ: స్వాతి లక్రా

మహిళా భద్రత, షీ టీమ్స్, భరోసా విభాగాల డీజీ: సౌమ్య మిశ్రా

ఏసీబీ డీజీ: చారు సిన్హా

లా అండ్ ఆర్డర్ అదనపు డీజీపీ: ఆకున్ సబర్వాల్

గ్రేహౌండ్స్, ఆక్టోపస్ డీజీ: విక్రమ్ సింగ్ మాన్

సివిల్ సప్లైస్ కమిషనర్: నాగిరెడ్డి

తెలంగాణ ట్రాఫిక్ మేనేజ్‌మెంట్ విభాగం: స్టీఫెన్ రవీంద్ర

మల్టీ జోన్-1 ఐజీ: కార్తికేయ

హైదరాబాద్ ట్రాఫిక్ జాయింట్ కమిషనర్ (అదనపు బాధ్యతలు): జోయల్ డేవిస్

రాష్ట్రంలో శాంతిభద్రతల పర్యవేక్షణ, ప్రజా రవాణా, వివిధ కీలక విభాగాల పనితీరును మరింత బలోపేతం చేసే దిశగా ప్రభుత్వం ఈ నిర్ణయం తీసుకున్నట్లు తెలుస్తోంది. బదిలీ అయిన అధికారులంతా తక్షణమే తమ నూతన బాధ్యతలను స్వీకరించనున్నారు.