తెలంగాణ వ్యాప్తంగా ఉన్న పాఠశాలలకు దసరా పండుగ సెలవుల సమయాన్ని పాఠశాల విద్యాశాఖ అధికారికంగా ప్రకటించింది. ఈ ఏడాది అక్టోబర్ 10వ తేదీ నుంచి అక్టోబర్ 22వ తేదీ వరకు మొత్తం 13 రోజుల పాటు రాష్ట్రంలోని అన్ని యాజమాన్యాల పరిధిలోని పాఠశాలలకు విజయాదశమి సెలవులు ఇస్తున్నట్లు వెల్లడించింది. పండుగ సెలవుల అనంతరం అక్టోబర్ 23న పాఠశాలలు తిరిగి ప్రారంభమవుతాయి.
ప్రస్తుతం పాఠశాలల్లో జరుగుతున్న సమ్మేటివ్ అసెస్మెంట్-1 (SA-1) పరీక్షలు అక్టోబర్ 9వ తేదీతో ముగియనున్నాయి. పరీక్షలు పూర్తయిన మరుసటి రోజు నుంచే విద్యార్థులకు ఈ దసరా సెలవులు ప్రారంభం కానున్నాయి.
పరీక్ష సమయాల్లో స్వల్ప మార్పు…
అక్టోబర్ 9వ తేదీన జరగనున్న 9వ తరగతి పరీక్షల కాలపట్టికలో విద్యాశాఖ చిన్న మార్పు చేసింది. ఆ రోజు జరగాల్సిన ఇంగ్లీష్ పరీక్ష సమయాన్ని ఉదయం 9:15 గంటల నుంచి మధ్యాహ్నం 12:15 గంటల వరకు నిర్వహిస్తున్నట్లు అధికారులు స్పష్టం చేశారు.
సెలవుల సమయంలో ఉపాధ్యాయులు మూల్యాంకనం పూర్తి చేస్తారు. పాఠశాలలు తిరిగి ప్రారంభమైన తర్వాత ఫలితాలను వెల్లడిస్తారు. SA-2 పరీక్షలు 1 నుంచి 9వ తరగతి 2027 ఏప్రిల్ 9 నుండి ఏప్రిల్ 19 వరకు జరగనున్నాయి. పదో తరగతి ప్రీ-ఫైనల్స్ 2027 ఫిబ్రవరి 28 నాటికి పూర్తి కానున్నాయి.
ఇంటర్ కళాశాలల సెలవులు ఎప్పుడంటే..?
మరోవైపు రాష్ట్రంలోని జూనియర్ కళాశాలలకు కూడా అక్టోబర్ 10వ తేదీ నుంచే దసరా సెలవులు ప్రారంభం కానున్నాయి. అయితే ఇంటర్మీడియట్ విద్యార్థులకు అక్టోబర్ 21వ తేదీ వరకు మాత్రమే సెలవులు ఉంటాయి. దసరా విరామం తర్వాత అక్టోబర్ 22వ తేదీన జూనియర్ కళాశాలలను తిరిగి పునఃప్రారంభిస్తారు.