తెలుగు వెండితెరపై సోనియా గాంధీ బయోపిక్ - జగ్గారెడ్డి ప్రకటన! డబ్బులు రెడీ చేసుకోవాలంటూ నేతలకు పిలుపు

కాంగ్రెస్ అగ్రనేత సోనియా గాంధీ జీవిత కథ ‘బిలాంగింగ్: ఎ జర్నీ ఆఫ్ లవ్’ ఆధారంగా తెలుగులో సినిమా నిర్మించనున్నట్లు టీపీసీసీ వర్కింగ్ ప్రెసిడెంట్ జగ్గారెడ్డి ప్రకటించారు. పార్టీ నాయకులు డబ్బులు రెడీ చేసుకోవాలంటూ ఆసక్తికర వ్యాఖ్యలు చేశారు.

కాంగ్రెస్ అగ్రనేత సోనియా గాంధీ జీవిత విశేషాలు, రాజకీయ ప్రస్థానాన్ని తెలుగు వెండితెరపై ఆవిష్కరించేందుకు సన్నాహాలు మొదలయ్యాయి. సోనియా గాంధీ ఆత్మకథ ‘బిలాంగింగ్: ఎ జర్నీ ఆఫ్ లవ్’ (Belonging: A Journey of Love) ఆధారంగా తెలుగులో పూర్తిస్థాయి చలనచిత్రాన్ని నిర్మించనున్నట్లు తెలంగాణ ప్రదేశ్ కాంగ్రెస్ కమిటీ (టీపీసీసీ) వర్కింగ్ ప్రెసిడెంట్ జగ్గారెడ్డి గురువారం ప్రకటించారు. సంగారెడ్డిలో జరిగిన కాంగ్రెస్ పార్టీ కార్యకర్తల సమావేశంలో ఆయన ఈ కీలక విషయాన్ని వెల్లడించారు.

టీపీసీసీ వర్కింగ్ ప్రెసిడెంట్ జగ్గారెడ్డి

నిర్మాణానికి భారీ విరాళం.. 50 మందితో కమిటీ

ఈ సినిమా నిర్మాణ బాధ్యతల్లో సంగారెడ్డి నియోజకవర్గ కాంగ్రెస్ నేతలు, కార్యకర్తలు భాగస్వాములు కావాలని జగ్గారెడ్డి పిలుపునిచ్చారు. ఆయన పిలుపుకు స్పందించిన నియోజకవర్గ కాంగ్రెస్ కన్వీనర్ జూలకంటి ఆంజనేయులు, సినిమా నిర్మాణం కోసం తక్షణమే రూ. 2 కోట్ల విరాళాన్ని ప్రకటించారు. నిర్మాణ పనులను పర్యవేక్షించేందుకు 50 మంది సభ్యులతో ఒక ప్రత్యేక కమిటీని ఏర్పాటు చేయాలని జగ్గారెడ్డి సూచించారు. గాంధీ భవన్ పబ్లిక్ రిలేషన్స్ ఆఫీసర్ (పీఆర్ఓ) హరిప్రసాద్ ఈ కమిటీ బాధ్యతలను పర్యవేక్షిస్తారని తెలిపారు.

"ఎన్నికల సమయంలో మీరు ఖర్చు చేస్తారు కదా….? దీన్ని కూడా అలాంటి ఒక ముఖ్యమైన ఖర్చుగానే భావించండి. అందరం కలిసి బడ్జెట్ సమకూర్చుకుని, ఒక మంచి దర్శకుడిని ఎంపిక చేద్దాం" అని జగ్గారెడ్డి కార్యకర్తలను ఉత్సాహపరిచారు. ప్రాథమిక ఏర్పాట్లు పూర్తయిన తర్వాత ముఖ్యమంత్రి రేవంత్ రెడ్డి, టీపీసీసీ అధ్యక్షుడు మహేశ్ కుమార్ గౌడ్ చేతుల మీదుగా సినిమా షూటింగ్‌ను ప్రారంభిస్తామని స్పష్టం చేశారు. అంతేకాకుండా…… సోనియా గాంధీ జీవిత అనుభవాలను లోతుగా అర్థం చేసుకునేందుకు వీలుగా ఆమె ఆత్మకథ పుస్తకాలను తెప్పించి పార్టీ కార్యకర్తలకు పంపిణీ చేస్తామని చెప్పారు.

ఈ చిత్రంలో సోనియా గాంధీ జీవితంలోని వివిధ కోణాలను ప్రేక్షకుల ముందుకు తీసుకురానున్నట్లు జగ్గారెడ్డి వివరించారు. ఇందిరా గాంధీ కోడలిగా, రాజీవ్ గాంధీ సతీమణిగా, రాహుల్ గాంధీ, ప్రియాంక గాంధీల తల్లిగా ఆమె పోషించిన బాధ్యతలను ఇందులో చూపిస్తామన్నారు. ఇందిరా గాంధీ, రాజీవ్ గాంధీల హత్యల తర్వాత ఆ కుటుంబం ఎదుర్కొన్న విషాదాలను, ఆ కష్టకాలంలో సోనియా పడిన వేదనను, పిల్లలను పెంచి పెద్ద చేసిన తీరును తెరపై ఆవిష్కరిస్తామని తెలిపారు. భిన్న మతాలు, కులాలు, భాషలు ఉన్న భారతదేశంలో సోనియా గాంధీ తనకంటూ ఒక ప్రత్యేక గుర్తింపును ఏర్పరచుకున్నారని కొనియాడారు.

సోనియా గాంధీకి ప్రధానమంత్రి పదవిపై ఏనాడూ వ్యామోహం లేదని జగ్గారెడ్డి గుర్తుచేశారు. రాజీవ్ గాంధీ హత్య తర్వాత పీవీ నరసింహారావు ప్రధాని అయిన సమయంలోనూ ఆమె ఆ పదవిని ఆశించలేదన్నారు. ఆ తర్వాత యూపీఏ కూటమి అధికారంలోకి వచ్చినప్పుడు….. కాంగ్రెస్ నేతలంతా ప్రధాని బాధ్యతలు చేపట్టాలని కోరినప్పటికీ ఆమె సున్నితంగా తిరస్కరించి మన్మోహన్ సింగ్‌కు ఆ అవకాశం ఇచ్చారని తెలిపారు. ప్రధాని పదవిని త్యాగం చేయడం ఆమె రాజకీయ జీవితంలో ఒక చారిత్రక ఘట్టమని అభివర్ణించారు.

సోనియా గాంధీ, మన్మోహన్ సింగ్, రాహుల్ గాంధీల ఆలోచనల నుంచే మహాత్మా గాంధీ జాతీయ గ్రామీణ ఉపాధి హామీ పథకం (MGNREGS) రూపుదిద్దుకుందని జగ్గారెడ్డి పేర్కొన్నారు. దేశ ప్రజలు మరోసారి గాంధీ కుటుంబం నుంచి ప్రధానమంత్రిని చూడాలని కోరుకుంటున్నారని…. రాహుల్ గాంధీ ప్రధాని కావాలన్నదే సోనియా గాంధీ ఆకాంక్ష అని వ్యాఖ్యానించారు.