TG Cheyutha Pensions : చేయూత కొత్త పింఛన్లపై మరో అప్డేట్ - వెరిఫికేషన్ గడువు పొడిగింపు

Telangana Cheyutha Pension Application : రాష్ట్రంలో చేయూత పథకం కింద కొత్త పింఛన్ల దరఖాస్తుల పరిశీలన గడువును ప్రభుత్వం ఈ నెలాఖరు వరకు పొడిగించింది. ఇప్పటివరకు 60 శాతం ప్రక్రియ కూడా పూర్తికాకపోవడంతో నిర్ణయం తీసుకుంది.

Telangana Cheyutha Pension Application : రాష్ట్రంలో చేయూత పథకం కింద కొత్తగా పింఛన్ల కోసం దరఖాస్తు చేసుకున్న వారికి ప్రభుత్వం ఊరట కలిగించే వార్త అందించింది. చేయూత పింఛన్ల దరఖాస్తుల పునఃపరిశీలన ప్రక్రియకు సంబంధించిన గడువును ఈ నెలాఖరు వరకు పొడిగిస్తూ అధికారులు నిర్ణయం తీసుకున్నారు.

కొత్త పింఛన్లపై అప్డేట్ (image source X)

చేయూత పథకంలో భాగంగా కొత్త పింఛన్ల కోసం రాష్ట్రవ్యాప్తంగా దాదాపు ఆరు లక్షల వరకు దరఖాస్తులు వచ్చాయి. వచ్చిన దరఖాస్తులను క్షేత్రస్థాయిలో పూర్తిస్థాయిలో సరిచూసి…. అర్హులను ఎంపిక చేసే ప్రక్రియను ఈ నెల 25వ తేదీ నాటికే పూర్తి చేయాలని గతంలో గ్రామీణ పేదరిక నిర్మూలన సంస్థ స్పష్టమైన ఆదేశాలు ఇచ్చింది. అయితే….. నిర్ణీత గడువు శుక్రవారంతో ముగిసినప్పటికీ, రాష్ట్రవ్యాప్తంగా దరఖాస్తుల పరిశీలన ప్రక్రియ ఇప్పటివరకు కనీసం 60 శాతం కూడా పూర్తికాలేదు.

క్షేత్రస్థాయిలో అధికారులకు పనుల భారం ఎక్కువగా ఉండటమే ఈ జాప్యానికి ప్రధాన కారణమని తెలుస్తోంది. రాష్ట్రంలోని ఎంపీడీవోలు, పంచాయతీ అధికారులు, గ్రామ కార్యదర్శులు ప్రస్తుతం అనేక ఇతర సంక్షేమ, పాలనాపరమైన విధుల్లో నిమగ్నమై ఉన్నారు. ప్రధానంగా 'సర్‌' నోటీసుల జారీ, గణేష్ విగ్రహాల నిమజ్జనం బందోబస్తు, ముందస్తు ఏర్పాట్లు, ఇందిరమ్మ ఇళ్ల లబ్ధిదారుల ఎంపిక మరియు స్థలాల పరిశీలన వంటి అత్యవసర బాధ్యతలను అధికారులు చూస్తున్నారు.

ఈ వరుస విధులతో చేయూత దరఖాస్తుల భౌతిక పరిశీలన మందకొడిగా సాగుతోందని….. ఇచ్చిన గడువులోగా ప్రక్రియను పూర్తి చేయడం సాధ్యం కాదని క్షేత్రస్థాయి అధికారులు ప్రభుత్వ దృష్టికి తీసుకెళ్లారు. అధికారుల నుంచి వచ్చిన నివేదికను సానుకూలంగా పరిశీలించిన ఉన్నతాధికారులు…. క్షేత్రస్థాయి పరిశీలన గడువును ఈ నెల చివరి వరకు పొడిగిస్తూ ఉత్తర్వులు జారీ చేశారు. గడువు పొడిగింపుతో మిగిలిన దరఖాస్తుల పరిశీలనను త్వరితగతిన పూర్తి చేసి అర్హులకు న్యాయం చేస్తామని అధికారులు పేర్కొంటున్నారు.