Hyderabad Traffic : హైదరాబాద్ ట్యాంక్‌బండ్ పరిధిలో ట్రాఫిక్ మళ్లింపులు

హైదరాబాద్ ట్యాంక్ బండ్ వద్ద తిరంగా ర్యాలీ కోసం ట్రాఫిక్ మళ్లింపులు ప్రకటించారు పోలీసులు. వీలైతే ఆ రూట్‌కు బదులుగా ప్రత్యామ్నాయం చూసుకోవాలని సూచించారు.

హైదరాబాద్ నగరం నడిబొడ్డున ఉన్న ట్యాంక్ బండ్ ప్రాంతంలో శుక్రవారం మధ్యాహ్నం భారీ ట్రాఫిక్ ఆంక్షలు విధించనున్నారు. డాక్టర్ బి.ఆర్. అంబేద్కర్ విగ్రహం నుంచి చిల్డ్రన్స్ పార్క్ సమీపంలో ఉన్న M-47 ప్యాటన్ ట్యాంక్ వరకు నిర్వహించతలపెట్టిన తిరంగా ర్యాలీ(Tiranga Rally) సందర్భంగా ఈ ట్రాఫిక్ మళ్లింపులు అమలులో ఉంటాయని హైదరాబాద్ సిటీ ట్రాఫిక్ పోలీసులు వెల్లడించారు.

ట్రాఫిక్ మళ్లింపులు

మధ్యాహ్నం 3:00 గంటల నుంచి సాయంత్రం 5:30 గంటల వరకు ఈ ఆంక్షలు అమల్లో ఉంటాయి. ఈ మార్గంలో ప్రయాణించే వాహనదారులు ప్రత్యామ్నాయ మార్గాలను ఎంచుకోవాలని అధికారులు సూచించారు. ర్యాలీ జరిగే సమయంలో సజావుగా ట్రాఫిక్ నిర్వహణ కోసం పోలీసులు కింద పేర్కొన్న విధంగా రూట్లను మళ్లించారు.

కర్బలా మైదాన్ వైపు నుంచి అప్పర్ ట్యాంక్ బండ్ వైపు వెళ్లే ట్రాఫిక్‌ను సెయిలింగ్ క్లబ్ వద్ద కవాడిగూడ వైపు మళ్లిస్తారు.

డీబీఆర్ మిల్స్ వైపు నుంచి అప్పర్ ట్యాంక్ బండ్ దిశగా వెళ్లే వాహనాలను డీబీఆర్ మిల్స్ వద్ద గోశాల, కవాడిగూడ వైపు తిప్పుతారు.

ముఖ్యంగా సెయిలింగ్ క్లబ్, డీబీఆర్ మిల్స్ కూడళ్ల వద్ద భారీగా ట్రాఫిక్ నిలిచిపోయే అవకాశం ఉంది. సాయంత్రం వేళల్లో ఆఫీసుల నుంచి ఇళ్లకు వెళ్లేవారికి, పాఠశాల విద్యార్థులకు ఇబ్బందులు కలగకుండా ఉండటానికి ఈ మార్గాల్లో ప్రయాణాన్ని వాయిదా వేసుకోవడం మంచిది.

ప్రత్యామ్నాయ మార్గాలు

లోయర్ ట్యాంక్ బండ్, కవాడిగూడ, సికింద్రాబాద్ మార్గాలను ప్రత్యామ్నాయంగా ఉపయోగించుకోవచ్చని పోలీసులు పేర్కొన్నారు. అత్యవసర సేవలు అందించే అంబులెన్సులు, ఫైర్ ఇంజిన్లకు ఈ మళ్లింపుల నుంచి సడలింపు ఉంటుంది. తిరంగా ర్యాలీ కార్యక్రమం పూర్తయిన వెంటనే మళ్లింపులు, రోడ్డు మూసివేతలను పూర్తిగా తొలగించి, రవాణాను పునరుద్ధరిస్తారు.