వాట్సాప్‌‌లోనూ ఇందిరమ్మ ఇళ్ల పథకానికి దరఖాస్తు చేసుకోవచ్చు.. మీ సేవలో కూడా!

క్యూఆర్ పరిధిలో ఇందిరమ్మ ఇళ్ల పథకానికి దరఖాస్తులు ప్రారంభం అయ్యాయి. మీ సేవ ద్వారా అర్హులైన వారు దరఖాస్తు చేసుకోవచ్చు.

హైదరాబాద్ (కోర్ అర్బన్ రీజియన్ - CURE) పరిధిలోని పేద, మధ్యతరగతి ప్రజలకు తెలంగాణ ప్రభుత్వం తీపి కబురు అందించింది. ఇందిరమ్మ ఇళ్ల పథకం కింద అందుబాటు ధరల్లో నిర్మించే ఫ్లాట్ల కోసం దరఖాస్తు ప్రక్రియ (జూలై 21, 2026) నుంచి 'మీసేవ' పోర్టల్‌లో ప్రారంభమైంది. ఈ పథకానికి దరఖాస్తు చేసుకోవడానికి ఆగస్టు 10, 2026ని తుది గడువుగా నిర్ణయించారు.

ఇందిరమ్మ ఇళ్ల వివరాలు

ప్రతీకాత్మక చిత్రం

ప్రతి ఫ్లాట్ బిల్ట్-అప్ ఏరియా 528 చదరపు అడుగులు (sft) కాగా, కార్పెట్ ఏరియా 400 చదరపు అడుగులుగా ఉంటుంది. ఒక్కో ఫ్లాట్ నిర్మాణ అంచనా వ్యయం రూ. 11 లక్షలు. అర్హులైన లబ్ధిదారులకు ప్రభుత్వం రూ. 5 లక్షల సబ్సిడీని అందిస్తుంది. సబ్సిడీ మినహాయించి, లబ్ధిదారుడు మిగిలిన రూ. 6 లక్షలు చెల్లించాల్సి ఉంటుంది. భూమి కూడా ప్రభుత్వం చూపిస్తుంది. వార్షిక కుటుంబ ఆదాయం రూ. 6 లక్షల వరకు ఉన్న కుటుంబాలు ఈ పథకానికి అర్హులు.

ఎక్కడ, ఎలా దరఖాస్తు చేసుకోవాలి?

అభ్యర్థులు నేరుగా మీసేవ కేంద్రాల ద్వారా లేదా అధికారిక వెబ్‌సైట్ (meeseva.telangana.gov.in)లో దేరఖాస్తు చేసుకోవచ్చు. అలాగే వాట్సాప్ నంబర్ 8096958096 ద్వారా కూడా సేవలు త్వరలోనే అందుబాటులోకి రానున్నాయి. మీసేవ పోర్టల్‌లో ముందుగా రిజిస్టర్ అయి, లాగిన్ అవ్వాలి. లాగిన్ అయిన తర్వాత 'Others' విభాగంపై క్లిక్ చేయాలి. అనంతరం 'TSHB' ట్యాబ్‌ను ఎంచుకుంటే అక్కడ 'Indiramma Indlu CURE Area', 'LIG Flats Application Form' ఆప్షన్లు కనిపిస్తాయి.

దరఖాస్తుదారు పేరు, పుట్టిన తేదీ, వార్షిక రాబడి, వార్డు, సర్కిల్, ప్రాజెక్టు ప్రాంతం వివరాలు ఇవ్వాలి. అధికారిక గుర్తింపు కార్డు, దాని ముందు, వెనుక భాగాల స్పష్టమైన చిత్రాలను (JPG ఫార్మాట్‌లో) అప్‌లోడ్ చేయాల్సి ఉంటుంది. కుటుంబ వార్షిక ఆదాయం రూ. 6 లక్షలకు మించకూడదు.

ఒక కుటుంబం నుంచి ఒక దరఖాస్తు మాత్రమే స్వీకరిస్తారు. హైదరాబాద్‌లోని 16 అసెంబ్లీ నియోజకవర్గాల్లో ఇందిరమ్మ ఇళ్ల టవర్ల నిర్మాణ ప్రాంతాలను గృహనిర్మాణ, రెవెన్యూ శాఖ మంత్రి పొంగులేటి శ్రీనివాసరెడ్డి ఇప్పటికే ప్రకటించారు. మిగిలిన 10 నియోజకవర్గాల వివరాలను త్వరలోనే వెల్లడించనున్నారు.