Vijayawada : కృష్ణా నదిలో నైట్ బోటింగ్‌ - సర్కార్ గ్రీన్ సిగ్నల్, ఈ రూల్స్ మాత్రం తప్పనిసరి!

విజయవాడ కృష్ణా నదిలో రాత్రిపూట బోటింగ్ సర్వీసులకు ఏపీ జలవనరుల శాఖ షరతులతో కూడిన అనుమతి ఇచ్చింది. పున్నమి ఘాట్ నుంచి భవానీ ఐలాండ్ వరకు రాత్రి 10 గంటల వరకు పర్యాటకులు నదీ విహారం చేయవచ్చు.

Vijayawada Night Boating : పర్యాటక రంగానికి మరింత ఊపునిచ్చేందుకు ఆంధ్రప్రదేశ్ ప్రభుత్వం ఒక కీలక నిర్ణయం తీసుకుంది. విజయవాడలోని కృష్ణా నదిలో రాత్రివేళ బోటు షికారు (నైట్ క్రూజింగ్) చేసేందుకు పర్యాటక శాఖకు జలవనరుల శాఖ పచ్చజెండా ఊపింది. ఈ మేరకు నో అబ్జెక్షన్ సర్టిఫికేట్ (NOC) మంజూరు చేస్తూ అధికారిక ఉత్తర్వులు (GO) జారీ అయ్యాయి.

కృష్ణా నదిలో బోటింగ్‌ (ఫైల్ ఫొటో)

ఈ కొత్త నిర్ణయంతో పర్యాటకులు అమరావతి రాజధాని ప్రాంతం, పున్నమి ఘాట్, భవానీ ఐలాండ్ పరిసరాల్లో రాత్రి 10 గంటల వరకు కృష్ణా నదిలో హాయిగా విహరించవచ్చు. ఆంధ్రప్రదేశ్ పర్యాటక అభివృద్ధి సంస్థ (APTDC) ఆధ్వర్యంలో ఈ బోటింగ్ సేవలు అందుబాటులోకి రానున్నాయి.

భద్రత విషయంలో కఠిన నిబంధనలు

పర్యాటకుల రక్షణే ధ్యేయంగా ప్రభుత్వం ఈ అనుమతులతో పాటు అనేక కఠిన నిబంధనలను విధించింది. నది పరివాహక ప్రాంతం, నీటి విడుదల నిర్వహణకు ప్రాధాన్యం ఇస్తూనే ఈ విహారానికి అనుమతి ఇచ్చినట్లు ప్రభుత్వం పేర్కొంది.

• ప్రకాశం బ్యారేజ్ గేట్ల నిర్వహణ, నీటి ప్రవాహ నియంత్రణకు మొదటి ప్రాధాన్యం ఉంటుంది. ఏదైనా అత్యవసర పరిస్థితుల్లో లేదా నీటి ప్రవాహం ఎక్కువగా ఉన్నప్పుడు బోటింగ్ సేవలను తక్షణమే నిలిపివేస్తారు.
• వరద ప్రమాదం, ప్రతికూల వాతావరణం లేదా జలవనరుల శాఖ హెచ్చరికలు జారీ చేసిన సమయంలో రాత్రిపూట బోటింగ్ నిర్వహించడానికి వీల్లేదు.
• బోట్లు ప్రయాణించే మార్గాన్ని ప్రకాశవంతమైన వెలుగులు చిమ్మే లైటింగ్ సూచికలు , బ్లింకర్లతో స్పష్టంగా గుర్తించాలి. ఈ కేటాయించిన మార్గం దాటి బోట్లు మరెక్కడికీ వెళ్లకూడదు.
• కృష్ణా నదిపై ఆధారపడి జీవించే స్థానిక మత్స్యకారుల హక్కులకు భంగం వాటిల్లకుండా చర్యలు తీసుకోవాలి. వారి చేపల వలలకు ఎలాంటి నష్టం కలగకుండా పర్యాటక శాఖ తగిన జాగ్రత్తలు వహించాల్సి ఉంటుంది.
• ప్రకాశం బ్యారేజీకి ఎగువన 1000 మీటర్ల (1 కిలోమీటరు) పరిధిలో ఎలాంటి బోట్లనూ అనుమతించబోరు.

ఈ నిబంధనలన్నీ కచ్చితంగా పాటిస్తూ పర్యాటకులకు సరికొత్త అనుభూతిని అందించేందుకు పర్యాటక శాఖ ఏర్పాట్లు చేస్తోంది. విజయవాడ రాత్రి శోభను, కృష్ణా నది అందాలను తిలకించాలనుకునే వారికి ఇది నిజంగా మంచి అవకాశమని చెప్పవచ్చు.