అన్నదాత సుఖీభవ స్కీమ్ నిధులు విడుదల - ఒక్కో రైతుకు రూ. 7 వేలు! స్టేటస్ ఇలా చెక్ చేసుకోండి

ఆంధ్రప్రదేశ్‌లోని 46.85 లక్షల రైతు కుటుంబాలకు అన్నదాత సుఖీభవ-పీఎం కిసాన్ రెండో విడత కింద రూ.3,125.47 కోట్లను ప్రభుత్వం విడుదల చేసింది. ఈ మేరకు రైతుల ఖాతాల్లోకి డబ్బులు జమయ్యాయి.

రాష్ట్రంలోని రైతాంగానికి కూటమి ప్రభుత్వం తీపి కబురు అందించింది. 'అన్నదాత సుఖీభవ – పీఎం కిసాన్' పథకం కింద రెండవ విడత ఆర్థిక సహాయాన్ని శుక్రవారం విడుదల చేసింది. ఈ విడత ద్వారా రాష్ట్రవ్యాప్తంగా మొత్తం 46,85,838 రైతు కుటుంబాల బ్యాంక్ ఖాతాల్లో నేరుగా రూ.3,125.47 కోట్ల నిధులు జమవుతున్నాయి.

అన్నదాత సుఖీభవ స్కీమ్

రైతులకు అందించిన ఈ మొత్తం రూ.3,125.47 కోట్ల నిధుల్లో రాష్ట్ర ప్రభుత్వం ప్రధాన వాటాను భరించగా, కేంద్ర ప్రభుత్వం తన వంతు భాగస్వామ్యాన్ని అందించింది.

• రాష్ట్ర ప్రభుత్వ వాటా: రూ.2,342.92 కోట్లు
• కేంద్ర ప్రభుత్వ పీఎం కిసాన్ వాటా: రూ.782.55 కోట్లు

ఏటా రూ.20,000 సాయం

రాష్ట్రంలోని ప్రతి అర్హత కలిగిన రైతు కుటుంబానికి ఏడాదికి రూ.20,000 చొప్పున ఆర్థిక భరోసా కల్పించడానికి ప్రభుత్వం పూర్తిగా కట్టుబడి ఉందని మంత్రి అచ్చెన్నాయుడు స్పష్టం చేశారు. ఈ మొత్తం సాయంలో రాష్ట్ర ప్రభుత్వం రూ.14,000 అందిస్తుండగా, కేంద్ర ప్రభుత్వం పీఎం కిసాన్ పథకం ద్వారా రూ.6,000 సమకూరుస్తోంది. ఈ ఆర్థిక సాయాన్ని మూడు విడతల్లో రైతుల ఖాతాల్లోకి జమ చేస్తున్నారు.

• ఖరీఫ్ సీజన్ : రూ.7,000
• రబీ పంట కాలానికి: రూ.7,000
• వేసవి నిర్వహణ ఖర్చులకు : రూ.6,000

గత గణాంకాలను వివరిస్తూ…. 2025-26 ఆర్థిక సంవత్సరంలో ప్రభుత్వం రైతులకు రూ.8,985.41 కోట్లను పంపిణీ చేసిందని మంత్రి తెలిపారు. అలాగే 2026-27 ఆర్థిక సంవత్సరానికి సంబంధించి మొదటి విడతగా రూ.3,125.47 కోట్లను విడుదల చేసినట్లు పేర్కొన్నారు. ప్రస్తుతం విడుదల చేసిన రెండో విడత నిధులతో పాటు, 2024-25 కాలంలో పీఎం కిసాన్ కింద అందించిన నిధులను కూడా కలిపితే, ఇప్పటివరకు ఏపీలోని రైతులకు అందించిన మొత్తం ఆర్థిక సహాయం రూ.17,789.80 కోట్లకు చేరుకుందని వ్యవసాయ శాఖ లెక్కలు వెల్లడిస్తున్నాయి.